ଚେନ୍ନାଇ, ୩୦।୪: ଆଇପିଏଲ୍ ୨୦୨୫ରେ ପଞ୍ଜାବ କିଙ୍ଗ୍ସର ସ୍ପିନ୍ ମାଷ୍ଟର ଯୁଜବେନ୍ଦ୍ର ଚହଲ ଚେନ୍ନାଇ ସୁପର କିଙ୍ଗ୍ସ (ସିଏସକେ) ବିପକ୍ଷରେ ଭୟଙ୍କର ପ୍ରଦର୍ଶନ କରି ମ୍ୟାଚକୁ ଓଲଟପାଲଟ କରିଦେଇଛନ୍ତି। ଏମ୍. ଚିନ୍ନାସ୍ୱାମୀ ଷ୍ଟାଡିୟମରେ ଚହଲ ଗୋଟିଏ ଓଭରରେ ହ୍ୟାଟ୍ରିକ୍ ସହିତ ମୋଟ ୪ଟି ୱିକେଟ୍ ଝଡ଼ାଇ ଚେନ୍ନାଇର ବ୍ୟାଟିଂ ମେରୁଦଣ୍ଡକୁ ଭାଙ୍ଗି ପକାଇଛନ୍ତି।
ଚେନ୍ନାଇର ଏମ୍.ଏ. ଚିଦାମ୍ବରମ ଷ୍ଟାଡିୟମରେ ଖେଳ ଯାଇଥିବା ଏହି ମ୍ୟାଚରେ ସାମ କରନଙ୍କ ୪୭ ବଲରେ ୮୮ ରନ୍ର ଚମତ୍କାର ଇନିଂସ ସତ୍ତ୍ୱେ, ଚହଲଙ୍କ ଗୋଟିଏ ଓଭରରେ ୪ ୱିକେଟ୍ ନେବା ଚେନ୍ନାଇକୁ ୧୯.୨ ଓଭରରେ ୧୯୦ ରନ୍ରେ ଅଲଆଉଟ୍ କରିଦେଇଛି।
କରନଙ୍କ ଇନିଂସରେ ୯ଟି ଚୌକା ଓ ୪ଟି ଛକା ସାମିଲ ଥିଲା। ଏକ ପର୍ଯ୍ୟାୟରେ ଚେନ୍ନାଇ ୨୦୦ ରନ୍ ପାର କରିବା ନିଶ୍ଚିତ ମନେ ହେଉଥିଲା। କିନ୍ତୁ, ଚହଲଙ୍କ ୧୯ତମ ଓଭର ମ୍ୟାଚର ଚିତ୍ର ବଦଳାଇ ଦେଲା। ଏହି ଓଭରରେ ସେ ସମସ୍ତ ୱିକେଟ୍ ନେଇଥିଲେ। ଲେଗ୍-ସ୍ପିନର ଚହଲ ନିଜର ୪ ଓଭରରେ ୩୨ ରନ୍ ଦେଇ ୪ଟି ୱିକେଟ୍ ହାସଲ କରିଥିଲେ।
ଏହା ପୂର୍ବରୁ ସାମ କରନ ଓ ଡେୱାଲ୍ଡ ବ୍ରେଭିସ ଚତୁର୍ଥ ୱିକେଟ୍ ପାଇଁ ୭୮ ରନ୍ର ଦୃଢ଼ ଭାଗୀଦାରୀ କରି ଚେନ୍ନାଇକୁ ୫.୫ ଓଭରରେ ୪୮/୩ରୁ ପୁନରୁଦ୍ଧାର କରାଇଥିଲେ। ଦଳ ୧୯ତମ ଓଭର ପର୍ଯ୍ୟନ୍ତ ମଜଭୂତ ଗତିରେ ଆଗେଇ ଚାଲିଥିଲା, କିନ୍ତୁ ଚହଲଙ୍କ ଏହି ଓଭର ସିଏସକେକୁ ସମ୍ପୂର୍ଣ୍ଣ ଧରାଶାୟୀ କରିଦେଇଥିଲା।
