ଭୁବନେଶ୍ୱର,୧୬।୨(ବନ୍ଦନା ସେଠୀ): ବିଧାନସଭାର ବଜେଟ ଅଧିବେଶନର ତୃତୀୟ ଦିନରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଦେଇଥିବା ଲିଖିତ ସୂଚନା ଅନୁଯାୟୀ, ୨୦୧୯ରୁ ୨୦୨୫ ମଧ୍ୟରେ ମୋଟ ୮ ହଜାର ୧୫୯ ବାଲ୍ୟବିବାହ ହୋଇଛି। ସେଥିମଧ୍ୟରୁ ନବରଙ୍ଗପୁର ଜିଲାରେ ସର୍ବାଧିକ ୧,୩୪୭ ବାଲ୍ୟବିବାହ ହୋଇଛି। ଦ୍ୱିତୀୟ ସ୍ଥାନରେ ଗଞ୍ଜାମ ଜିଲା ରହିଥିବାବେଳେ, ଏଠାରେ ୯୬୬ ବାଲ୍ୟ ବିବାହ ହୋଇଛି। ସେହିପରି କୋରାପୁଟରେ ୬୩୬, ମୟୂରଭଞ୍ଜରେ ୫୯୪, ରାୟଗଡାରେ ୪୦୮, ବାଲେଶ୍ୱରରେ ୩୬୧, କେନ୍ଦୁଝରରେ ୩୨୮, ନୟାଗଡ଼ ଓ କନ୍ଧମାଳରେ ୩୦୮ ଲେଖାଏ, କଟକରେ ୧୫୪ ବାଲ୍ୟବିବାହ ହୋଇଛି। ସବୁଠାରୁ ବଡ଼ କଥା ହେଉଛି, ଖୋର୍ଦ୍ଧା ଜିଲା ମଧ୍ୟ ଏହି ତାଲିକାରୁ ବାଦ୍ ପଡିନାହିଁ। ଏଠାରେ ଗତ ୬ବର୍ଷ ମଧ୍ୟରେ ୧୧୦ ବାଲ୍ୟବିବାହ ହୋଇଥିବା ତଥ୍ୟରୁ ସ୍ପଷ୍ଟ ହୋଇଛି। ତେବେ ସରକାର ବାଲ୍ୟବିବାହକୁ ରୋକ ଲଗାଇବା ପାଇଁ ବ୍ଲକସ୍ତରରେ, ଅଙ୍ଗନଓ୍ବାଡିରେ ସଚେତନତା କାର୍ଯ୍ୟକ୍ରମ ସହିତ ପ୍ରତି ୩ମାସରେ ବ୍ଲକ, ଗ୍ରାମପଞ୍ଚାୟତସ୍ତରରେ ସଚେତନତା ସଭା କରାଯାଉଛି। ଶିଶୁ ବିକାଶ ପ୍ରକଳ୍ପ ଅଧିକାରୀ ସିଡିପିଓ, ପଞ୍ଚାୟତ ଏକ୍ଜିକ୍ୟୁଟିଭ୍ ଅଫିସର, ଓ୍ବାର୍ଡେନ୍/ମାଟ୍ରନ ଅଫ୍ ରେସିଡେନ୍ସିଆଲ୍ ହଷ୍ଟେଲଗୁଡ଼ିକୁ ବାଲ୍ୟବିବାହ ନିଷେଧ ଅଧିକାରୀ ଭାବେ ସୂଚିତ କରାଯାଇଛି। ଏଥିସହ ବିଦ୍ୟାଳୟ ଓ ଗଣଶିକ୍ଷା ବିଭାଗ/ଉଚ୍ଚଶିକ୍ଷା ବିଭାଗର ସମସ୍ତ ଅଧ୍ୟକ୍ଷ ଓ ପ୍ରଧାନ ଶିକ୍ଷକମାନଙ୍କୁ ବାଲ୍ୟବିବାହ ସୂଚନା ଅଧିକାରୀ ଭାବେ ସୂଚୀତ କରାଯାଇଥିବା ଘସିପୁରା ବିଧାୟକ ବଦ୍ରିନାରାୟଣ ପାତ୍ରଙ୍କ ପ୍ରଶ୍ନର ଉତ୍ତରରେ ଉପମୁଖ୍ୟମନ୍ତ୍ରୀ ଉଲ୍ଲେଖ କରିଛନ୍ତି।
ଏନେଇ ଶିଶୁ ଅଧିକାରୀ କର୍ମୀ ଘାସିରାମ ପଣ୍ଡା କହିଛନ୍ତି, ସରକାର ଏବେ ବାଲ୍ୟବିବାହକୁ ନେଇ ସଚେତନ ଅଛନ୍ତି। କିନ୍ତୁ ବିଧାନସଭାରେ ବାଲ୍ୟବିବାହର ଯେଉଁ ତଥ୍ୟ ରଖାଯାଇଛି, ବାସ୍ତବରେ ଓଡ଼ିଶାରେ ବାଲ୍ୟବିବାହ ହାର ଏହାଠାରୁ ଯଥେଷ୍ଟ ଅଧିକ। ତେଣୁ ଏନେଇ ସରକାରଙ୍କୁ ଆହୁରି କଡ଼ା ପଦକ୍ଷେପ ନେବାକୁ ପଡ଼ିବ। ତେବେ ଚଳିତ ମାସରେ ରାଜ୍ୟ ସରକାରଙ୍କ ପକ୍ଷରୁ ପ୍ରତ୍ୟେକ ଗ୍ରାମପଞ୍ଚାୟତ ସମ୍ପ୍ରସାରଣ ଅଧିକାରୀ ଏବଂ ଶିକ୍ଷକମାନଙ୍କୁ ନୂଆ କରି ବାଲ୍ୟବିବାହ ରୋକିବା ଦାୟିତ୍ୱ ପ୍ରଦାନ କରାଯାଇଛି। ଫଳରେ ତଦାରଖ ବ୍ୟବସ୍ଥା ଆହୁରି ସୁଦୃଢ ହୋଇପାରିବ। ଗତ ଅକ୍ଟୋବରରେ ସୁପ୍ରିମକୋର୍ଟ ବାଲ୍ୟବିବାହ ରୋକିବାକୁ ସ୍ବତନ୍ତ୍ର ପଦକ୍ଷେପ ନେବାକୁ ପ୍ରତ୍ୟେକ ରାଜ୍ୟକୁ ନିର୍ଦ୍ଦେଶାବଳୀ ଦେଇଛନ୍ତି। ନିର୍ଦ୍ଦେଶ ଅନୁଯାୟୀ, ପ୍ରତ୍ୟେକ ଜିଲାରେ ଅତି କମ୍ରେ ଜଣେ ବାଲ୍ୟ ବିବାହ ନିଷେଧ ଅଧିକାରୀ ଭାବେ ଦାୟିତ୍ୱ ନେବେ। ସେହିପରି ବିଦ୍ୟାଳୟଗୁଡ଼ିକରେ ଯୌନ ଶିକ୍ଷାର ପାଠ୍ୟକ୍ରମ ଯୋଡ଼ାଯିବା ଆବଶ୍ୟକ। କେବଳ କିଶୋରୀମାନଙ୍କୁ ଏଥିରେ ସାମିଲ ନ କରି ଉଭୟ କିଶୋର ଏବଂ ଅଭିଭାବକମାନଙ୍କ ସହ ଯୋଡ଼ି ହେବାକୁ ପଡ଼ିବ ବୋଲି ପଣ୍ଡା କହିଛନ୍ତି।
ଅପରପକ୍ଷେ ରାଜ୍ୟରେ ଗତ ୬ବର୍ଷ ମଧ୍ୟରେ ୩୨୮ଜଣ ଶିଶୁ ଶ୍ରମିକଙ୍କୁ ଉଦ୍ଧାର କରାଯାଇଥିବା ତଥ୍ୟ ମଧ୍ୟ ଉପମୁଖ୍ୟମନ୍ତ୍ରୀ ବିଧାନସଭାରେ ରଖିଛନ୍ତି। ସର୍ବାଧିକ ୪୦ଜଣ ଶିଶୁ ଶ୍ରମିକ ଝାରସୁଗୁଡାରୁ ଉଦ୍ଧାର ହୋଇଥିବାବେଳେ, ଖୋର୍ଦ୍ଧାରୁ ୩୫ଜଣ, କଟକରୁ ୨୯, ଗଞ୍ଜାମରୁ ୨୬ ଏପରି ମୋଟ ୩୨୮ଜଣ ଶିଶୁ ଶ୍ରମିକ ଉଦ୍ଧାର ହୋଇଛନ୍ତି। ଏନେଇ ଶିଶୁ ଅଧିକାର କର୍ମୀ ବେଣୁଧର ସେନାପତି କହିଛନ୍ତି, ରାଜ୍ୟରେ ଶିଶୁ ଶ୍ରମିକ ଆଇନ ଲାଗୁ ହୋଇପାରୁ ନାହିଁ। ପୋଲିସ କେସ୍ କରୁନି, କେବଳ ଡାଏରୀ ମେଣ୍ଟେନ କରିକି ଛାଡ଼ି ଦେଉଛି। ତେଣୁ ସ୍ଥିତିରେ ସୁଧାର ଆସୁନି। ୧୮ବର୍ଷ ପର୍ଯ୍ୟନ୍ତ ଶିକ୍ଷାକୁ ବାଧ୍ୟତାମୂଳକ ଏବଂ ମାଗଣା କରାଗଲେ ସ୍ଥିତିରେ କିଛିଟା ସୁଧାର ଆସିପାରେ। ପିଲାମାନଙ୍କୁ କେବଳ ଉଦ୍ଧାର କଲେ ହେବ ନାହିଁ, ସେମାନଙ୍କ ପାଇଁ ବିଧିବଦ୍ଧ ବ୍ୟବସ୍ଥା ଆଣିବା ଦରକାର। ଉଭୟ ସରକାର ଏବଂ ସାମାଜିକ ସଂଗଠନଗୁଡ଼ିକ ମିଳିତ ଭାବେ କାମ କରିବା ଦରକାର। କିଶୋର ନ୍ୟାୟ ଆଇନ୍ ୨୦୧୫ (ଧାରା ୭୯), ଶିଶୁ ଶ୍ରମିକ ନିରୋଧ ଆଇନ, ୨୦୧୬ (ଧାରା ୧୪)କୁ କଡ଼ାକଡ଼ି ଭାବେ ପାଳନ କରାଗଲେ ଶିଶୁ ଶ୍ରମିକ ପ୍ରଥା ବନ୍ଦ ହୋଇପାରିବ ବୋଲି ସେନାପତି କହିଛନ୍ତି।
