ସମ୍ବଲପୁର, ୨୪ା୭(ଶୁଭାଶିଷ ପାଢ଼ୀ): ମହାନଦୀ ପାଣିକୁ ନେଇ ଛତିଶଗଡ଼ ଏବଂ ଓଡ଼ିଶା ମଧ୍ୟରେ ଆନ୍ତଃରାଜ୍ୟ ଜଳ ବିବାଦ ଲାଗିରହିଛି। ମହାନଦୀର ଉପରମୁଣ୍ଡରେ ଛତିଶଗଡ଼ ଏକାଧିକ ବ୍ୟାରେଜ ନିର୍ମାଣ କରିଥିବାରୁ ତଳମୁଣ୍ଡରେ ଜଳ ପ୍ରବାହ ଠିକ୍ ଭାବେ ହୋଇପାରୁ ନାହିଁ। ବିଶେଷକରି ଅଣମୌସୁମୀ ସମୟରେ ମହାନଦୀ ଶୁଖିଲା ପଡ଼ୁଥିବାବେଳେ ମୌସୁମୀ ସମୟରେ ଛତିଶଗଡ଼ ମନଇଚ୍ଛା ଗେଟ ଖୋଲି ବନ୍ୟା ସ୍ଥିତି ସୃଷ୍ଟି କରୁଛି। ଉଭୟ ରାଜ୍ୟ ମଧ୍ୟରେ ଥିବା ଜଳ ବିବାଦ ସମାଧାନ ପାଇଁ ଟ୍ରିବ୍ୟୁନାଲ୍ ଗଠନ କରାଯାଇଥିଲେ ମଧ୍ୟ
କୌଣସି ନିଷ୍କର୍ଷ ବାହାରିପାରୁ ନାହିଁ। ବିଶେଷକରି ବନ୍ୟାଜଳ ପରିଚାଳନାକୁ ନେଇ ଉଭୟ ରାଜ୍ୟ ମଧ୍ୟରେ ସମନ୍ବୟର ଅଭାବ ରହୁଥିବାରୁ ବୈଠକ ମଧ୍ୟ ଠିକ୍ ଭାବେ ବସିପାରୁ ନାହିଁ। କେବଳ ଜ୍ଞାନକୌଶଳ, ଆଇଏମ୍ଡିର ପୂର୍ବସୂଚନା ଆଧାରରେ ଅନୁମାନ କରି ହୀରାକୁଦ ନଦୀବନ୍ଧ ଯୋଜନାର ଜଳ ପରିଚାଳନା କରାଯାଉଛି ବୋଲି ହୀରାକୁଦ ଡ୍ୟାମ ମୁଖ୍ୟଯନ୍ତ୍ରୀ ଆନନ୍ଦ ଚନ୍ଦ୍ର ସାହୁ କହିଛନ୍ତି।
ମୁଖ୍ୟଯନ୍ତ୍ରୀଙ୍କ କହିବା ହେଲା, ୨୦୧୯ ଅଗଷ୍ଟ ପରଠାରୁ ବନ୍ୟାଜଳ ନିଷ୍କାସନ ଓ ପରିଚାଳନା ନେଇ ଛତିଶଗଡ଼ ରାଜ୍ୟ ଅସହଯୋଗ କରିଆସୁଛି। ଦୀର୍ଘ ୪ବର୍ଷ ହେଲା ଛତିଶଗଡ଼ ଓ ଓଡ଼ିଶା ମଧ୍ୟରେ ସମନ୍ବୟ ରହୁନାହିଁ। ଜାତୀୟ ଡ୍ୟାମ୍ ସୁରକ୍ଷା କମିଟି କିମ୍ବା ଆନ୍ତଃରାଜ୍ୟ ଉପକମିଟି ବୈଠକ ଉଭୟ ରାଜ୍ୟ ଭିତରେ ହୋଇପାରୁ ନାହିଁ। ହୀରାକୁଦ ଡ୍ୟାମ୍ କର୍ତ୍ତୃପକ୍ଷ ବାରମ୍ବାର ବୈଠକ ପାଇଁ ଚିଠି କରିବା ପରେ ମଧ୍ୟ ଛତିଶଗଡ଼ ଉତ୍ତର ଦେଉନି କିମ୍ବା ବୈଠକ ବସିପାରୁନି। ଏପରି କି ଛତିଶଗଡ଼ରେ ଥିବା ଡ୍ୟାମ୍ଗୁଡ଼ିକର ଗେଟ୍ ଖୋଲିବା, ବର୍ଷା ପରିମାଣ, କେତେ ପରିମାଣ ପାଣି ଜଳଭଣ୍ଡାରକୁ ପ୍ରବେଶ କରିବ ସେ ନେଇ ଛତିଶଗଡ଼ ସୂଚନା ଦେଉନାହିଁ। ଜଳଭଣ୍ଡାରରେ ଜଳରଖିବା କ୍ଷମତା ଓ ସମୟକୁ ନେଇ ରୁଲକର୍ଭ ନିୟମ ରହିଛି। ମୁଖ୍ୟତଃ ବନ୍ୟା ନିୟନ୍ତ୍ରଣ ପାଇଁ ଏହି ନିୟମ ହୋଇଥିଲା। ହେଲେ ଛତିଶଗଡ଼ ଏହାର ଖୋଲା ଉଲ୍ଲଂଘନ କରୁଛି। ଏନେଇ ମହାନଦୀ ଟ୍ରିବ୍ୟୁନାଲ ନିକଟରେ ଅଭିଯୋଗ ହୋଇଥିବା ସାହୁ କହିଛନ୍ତି। ସୂଚନାଯୋଗ୍ୟ, ମହାନଦୀ ଜଳ ବିବାଦ ବହୁବର୍ଷ ହେବ ଲାଗି ରହିଛି। ଏହି ମାମଲା ଟ୍ରିବ୍ୟୁନାଲରେ ବିଚାରାଧୀନ ରହିଛି। ଟ୍ରିବ୍ୟୁନାଲର ଏକ ଟିମ୍ ଜୁନ୍ ମାସରେ ହୀରାକୁଦ ଜଳଭଣ୍ଡାର ଓ ପାରିପାର୍ଶ୍ୱିକ ସ୍ଥିତି ଏବଂ ଛତିଶଗଡ଼ର ବିଭିନ୍ନ ଜଳଭଣ୍ଡାର ଓ ପାରିପାର୍ଶ୍ୱିକ ସ୍ଥିତି ବୁଲି ରିପୋର୍ଟ ସଂଗ୍ରହ କରିଛନ୍ତି। ଏପରିସ୍ଥଳେ ଛତିଶଗଡ଼ ମନମାନି କରି ଚାଲିଛି। କେତେବେଳେ କଲ୍ମା ବ୍ୟାରେଜର ସମସ୍ତ ଗେଟ୍ ଖୋଲି ହୀରାକୁଦ ଡ୍ୟାମ୍ ପ୍ରତି ବିପଦ ସୃଷ୍ଟି କରୁଛି ତ କେତେବେଳେ ସବୁ ଗେଟ୍ ବନ୍ଦ କରିଦେଇ ଚିରସୋତ୍ରା ମହାନଦୀ ଶୁଖିଲା କରିଦେଉଛି। ଏହାକୁ ନେଇ ପରିବେଶବିତ୍, ରାଜନୈତିକ ଦଳ, ମହାନଦୀ ବଞ୍ଚାଓ ଅଭିଯାନ ନିନ୍ଦା କରିଆସୁଛନ୍ତି। ଏନେଇ ଛତିଶଗଡ଼ ଜଳସମ୍ପଦ ବିଭାଗ ଅଧିକାରୀଙ୍କ କୌଣସି ପ୍ରତିକ୍ରିୟା ମିଳିପାରି ନାହିଁ।
