ନୂଆଦିଲ୍ଲୀ,୧୧।୭ : ଜିପିଆରଏ ଅଧୀନରେ ଥିବା ସରକାରୀ ଘର ପାଇଁ କେନ୍ଦ୍ର ସରକାରୀ କର୍ମଚାରୀ ଏବଂ ଅଧିକାରୀମାନଙ୍କୁ ଅଧିକ ଘରଭଡ଼ା ଦେବାକୁ ପଡ଼ିବ। ମୁଦ୍ରାସ୍ଫୀତିର ସମୟରେ କେନ୍ଦ୍ର ସରକାର ମଧ୍ୟ ଏହାର ଘରଭଡ଼ା ହାରକୁ ସଂଶୋଧନ କରିଛନ୍ତି । ଜୁଲାଇ ୧ ରୁ ନୂତନ ହାର ଲାଗୁ କରାଯାଇଛି।
ଏହାପୂର୍ବରୁ ୨୦୨୦ ରେ, ସାଧାରଣ ପୁଲ ଆବାସିକ ଆବାସ ଅଧୀନରେ ଆବଣ୍ଟିତ ଘରଗୁଡିକର ଭଡା ବୃଦ୍ଧି କରାଯାଇଥିଲା। ପ୍ରତିରକ୍ଷା ମନ୍ତ୍ରଣାଳୟ ଅଧୀନରେ ଆସୁଥିବା ଗୃହ ଏବଂ ରେଳ କ୍ୱାର୍ଟର୍ସ ସଂଶୋଧିତ ହାର ତାଲିକାରେ ଅନ୍ତର୍ଭୁକ୍ତ ନୁହେଁ। ଏହାର କାରଣ ହେଉଛି, ଏହି ଉଭୟ ବିଭାଗର ନିଜସ୍ବ ବାସସ୍ଥାନ ଅଛି। ତେଣୁ ସେମାନଙ୍କର କର୍ମଚାରୀମାନେ ସାଧାରଣ ପୁଲ ଆବାସିକ ଆବାସର ସଂଶୋଧିତ ହାର ଦ୍ୱାରା ପ୍ରଭାବିତ ହେବେ ନାହିଁ।
ଦେଶର ବିଭିନ୍ନ ସହରରେ କେନ୍ଦ୍ରୀୟ କର୍ମଚାରୀଙ୍କ ପାଇଁ ଜିପିଆରଏ ଅଧୀନରେ ଗୃହ ବଣ୍ଟନ କରାଯାଇଛି ।
ଏହା ବ୍ୟତୀତ, ଯଦି ଜଣେ ଅଧିକାରୀ ସେବକ କ୍ୱାଟର୍ର୍ ନିଅନ୍ତି, ତେବେ ତାଙ୍କୁ ମାସକୁ ୯୦ଟଙ୍କା ଦେବାକୁ ପଡିବ। ସେହିଭଳି ଗ୍ୟାରେଜ ପାଇଁ ମାସକୁ ୬୦ ଟଙ୍କା ଦେବାକୁ ପଡିବ।
କେନ୍ଦ୍ର ସରକାରୀ ହଷ୍ଟେଲଗୁଡ଼ିକର ହାରରେ ମଧ୍ୟ ପରିବର୍ତ୍ତନ କରାଯାଇଛି। ଯଦି ୨୧.୫ ରୁ ୩୦ ବର୍ଗ ମିଟର ବିଶିଷ୍ଟ କୋଠରୀ, ଯାହାର ରୋଷେଇ ଘର ନାହିଁ, ତେବେ ଏଥି ପାଇଁ ମାସକୁ ୫୫୦ ଟଙ୍କା ଦେବାକୁ ପଡିବ। ଯଦି ୩୦.୫ ରୁ ୩୯.୫ ବର୍ଗ ମିଟର କ୍ଷେତ୍ର ବିଶିଷ୍ଟ ଏକ କୋଠରୀକୁ ରୋଷେଇ ଘର ସହିତ ନିଆଯାଏ, ତେବେ ଏନେଇ ପ୍ରତି ମାସରେ ୭୮୦ ଟଙ୍କା ଖର୍ଚ୍ଚ ହେବ । ୪୭.୫ରୁ ୬୦ ବର୍ଗ ମିଟରର ଏକ ଡବଲ ରୁମ ପାଇଁ ୧୦୭୦ ଟଙ୍କା ଦେବାକୁ ପଡିବ।
