ନୂଆଦିଲ୍ଲୀ,୩୧।୧୨ : ଜାତୀୟ ଅନୁସନ୍ଧାନ ଏଜେନ୍ସି ’ଏନଆଇଏ’ ୨୦୨୨ ମସିହାରେ ଜିହାଦି ଆତଙ୍କବାଦକୁ ଏକ ବଡ ଝଟକା ଦେଇଛି। ଗତ କିଛି ବର୍ଷ ତୁଳନାରେ, ଚଳିତ ବର୍ଷ ଏନଆଇଏ ଆତଙ୍କବାଦ ସହ ଜଡିତ ସର୍ବାଧିକ ମାମଲା ଅନୁସନ୍ଧାନ କରିଛି। ୨୦୨୨ମସିହାରେ ୩୬୫ ଦିନ ମଧ୍ୟରେ, ଏନଆଇଏ ୭୩ ଟି ମାମଲା ରୁଜୁ କରିଛି। ପୂର୍ବ ବର୍ଷଗୁଡିକରେ ଏହି ସଂଖ୍ୟା ୬୧ ରୁ କମ ଥିଲା। ବିଶେଷ କଥା ହେଉଛି ଏଥର ପଞ୍ଜୀକୃତ ହୋଇଥିବା ୭୩ ଟି ମାମଲା ଅନୁଯାୟୀ, ଜିହାଦି ଆତଙ୍କ ସହ ଜଡିତ ମାମଲାରେ ଅନୁସନ୍ଧାନକାରୀ ସଂସ୍ଥା ନିଜର ସାହସିକତା ପ୍ରଦର୍ଶନ କରିଛି। ଚଳିତ ବର୍ଷ ବିଭିନ୍ନ ମାମଲାରେ ୩୬୮ ଅଭିଯୁକ୍ତଙ୍କ ବିରୋଧରେ ୫୯ ଟି ଚାର୍ଜଶିଟ ଦାଖଲ କରାଯାଇଛି। ଏହି ମାମଲାରେ ଦୋଷୀ ସାବ୍ୟସ୍ତ ହାର ୯୪.୩୯ ପ୍ରତିଶତ ରହିଛି।
ଜାତୀୟ ଅନୁସନ୍ଧାନ ଏଜେନ୍ସି ୨୦୨୧ ବର୍ଷରେ ୬୧ ଟି ମାମଲା ରୁଜୁ କରିଥିଲା। ୨୦୨୨ ବର୍ଷ ପଞ୍ଜୀକରଣ ମାମଲାରେ ୧୯.୬୭ ପ୍ରତିଶତ ବୃଦ୍ଧି ଘଟିଛି। ଏନଆଇଏ ଦ୍ୱାରା ପଞ୍ଜୀକୃତ ୭୩ ଟି ମାମଲା ମଧ୍ୟରୁ ଜିହାଦି ଆତଙ୍କ ସମ୍ବନ୍ଧରେ ୩୫ ଟି ମାମଲା ରୁଜୁ ହୋଇଛି। ଯେଉଁ ରାଜ୍ୟରେ ଜିହାଦି ଆତଙ୍କବାଦୀ ମାମଲା ରୁଜୁ ହୋଇଛି ସେଥି ମଧ୍ୟରେ ଜମ୍ମୁ-କଶ୍ମୀର, ଆସାମ, ବିହାର, ଦିଲ୍ଲୀ, କର୍ନାଟକ, କେରଳ, ମଧ୍ୟପ୍ରଦେଶ, ମହାରାଷ୍ଟ୍ର, ରାଜସ୍ଥାନ, ତାମିଲନାଡୁ, ତେଲେଙ୍ଗାନା ଏବଂ ପଶ୍ଚିମବଙ୍ଗ ଅନ୍ତର୍ଭୁକ୍ତ।
ଜମ୍ମୁ-କଶ୍ମୀରରେ ୧୧ ଟି ମାମଲା ରୁଜୁ ହୋଇଥିଲା। ନକ୍ସଲ ପ୍ରଭାବିତ ଅଞ୍ଚଳରେ ୧୦ ଟି ମାମଲା, ଉତ୍ତର ପୂର୍ବରେ ୫ ଟି ମାମଲା, ପିଏଫଆଇ ସମ୍ବନ୍ଧୀୟ ୭ ଟି ମାମଲା ପଞ୍ଜିକୃତ ହୋଇଥିଲା। ପଞ୍ଜାବରେ ଚାରୋଟି ମାମଲା ପଞ୍ଜୀକୃତ ହୋଇଥିଲା। ଏହା ବ୍ୟତୀତ ଗ୍ୟାଙ୍ଗଷ୍ଟର, ଆତଙ୍କବାଦୀ ଏବଂ ଚୋରା ଚାଲାଣକାରୀଙ୍କ ସମ୍ପର୍କରେ ତିନୋଟି ମାମଲା ରୁଜୁ କରାଯାଇଥିଲା। ଆତଙ୍କବାଦୀଙ୍କୁ ପାଣ୍ଠି ଯୋଗାଣର ଗୋଟିଏ ମାମଲା ଏବଂ ନକଲି ଭାରତୀୟ ମୁଦ୍ରା ନୋଟ ଏଫଆଇସିଏନର ଦୁଇଟି ମାମଲା ପଞ୍ଜୀକୃତ ହୋଇଥିଲା।
୨୦୨୨ ବର୍ଷରେ ଏନଆଇଏ ୪୫୬ ଅଭିଯୁକ୍ତଙ୍କୁ ଗିରଫ କରିଛି। ଏଥିମଧ୍ୟରେ ୧୯ ଜଣ ପଳାତକ ଅନ୍ତର୍ଭୁକ୍ତ। ଦୁଇ ଅଭିଯୁକ୍ତଙ୍କୁ ଦେଶରୁ ବିତାଡିତ କରାଯାଇଛି। ଜଣେ ଅଭିଯୁକ୍ତଙ୍କୁ ପ୍ରତ୍ୟର୍ପଣ କରାଯାଇଛି। ଚଳିତ ବର୍ଷ ୩୮ ଟି ମାମଲାରେ କୋର୍ଟଙ୍କ ନିଷ୍ପତ୍ତି ଆସିଛି। ସମସ୍ତଙ୍କୁ ଦୋଷୀ ସାବ୍ୟସ୍ତ କରାଯାଇଛି। ୧୦୯ ଜଣଙ୍କୁ କଠୋର ଦଣ୍ଡ ଦିଆଯାଇଛି। ସେମାନଙ୍କୁ ମଧ୍ୟ ଜରିମାନା କରାଯାଇଛି। ୬ଜଣଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଛି। ୟୁଏପିଏ ଅଧୀନରେ ଆଠ ଜଣଙ୍କୁ ଆତଙ୍କବାଦୀ ଭାବେ ଘୋଷଣା କରାଯାଇଛି।
