ଛତ୍ରପୁର (ଦିଲୀପ ସାମଲ), ୨୩।୫: ଗଞ୍ଜାମ ଜିଲା ଛତ୍ରପୁରର ଆରାଧ୍ୟ ଦେବୀ ମା’ ରାମାୟାଣାମ୍ମା ଠାକୁରାଣୀଙ୍କ ବାର୍ଷିକ ଯାତ୍ରା ଅବସରରେ ଏବେ ସାରା ସହର ଉତ୍ସବମୁଖର ହୋଇଉଠିଛି। ମା’ଙ୍କ ଅସ୍ଥାୟୀ ମଣ୍ଡପରେ ଦର୍ଶନ ପାଇଁ ଅବାଳ ବୃଦ୍ଧ ବନିତାଙ୍କ ଅପୂର୍ବ ଭିଡ଼ ଜମୁଛି। ପରମ୍ପରା ଅନୁଯାୟୀ, ପ୍ରତିଦିନ ସନ୍ଧ୍ୟାରେ ମା’ ସାହିକୁ ସାହି ବୁଲି ଭକ୍ତଙ୍କ ଠାରୁ ଭୋଗ ଗ୍ରହଣ କରୁଛନ୍ତି।
ମା’ଙ୍କ ଏହି ଭବ୍ୟ ଯାତ୍ରାରେ ମାନସିକଧାରୀମାନେ ବିଭିନ୍ନ ଦେବଦେବୀଙ୍କ ବେଶ ଧାରଣ କରି ସହର ପରିକ୍ରମା କରିବା ସହ ମା’ଙ୍କ ଆଶୀର୍ବାଦ ଭିକ୍ଷା କରୁଛନ୍ତି। ଏହି ପରିପ୍ରେକ୍ଷୀରେ ଶନିବାର ଦିନ ସହରରେ ମା’ଙ୍କ ଅତି ପ୍ରିୟ ‘ବାଘ ବେଶ’ ମୁଖ୍ୟ ଆକର୍ଷଣ ପାଲଟିଛି।
ମାନସିକଧାରୀମାନେ ନିଜକୁ ବାଘ ବେଶରେ ସୁସଜ୍ଜିତ କରି ବାଘ ପରି ଠାଣି, ଚାଲି ଓ ଗର୍ଜନ ସହ ନୃତ୍ୟ ପ୍ରଦର୍ଶନ କରୁଛନ୍ତି। ଚାଙ୍ଗୁ ବାଦ୍ୟର ତାଳେ ତାଳେ ବାଘ ସଦୃଶ ନାଚି ସେମାନେ ଦର୍ଶକଙ୍କୁ ମନ୍ତ୍ରମୁଗ୍ଧ କରୁଛନ୍ତି। ଏହି କ୍ରମରେ ସହରର ରିକାପଲ୍ଲୀ ସାହିର ବାସିନ୍ଦା କୁନାଲ ସେନାପତି ନିଜର ଦୀର୍ଘ ଦିନର ମାନସିକ ପୂର୍ଣ୍ଣ କରିବା ପାଇଁ ସର୍ବାଙ୍ଗରେ ରଙ୍ଗ ବୋଳି ଓ ମୁଣ୍ଡରେ ବାଘ ମୁଖା ପିନ୍ଧି ସହର ସାରା ବୁଲି ନୃତ୍ୟ ପ୍ରଦର୍ଶନ କରିଛନ୍ତି।
ଓଡ଼ିଶାର ଏହି ଅନନ୍ୟ ପରମ୍ପରା ଓ ଲୋକନୃତ୍ୟ ‘ବାଘ ନାଚ’ ତାର ସ୍ୱତନ୍ତ୍ରତା ପାଇଁ ସବୁଠି ଉଚ୍ଚ ପ୍ରଶଂସିତ ହୋଇଥିବା ବେଳେ, ଛତ୍ରପୁର ଯାତ୍ରାରେ ଏହା ଶ୍ରଦ୍ଧାଳୁଙ୍କୁ ବେଶ୍ ଆକୃଷ୍ଟ କରିଛି। ମା’ଙ୍କ ଏହି ପ୍ରିୟ ନୃତ୍ୟ ଦେଖିବା ପାଇଁ ସହରରେ ପ୍ରବଳ ଜନସମାଗମ ହେବା ସହ ସାରା ଅଞ୍ଚଳରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଛି।
