ନୂଆଦିଲ୍ଲୀ,୫ା୮: ଭାରତୀୟ ମହାକାଶ ଗବେଷଣା ସଂଗଠନ (ଇସ୍ରୋ)ର ଚନ୍ଦ୍ରୟାନ ମିଶନ ଶନିବାର ଚନ୍ଦ୍ରର ପ୍ରଭାବ କ୍ଷେତ୍ର ମଧ୍ୟରେ ପ୍ରବେଶ କରିବ। ଗତ ୧ ତାରିଖରେ ଏହା ପୃଥିବୀ କକ୍ଷ ଛାଡ଼ି ଚନ୍ଦ୍ରକକ୍ଷ ଅଭିମୁଖେ ଅଗ୍ରସର ହୋଇଥିଲା। ତେବେ ଏହି ମିଶନର ସଫଳତା ଏକ କଠିନ ପର୍ଯ୍ୟାୟ- ଚନ୍ଦ୍ର କକ୍ଷରେ ପ୍ରବେଶ ଉପରେ ନିର୍ଭର କରୁଛି। ଏଥିପାଇଁ ଚନ୍ଦ୍ରୟାନର ବେଗ କମାଇବାକୁ ଅତ୍ୟନ୍ତ ସତର୍କତାର ସହିତ ଯୋଜନାବଦ୍ଧ ଭାବେ ମାନେଭର କରିବାକୁ ପଡ଼ିବ, ଯେପରି ଚନ୍ଦ୍ରର ମାଧ୍ୟାକର୍ଷଣ କ୍ଷେତ୍ର ଏହାକୁ ସ୍ଥାୟୀ ଚନ୍ଦ୍ରକକ୍ଷ ମଧ୍ୟକୁ ଟାଣିପାରିବ। ଯଦି ଏହା ଚନ୍ଦ୍ରର ମାଧ୍ୟାକର୍ଷଣକୁ ଧରିବାରେ ବିଫଳ ହୁଏ ତେବେ ଉଲ୍ଲେଖନୀୟ ପରିଣାମ ଘଟିପାରେ। ମହାକାଶ ଯାନ ହୁଏତ ଚନ୍ଦ୍ରରେ ଧକ୍କା ଲାଗିପାରେ କିମ୍ବା ପୃଥିବୀର ମାଧ୍ୟାକର୍ଷଣ ଯୋଗୁ ଏହା ଚନ୍ଦ୍ରଠାରୁ ଦୂରେଇଯାଇପାରେ ବୋଲି କୁହାଯାଇଛି। ସେହିପରି ଚନ୍ଦ୍ରୟାନ ପୃଥିବୀକୁ ଫେରନ୍ତା ଯାତ୍ରା କଲାବେଳେ ଏହା ଉପରେ ଉଭୟ ପୃଥିବୀ ଓ ଚନ୍ଦ୍ରର ମାଧ୍ୟାକର୍ଷଣ ଶକ୍ତିର ପ୍ରଭାବ ରହିବ। ଯଦି ମହାକାଶ ଯାନର ଅର୍ବିଟ ଚନ୍ଦ୍ର ପୃଷ୍ଠଠାରୁ ଅତି ନିକଟତର ହୁଏ, ତେବେ ଚନ୍ଦ୍ର ଏହାକୁ ଟାଣିନେଇ ଦୁର୍ଘଟଣା ଘଟାଇପାରେ। ଯଦି ଏହା ଚନ୍ଦ୍ରଠାରୁ ଅଧିକ ଦୂରରେ ରହେ, ତେବେ ପୃଥିବୀର ମାଧ୍ୟାକର୍ଷଣ ଏହାକୁ ଚନ୍ଦ୍ରଠାରୁ ସମ୍ପୂର୍ଣ୍ଣ ଅଲଗା କରିଦେବ। ପୃଥିବୀର ମାଧ୍ୟାକର୍ଷଣ ବିନା ମହାକାଶ ଯାନ ମହାକାଶରେ ଝୁଲିରହିବ। ଏଭଳି ସ୍ଥିତିରେ ଇସ୍ରୋ ମହାକାଶ ଯାନ ଉପରେ ପୁନର୍ବାର ନିୟନ୍ତ୍ରଣ ରଖି ଏହକୁ ପୃଥିବୀକୁ ଫେରାଇ ଆଣିବା ଲାଗି ଉଦ୍ୟମ କରିପାରେ। ଏଥିରେ ହିସାବ ଏବଂ ସମୟ ଆକଳନରେ ସାମାନ୍ୟ ତ୍ରୁଟି ହେଲେ ଜଟିଳ ସମସ୍ୟା ସୃଷ୍ଟି ହୋଇପାରେ। ଭୁଲ୍ ଆକଳନ ଯୋଗୁ ଏହା ପୃଥିବୀ କିମ୍ବା ଚନ୍ଦ୍ରରେ ଧକ୍କା ହୋଇପାରେ ବୋଲି କୁହାଯାଉଛି।
