ନୂଆଦିଲ୍ଲୀ,୨୬।୧୦ : ଭାରତ ଏବଂ ଚାଇନା ମଧ୍ୟରେ ଅନେକ ରାଉଣ୍ଡ କମାଣ୍ଡର ସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। କିନ୍ତୁ ପ୍ରତ୍ୟେକ ବୈଠକରେ ଭାରତ ସ୍ପଷ୍ଟ ଭାବରେ କହିଛି ଯେପର୍ଯ୍ୟନ୍ତ ଚାଇନା ସୀମା ନିକଟରେ ପାଟ୍ରୋଲିଂ ବନ୍ଦ ନ କରିଛି ସେ ପର୍ଯ୍ୟନ୍ତ ଆମର ସେନା ମଧ୍ୟ ହଟିବେ ନାହିଁ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଅନେକ ଥର କହିଛନ୍ତି ଚାଇନାର କଥାକୁ ବିଶ୍ୱାସ କରାଯାଇପାରିବ ନାହିଁ କାରଣ ଏହାର କଥା ଗୋଟିଏ ଏବଂ କାର୍ଯ୍ୟ ଅନ୍ୟ କିଛି। ଏହି କାରଣରୁ ମାଇନସ ଡିଗ୍ରୀର ତୁଷାର ଶିଖରରେ ମଧ୍ୟ ଭାରତୀୟ ସେନାର ସାହସୀ ଯବାନମାନେ ଯେକୌଣସି ବିପଦର ମୁକାବିଲା ପାଇଁ ଚାଇନା ସୈନିକମାନଙ୍କ ସହ ମୁହାଁମୁହିଁ ଭାବେ ଠିଆ ହୋଇଛନ୍ତି।
ଗଲୱାନ ଘାଟି ଘଟଣାକୁ ଦେଶ କେବେ ବି ଭୁଲି ପାରିବ ନାହିଁ। ବିହାର ରେଜିମେଣ୍ଟ ସହିତ ଏପରି ହିଂସାତ୍ମକ ସଂଘର୍ଷ ହୋଇଥିଲା। ଏହାକୁ ଚାଇନା ସୈନିକ ଭୁଲି ପାରି ନାହାନ୍ତି। ଏହି ରକ୍ତାକ୍ତ ହିଂସାତ୍ମକ ସଂଘର୍ଷରେ ୨୦ ଭାରତୀୟ ଯବାନ ଶହୀଦ ହୋଇଥିଲେ। ଅପରପକ୍ଷରେ ୪୦ରୁ ଅଧିକ ଚାଇନା ସୈନ୍ୟଙ୍କ ମୃତ୍ୟୁ ଘଟିଥିଲା। ସ ଏହାପରେ ଆଲୋଚନା ପରେ ଉଭୟ ଦେଶର ସୈନ୍ୟବାହିନୀ ଗଲୱାନ ଘାଟି, ପୋଙ୍ଗାଙ୍ଗ ହ୍ରଦ ଏବଂ ହଟ ସ୍ପ୍ରିଙ୍ଗ ସମେତ ଅନେକ ସ୍ଥାନରେ ପଛକୁ ହଟିଥିଲେ। କିନ୍ତୁ ଡିପସଙ୍ଗ ଏବଂ ଡେମୋକୋକରେ ସ୍ଥିତିରେ କୌଣସି ପରିବର୍ତ୍ତନ ଘଟି ନାହିଁ ବୋଲି ପୂର୍ବତନ ମେଜର ଜେନେରାଲ ଏସ.କେ ସିଂ କହିଛନ୍ତି।
ସୀମାରେ ଚାଇନା ଗାଁ ସ୍ଥାପନ କରୁଛି ବୋଲି ଆମେରିକୀୟ ପେଣ୍ଟାଗନ ଭାରତକୁ ସୂଚନା ଦେଇଛି । ଏଲଏସିର ବହୁ ଅଞ୍ଚଳରେ ବିଭିନ୍ନ ପ୍ରକାରର ନିର୍ମାଣ କାର୍ଯ୍ୟରେ ଚାଇନା ନିୟୋଜିତ ଅଛି। ଅଣ୍ଡରଗ୍ରାଉଣ୍ଡ ଆଶ୍ରୟସ୍ଥଳୀ, ନୂତନ ରାସ୍ତା, ହେଲିପ୍ୟାଡ ଏବଂ ନୂତନ ରାଡାର ସ୍ଥାପନ କରିବା ସହିତ ଏକ ପକ୍କା ରାସ୍ତା ନିର୍ମାଣ କରାଯାଇଛି। ସୀମାରେ ଦ୍ରୁତ ଗତିରେ ଗ୍ରାମ ମଧ୍ୟ ପ୍ରତିଷ୍ଠା କରାଯାଉଛି। ଯୁଦ୍ଧ ବିମାନ ଅବତରଣ କରିବା ପାଇଁ ଦ୍ରୁତ ଗତିରେ ଏୟାର ବେସ ନିର୍ମାଣ ଜାରି ରହିଛି। ବିବାଦ ପାଇଁ ସୀମା ହେଉଛି ଏକ ପ୍ରମୁଖ କାରଣ। ଭାରତ-ଚାଇନା ମଧ୍ୟରେ ସୀମା ଏପର୍ଯ୍ୟନ୍ତ ସ୍ଥିର ହୋଇନାହିଁ ଏବଂ ଚାଇନା ମ୍ୟାକମାହନ ଲାଇନକୁ ଗ୍ରହଣ କରିବାକୁ ପ୍ରସ୍ତୁତ ନୁହେଁ। ପୂର୍ବତନ ମେଜର ଜେନେରାଲ ଏସ.କେ ସିଂଙ୍କ ଅନୁଯାୟୀ, ଯଦି ଚାଇନା ପୂର୍ବ ଲଦାଖରେ ଥିବା ପୁରୁଣା ସ୍ଥାନକୁ ଗ୍ରହଣ ନ କରେ ତେବେ ସମ୍ପର୍କ ସୁଦଢ଼ ହୋଇପାରିବ ନାହିଁ।
ପୂର୍ବତନ ମେଜର ଜେନେରାଲ ଏସ.କେ ସିଂ କହିଛନ୍ତି ଚାଇନାର କାହାକୁ ବିଶ୍ୱାସ କରାଯାଇପାରିବ ନାହିଁ। ୧୯୬୨ମସିହାରେ ଚାଇନା ମଧ୍ୟ ଭାରତ ସହିତ ବିଶ୍ୱାସଘାତକତା କରିଥିଲା। ଆମେ ଭାବୁଥିଲୁ ଏମାନେ ଭାଇ ଏବଂ କେବେ ଆକ୍ରମଣ କରିବେ ନାହିଁ। ଚାଇନା ଆକ୍ରମଣ ପରେ ଭାରତକୁ ଆକସାଇ ସିଆଚିନ ଅଞ୍ଚଳ ହରାଇବାକୁ ପଡିଥିଲା। ୧୯୬୨ ପରଠାରୁ ଚାଇନା ଭାରତର ଅଧିକ ଅଞ୍ଚଳ ଦଖଲ କରିବାକୁ ଚେଷ୍ଟା କରୁଛି। କିନ୍ତୁ ଭାରତ ପ୍ରତ୍ୟେକ ଥର ଏହାର ପ୍ରୟାସକୁ ପଣ୍ଡ କରିଛି।
ଏଲଏସିରେ ଭାରତ ମଧ୍ୟ ନିଜର ଭିତ୍ତିଭୂମି ପ୍ରସ୍ତୁତ କରିଛି। ଏଥି ସହିତ ଚାଇନା ମଧ୍ୟ ଜାଣେ ଯଦି ଯୁଦ୍ଧକୁ ହୁଏ ତେବେ ତାହାର ନିଜର କ୍ଷତି ହୋଇପାରେ। କାରଣ ବର୍ତ୍ତମାନ ଭାରତ ବହୁତ ଶକ୍ତିଶାଳୀ ସ୍ଥିତିରେ ଅଛି।
