ନୂଆଦିଲ୍ଲୀ, ୧୪।୨ : ଚେନ୍ନାଇଠାରେ ଚାଲିଥିବା ଦ୍ୱିତୀୟ ଟେଷ୍ଟର ପ୍ରଥମ ଦିନରୁ ହିଁ ସ୍ପିନରଙ୍କୁ ସହାୟତା ମିଳୁଛି। ୫ ଦିନିଆ ଟେଷ୍ଟର ଦ୍ୱିତୀୟ ଦିନ ସୁଦ୍ଧା ୨୧ଟି ଉଇକେଟ ପତନ ଘଟିଥିବାବେଳେ ସେଥିମଧ୍ୟରୁ ସ୍ପିନରଙ୍କ ହାତରେ ଲାଗିଛି ୧୬ଟି ଉଇକେଟ। ଏଥି ଯୋଗୁ ଚେପକ ପିଚ୍ ଚେନ୍ନାଇ ଟେଷ୍ଟ ଆୟୋଜନ କରିବା ଲାଗି ଉପଯୁକ୍ତ ନୁହେଁ। ଏଭଳି ମତ ଦେଇଛନ୍ତି ପୂର୍ବତନ ଇଂଲଣ୍ଡ ଅଧିନାୟକ ମାଇକେଲ ଭନ। କିନ୍ତୁ ଏଥିରେ ଅସହମତି ପ୍ରକାଶ କରିଛନ୍ତି ଅଷ୍ଟ୍ରେଲିଆର କିମ୍ବଦନ୍ତୀ ଲେଗ୍ ସ୍ପିନର ଶେନ ଓ୍ବର୍ନ।
” ଟେଷ୍ଟ କ୍ରିକେଟ ଏକ କୌତୁହଳପୂର୍ଣ୍ଣ ଫର୍ମାଟ। କିନ୍ତୁ ଚେନ୍ନାଇ ପିଚ୍ ଟେଷ୍ଟ ମ୍ୟାଚ୍ ପାଇଁ ଉପଯୁକ୍ତ ନୁହେଁ। ଭାରତୀୟ ଦଳ ମ୍ୟାଚ୍ରେ ଆଗୁଆ ଥିବାରୁ ମୁଁ ପିଚ୍କୁ ଦୋଷ ଦେଉ ନାହିଁ। କିନ୍ତୁ ୫ ଦିନିଆ ଟେଷ୍ଟ ମ୍ୟାଚ୍ ଲାଗି ଏଭଳି ପିଚ୍ ପ୍ରସ୍ତୁତ କରାଯିବା ଉଚିତ ନୁହେଁ “ ବୋଲି ଭନ ଟୁଇଟ୍ କରିଛନ୍ତି। ଏହାକୁ ରିଟୁଇଟ୍ କରି ଓ୍ବର୍ନ ଲେଖିଛନ୍ତି, ଏହି ମ୍ୟାଚ୍ ଅପେକ୍ଷା ପ୍ରଥମ ଟେଷ୍ଟରେ ଟସ୍ ଜିତି ପ୍ରଥମେ ବ୍ୟାଟିଂ କରିବା ଗୁରୁତ୍ୱପୂର୍ଣ୍ଣ ଥିଲା। କାରଣ ସେହି ପିଚ୍ରେ ପ୍ରଥମ ଦୁଇ ଦିନରେ ସ୍ପିନର କିମ୍ବା ପେସରଙ୍କୁ ମିଳି ନ ଥିଲା କୌଣସି ସହାୟତା। ଏହାପରେ ଆରମ୍ଭ କରିଥିଲା ପିଚ୍ ଭାଙ୍ଗିବା। ଆଉ ଦ୍ୱିତୀୟ ଟେଷ୍ଟ ଖେଳାଯାଉଥିବା ପିଚ୍ରେ ଭାରତୀୟ ଦଳକୁ ୨୨୦ ରନ୍ ମଧ୍ୟରେ ସୀମିତ ରଖିବାର ଥିଲା। ସ୍ପିନ କିମ୍ବା ବାଉନ୍ସରେ କୌଣସି ପାର୍ଥକ୍ୟ ନାହିଁ। ଏହି ପିଚ୍ରେ କେଉଁ ଭଳି ଖେଳିବାକୁ ପଡ଼େ, ତାହା ରୋହିତ ଦେଖାଇଛନ୍ତି।
