ନୂଆଦିଲ୍ଲୀ,୨୮।୪ : ଆଇପିଏଲର ୩ ଥର ବିଜେତା ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଏଥର ମଧ୍ୟ ଚାମ୍ପିୟନ ଭଳି ଖେଳୁଛି। ଅରୁଣ ଜେଟଲି ଗ୍ରାଉଣ୍ଡରେ ବୁଧବାର ଖେଳାଯାଇଥିବା ମ୍ୟାଚ୍ରେ ସନରାଇଜର୍ସ ହାଇଦ୍ରାବାଦକୁ ଅତି ସହଜରେ ୭ ଉଇକେଟରେ ହରାଇ ଦେଇଛି ସିଏସ୍କେ। ଚଳିତ ସିଜନରେ ଏହା ଦଳର କ୍ରମାଗତ ୫ମ ବିଜୟ। ଏହା ସହିତ ଦଳ ପୁଣି ଥରେ ପଏଣ୍ଟ ଟେବୁଲର ଶୀର୍ଷକୁ ଉଠିଛି। ଅନ୍ୟପକ୍ଷରେ ୬ ମ୍ୟାଚ୍ରେ ହାଇଦ୍ରାବାଦର ଏହା ୫ମ ପରାଜୟ।
ପ୍ରଥମେ ବ୍ୟାଟିଂ କରିଥିବା ହାଇଦ୍ରାବାଦ ପାଇଁ ଅଧିନାୟକ ଡେଭିଡ୍ ଓ୍ବାର୍ନର (୫୭ ରନ୍, ୩ ଚୌକା ଓ ୨ ଛକା) ଓ ମନୀଷ ପାଣ୍ଡେ (୬୧ ରନ୍, ୫ ଚୌକା ଓ ୧ ଛକା) ଖେଳିଥିଲେ ଅର୍ଦ୍ଧଶତକୀୟ ପାଳି। ହେଲେ ଦୁହିଁଙ୍କୁ ହାତ ଖୋଲିବାକୁ ଦେଇ ନ ଥିଲେ ସିଏସ୍କେ ବୋଲର ଓ ଫିଲ୍ଡରମାନେ। ମାତ୍ର ଶେଷ ଆଡ଼କୁ କେନ ଓ୍ବିଲିୟମସନ ଖେଳିଥିଲେ ଛୋଟ ହେଲେ ବିସ୍ଫୋରକ ୨୬ ରନ୍ର ଇନିଂସ। ତାଙ୍କୁ ସହଯୋଗ କରିଥିଲେ କେଦାର ଯାଦବ (୧୨)। ଫଳରେ ହାଇଦ୍ରାବାଦ୍ ୩ ଉଇକେଟ ହରାଇ ୧୭୧ ରନ୍ କରିପାରିଥିଲା।
କିନ୍ତୁ ଏହାକୁ ଅତ୍ୟନ୍ତ ସାଧାରଣ ଟାର୍ଗେଟରେ ପରିଣତ କରି ଦେଇଥିଲେ ଫାଫ ଡୁ’ ପ୍ଲେସି ଓ ରୁତୁରାଜ ଗାଏକ୍ୱାଡଙ୍କ ଓପନିଂ ଯୋଡ଼ି। ଦୁହେଁ ୧୩ ଓଭରରେ ଯୋଡ଼ି ଥିଲେ ୧୨୯ ରନ୍। ପରେ ଦଳ କ୍ରମାଗତ ବ୍ୟବଧାନରେ ହରାଇଥିଲା ୩ ଉଇକେଟ। ହେଲେ ସେତେବେଳକୁ ମ୍ୟାଚ୍ରେ ଆଉ କିଛି ନ ଥିଲା। ସିଏସ୍କେ ୧୮.୩ ଓଭରରେ ୩ ଉଇକେଟ ହରାଇ ହାସଲ କରି ନେଇଥିଲା ବିଜୟ ଲକ୍ଷ୍ୟ। ଦଳ ପାଇଁ ଗାଏକ୍ୱାଡ ୭୫ (୧୨ ଚୌକା) ଓ ଡୁ’ ପ୍ଲେସି ୫୬ (୬ ଚୌକା ଓ ଗୋଟିଏ ଛକା) ରନ୍ କରିଥିଲେ। ହାଇଦ୍ରାବାଦ୍ ପାଇଁ ରଶିଦ ଖାନ ହାତେଇଥିଲେ ୩ ଉଇକେଟ।
