ସେଣ୍ଟଜନ୍ସ, ୨୮ା୨ (ପି.ଟି.)-ମାର୍ଚ୍ଚ ୩ରୁ ହେବାକୁଥିବା ଶ୍ରୀଲଙ୍କା ବିପକ୍ଷ ୩ ମ୍ୟାଚ ବିଶିଷ୍ଟ ଅନ୍ତର୍ଜାତୀୟ ଟି୨୦ ସିରିଜ ପାଇଁ ଓ୍ବେଷ୍ଟଇଣ୍ଡିଜ ଦଳ ଘୋଷଣା କରାଯାଇଛି। ଭେଟେରାନ ବ୍ୟାଟ୍ସମ୍ୟାନ କ୍ରିସ୍ ଗେଲ୍ ପାଖାପାଖି ଦୁଇ ବର୍ଷ ପରେ ପ୍ରଥମ ଥର ଦଳରେ ସ୍ଥାନ ପାଇଛନ୍ତି। ପାକିସ୍ତାନ ସୁପର ଲିଗ୍ ଓ ଆଇପିଏଲ୍ ସମେତ ନିକଟରେ ଅନୁଷ୍ଠିତ କେତେକ ଟୁର୍ନାମେଣ୍ଟରେ ଏହି ୪୧ ବର୍ଷୀୟ ଟପ୍ ଅର୍ଡର ବ୍ୟାଟ୍ସମ୍ୟାନ ଭଲ ପ୍ରଦର୍ଶନ କରିଛନ୍ତି। କିରନ ପୋଲାର୍ଡଙ୍କୁ ଏହି ୧୪ ଜଣିଆ ଦଳର ଅଧିନାୟକ କରାଯାଇଛି। ସେହିପରି ୯ ବର୍ଷ ବ୍ୟବଧାନରେ ୩୯ ବର୍ଷୀୟ ସିନିୟର ଫାଷ୍ଟ ବୋଲର ଫିଡେଲ ଏଡ୍ଓ୍ବାଡର୍ସ ଜାତୀୟ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି। ୩ ମ୍ୟାଚ ବିଶିଷ୍ଟ ଟି୨୦ ସିରିଜ ମାର୍ଚ୍ଚ ୩, ୫ ଓ ୭ ତାରିଖରେ ଆଣ୍ଟିଗୁଆର କୁଲିଜ୍ କ୍ରିକେଟ ଗ୍ରାଉଣ୍ଡରେ ଖେଳାଯିବ, ଯେଉଁଠାରେ ପ୍ରଥମଥର ଅନ୍ତର୍ଜାତୀୟ ମ୍ୟାଚ ଖେଳାଯିବ। ବିସ୍ଫୋରକ ବ୍ୟାଟ୍ସମ୍ୟାନ ଗେଲ୍ ଗତଥର ଓ୍ବେଷ୍ଟଇଣ୍ଡିଜ ତରଫରୁ ଭାରତ ବିପକ୍ଷ ଘରୋଇ ସିରିଜ ୨୦୧୯ ଅଗଷ୍ଟରେ ଖେଳିଥିଲେ। ସେହିବର୍ଷ ସେ ଆହୁରି ମଧ୍ୟ ୫୦ ଓଭର ବିଶ୍ୱକପ୍ ଖେଳିଥିଲେ। ଗେଲ୍ ୧୯୯୯ରେ ଅନ୍ତର୍ଜାତୀୟ ପଦାର୍ପଣ କରିଥିଲେ। ସେ ହେଉଛନ୍ତି ଟି୨୦ ଇତିହାସରେ ସବୁଠାରୁ ଅଧିକ ରନ ସଂଗ୍ରହକାରୀ ବ୍ୟାଟ୍ସମ୍ୟାନ। ସେ ୧୦୩ ଟେଷ୍ଟ, ୩୦୧ ଅନ୍ତର୍ଜାତୀୟ ଦିନିକିଆ ଏବଂ ୫୮ ଅନ୍ତର୍ଜାତୀୟ ଟି୨୦ ଖେଳିଛନ୍ତି। ଏଡଓ୍ବାଡର୍ସଙ୍କୁ ସାମିଲ କରାଯିବା ଦ୍ୱାରା ଦଳର ଫାୟାର ପାଓ୍ବାର ବୃଦ୍ଧି ପାଇବ ବୋଲି କ୍ରିକେଟ ଓ୍ବେଷ୍ଟଇଣ୍ଡିଜର ମୁଖ୍ୟ ଚୟନକର୍ତ୍ତା ରୋଜର ହାର୍ପର କହିଛନ୍ତି। ଅଫ୍ ସ୍ପିନର କେଭିନ୍ ସିନ୍କ୍ଲେୟାର ପ୍ରଥମଥର ଓ୍ବେଷ୍ଟଇଣ୍ଡିଜ ଦଳରେ ସ୍ଥାନ ପାଇଥିବାବେଳେ ଆକିଲ ହୋସେନଙ୍କୁ ପ୍ରଥମ ଥର ଜାତୀୟ ଟି୨୦ ଦଳରେ ସ୍ଥାନ ମିଳିଛି। ସିଲେକ୍ସନ ପ୍ୟାନେଲ ଆହୁରିମଧ୍ୟ ଭ୍ରମଣକାରୀ ଶ୍ରୀଲଙ୍କା ବିପକ୍ଷରେ ଖେଳାଯିବାକୁ ଥିବା ଅନ୍ତର୍ଜାତୀୟ ଦିନିକିଆ ସିରିଜ ପାଇଁ ଦଳ ଘୋଷଣା କରିଛି। ଏହା ଆଣ୍ଟିଗୁଆର ସାର୍ ଭିଭିଆନ ରିଚାଡର୍ସ ଷ୍ଟାଡିୟମରେ ମାର୍ଚ୍ଚ ୧୦ରୁ ୧୪ ମଧ୍ୟରେ ଖେଳାଯିବ।
ଓ୍ବେଷ୍ଟଇଣ୍ଡିଜ ଟି୨୦ ଦଳ: କିରନ ପୋଲାର୍ଡ (ଅଧିନାୟକ), ନିକୋଲାସ ପୁରାନ, ଫାବିଏନ ଆଲେନ୍, ଡ୍ବେନ ବ୍ରାଭୋ, ଫିଡେଲ ଏଡ୍ଓ୍ବାଡର୍ସ, ଆଣ୍ଡ୍ରେ ଫ୍ଲେଚର, କ୍ରିସ୍ ଗେଲ୍, ଜାସନ ହୋଲ୍ଡର, ଆକିଲ ହୋସେନ, ଏଭିନ ଲିଓ୍ବିସ, ଓବେଦ୍ ମ୍ୟାକ୍କଏ, ରୋଭମାନ ପାଓ୍ବେଲ, ଲେଣ୍ଡଲ ସିମନ୍ସ, କେଭିନ ସିନ୍କ୍ଲେୟର।
