ବରଗଡ଼,୨୩।୫(ପ୍ରେମାନନ୍ଦ ଖମାରୀ)-ବରଗଡ଼ ଜିଲାରେ ରବିଧାନ ସଂଗ୍ରହ ପ୍ରକ୍ରିୟକୁ ଦିନକ ପରେ ୨ସପ୍ତାହ ପୂରିବ। କିନ୍ତୁ ଜିଲାରେ ଧାନ କିଣାବିକା ଶୀଥିଳ ହୋଇ ପଡ଼ିଛି। ମଣ୍ଡିକୁ ଧାନ ଆସୁଛି, ହେଲେ ମିଲର୍ସମାନେ ନିୟମିତ ଆସୁ ନାହାନ୍ତି। ଫଳରେ ମଣ୍ଡିରେ ସଂଗୃହୀତ ଧାନ ଅନୁପାତରେ ତାହା ବିକ୍ରି ଓ ଉଠାଣ ହୋଇପାରୁ ନାହିଁ। ଗତ ଖରିଫ ଧାନ, ଚାଉଲରେ ମିଲ୍ ଗୁଡ଼ିକର ଗୋଦାମ ଗୃହ ଭର୍ତ୍ତି ରହିଥିବା ମିଲର୍ସ କହୁଛନ୍ତି। ଅପରପକ୍ଷେ ଶନିବାର ଜିଲାର ଭଟଲି ଅଞ୍ଚଳର ଏକ ରାଇସ୍ ମିଲକୁ ଛତିଶଗଡ଼ ଧାନ ବୋଝେଇ ଟ୍ରକ(ନଂ-ସିଜି୧୩ଏପି ୪୯୦୦) ପଶିବା ସୂଚନା ପାଇବା ପରେ ସ୍ଥାନୀୟ ପୋଲିସ ସେହି ଧାନ ବୋଝେଇ ଟ୍ରକକୁ ସେଠାରୁ ଉଠାଇ ନେଇ ଥାନାରେ ଅଟକ ରଖିବା ଘଟଣା ବର୍ତ୍ତମାନ ଚର୍ଚ୍ଚାର ବିଷୟ ହୋଇଛି।
ଯୋଗାଣ ବିଭାଗର ଟିମ୍ ମଧ୍ୟ ଥାନାକୁ ପହଞ୍ଚି ସେନେଇ ତଦନ୍ତ ଆରମ୍ଭ କରିଛନ୍ତି। ଖବର ଲେଖାହେବା ସୁଦ୍ଧା(ରାତି ୯ଟା ପର୍ଯ୍ୟନ୍ତ) ସେହି ଧାନ ବୋଝେଇ ଟ୍ରକର କୌଣସି ଦାବିଦାର୍ ବାହାରି ନାହାନ୍ତି। ଏଥିରୁ ତାହା ଛତିଶଗଡ଼ ଧାନ ହୋଇଥିବା ନେଇ ସନ୍ଦେହ ଦୃଢ଼ିଭୂତ ହେବାରେ ଲାଗିଛି। ତେବେ ଏ ସମ୍ପର୍କରେ ସଦର ଏସିଏସଓ ବ୍ୟୋମକେଶ ମାଝୀଙ୍କୁ ପଚାରିବାରୁ ପୋଲିସ ସେହି ଧାନ ବୋଝେଇ ଟ୍ରକକୁ ଥାନାକୁ ଆଣିଛି। ଖବର ପାଇ ଯୋଗାଣ ବିଭାଗର ଟିମ୍ ଥାନାକୁ ପହଞ୍ଚି ଥିଲେ। ମାତ୍ର କୌଣସି ଦାବିଦାର ନ ଆସିବାରୁ ସେହି ଟ୍ରକରେ କେତେ ଧାନ ରହିଛି ଏବଂ ତାହା କେଉଁଠାରୁ ଆସିଥିବା ଜଣାପଡ଼ି ନାହିଁ। ଏ ନେଇ ଅଧିକ ତଦନ୍ତ ଚାଲିଥିବା ଏସିଏସଓ ମାଝୀ କହିଥିଲେ।
ସୂଚନା ଅନୁଯାୟୀ, ଉକ୍ତ ଧାନ ବୋଝେଇ ଟ୍ରକ ସମ୍ପୃକ୍ତ ରାଇସ୍ ମିଲକୁ ପ୍ରବେଶ କରିବା ପରେ ପୋଲିସ୍କୁ କେହି ସୂଚନା ଦେଇଥିଲେ। ସେହି ସୂଚନାକୁ ଆଧାର କରି ଭଟଲି ଥାନା ପୋଲିସ ରାଇସ୍ ମିଲକୁ ପହଞ୍ଚି ଥିଲା ଏବଂ ସେଠାରୁ ସମ୍ପୃକ୍ତ ଧାନ ବୋଝେଇ ଟ୍ରକକୁ ଥାନାକୁ ଉଠାଇ ଆଣିଥିଲା। ପୋଲିସଠାରୁ ଖବର ପାଇଁ ସଦର ଏସିଏସଓ ୍ଯଯୋମକେଶ ମାଝୀ, ଅମ୍ବାଭୋନା ଯୋଗାଣ ନିରୀକ୍ଷକ ପ୍ରଭାତ ପ୍ରଦୀପ୍ତ ଥାନାକୁ ପହଞ୍ଚିଥିଲେ ଏବଂ ତଦନ୍ତ ଆରମ୍ଭ କରିଥିଲେ। ମାତ୍ର ସେହି ଧାନ ବୋଝେଇ ଟ୍ରକର କେହି ଦାବିଦାର ନ ଆସିବାରୁ ତଦନ୍ତରେ ଅଗ୍ରଗତି ହୋଇ ପାରି ନଥିବା ଜଣାପଡ଼ିଛି। ଗୋଟିଏ ପଟେ କାର୍ଯ୍ୟାନୁଷ୍ଠାନ ଭୟରେ ଦାବିଦାର ଆସୁ ନଥିବାବେଳେ ଏହି ଘଟଣାରେ ପ୍ୟାଚଅପ୍ ମାରିବା ପାଇଁ ଉଦ୍ୟମ କରୁଥିବା ଏବଂ ଜାଣିଶୁଣି ଦାବିଦାର ଆସିବାରେ ବିଳମ୍ବ କରାଯାଉଥିବା ନେଇ ସାଧାରଣରେ ସନ୍ଦେହ ଉପୁଜିଛି।
