ନୂଆଦିଲ୍ଲୀ,୧୪ା୧: ବହୁକୋଟି ଟଙ୍କାର ଚିଟ୍ଫଣ୍ଡ ଠକେଇ ମାମଲାର ଉଚ୍ଚସ୍ତରୀୟ ତଦନ୍ତ ସହ କ୍ଷତିଗ୍ରସ୍ତ ଜମାକାରୀଙ୍କୁ କ୍ଷତିପୂରଣ ପ୍ରଦାନ ଦାବିରେ ଓଡ଼ିଶାର ପିନାକ ପାଣି ମହାନ୍ତି ସୁପ୍ରିମକୋର୍ଟରେ ପିଟିଶନ ଦାଖଲ କରିଛନ୍ତି। ତାଙ୍କ ଆବେଦନ ଉପରେ ୨ ଜଣିଆ ଖଣ୍ଡପୀଠ କେନ୍ଦ୍ର ସରକାରଙ୍କୁ ଜବାବ ମାଗିଥିଲେ। ସହଯୋଗ ମନ୍ତ୍ରଣାଳୟ ପକ୍ଷରୁ ଶୁକ୍ରବାର ସର୍ବୋଚ୍ଚ ଅଦାଲତରେ ଷ୍ଟାଟସ୍ ରିପୋର୍ଟ ଦାଖଲ କରାଯାଇଛି। ଏଥିସହ ମନ୍ତ୍ରଣାଳୟ ଉକ୍ତ ମାମଲାରେ ନିଜେ ପକ୍ଷଭୁକ୍ତ ହେବା ପାଇଁ ଏକ ଇମ୍ପ୍ଲିଡ୍ମେଣ୍ଟ ଆପ୍ଲିକେଶନ ମଧ୍ୟ ଦାଖଲ କରିଛି।
ସରକାରୀ ଓକିଲ ଅଦାଲତଙ୍କୁ ଅନୁରୋଧ କରିଥିଲେ ଯେ ଷ୍ଟାଟସ୍ ରିପୋର୍ଟ ଆଧାରରେ ସହଯୋଗ ମନ୍ତ୍ରଣାଳୟ କେତେକ ସୁପାରିସ କରିବାକୁ ଚାହୁଁଛି। ଏହି ପ୍ରସଙ୍ଗରେ ସୋମବାର ଶୁଣାଣି କରାଯାଉ। ଜଷ୍ଟିସ ଏମ୍.ଆର୍. ଶାହା ଏବଂ ସି.ଟି. ରବିକୁମାର ମନ୍ତ୍ରଣାଳୟର ଆପ୍ଲିକେଶନକୁ ଗ୍ରହଣ କରିଛନ୍ତି। ଜନସାଧାରଣଙ୍କ ବୃହତ୍ ସ୍ବାର୍ଥ ଦୃଷ୍ଟିରୁ ମନ୍ତ୍ରଣାଳୟର ପରାମର୍ଶଗୁଡ଼ିକୁ ଅନୁଧ୍ୟାନ କରିବା ବୋଲି ଖଣ୍ଡପୀଠ କହିଛନ୍ତି। ଏହା ପୂର୍ବରୁ ଜାନୁୟାରୀ ୪ରେ ଚିଟ୍ଫଣ୍ଡ ଠକେଇ ମାମଲାରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)ର ତଦନ୍ତରେ ମନ୍ଥରତାକୁ ନେଇ ଖଣ୍ଡପୀଠ ଭର୍ତ୍ସନା କରିଥିଲେ। ଯେତେବେଳେ କୌଣସି ଆର୍ଥତ୍କ ଦୁର୍ନୀତି ମାମଲାର ତଦନ୍ତ ସିବିଆଇ ଏବଂ ପ୍ରବର୍ତ୍ତନ ନିର୍ଦ୍ଦେଶାଳୟକୁ ଦିଆଯାଏ ଏହି ଦୁଇ କେନ୍ଦ୍ରୀୟ ସଂସ୍ଥାର ଦୁର୍ବଳତା ସାମ୍ନାକୁ ଆସିଥାଏ। ଏଯାଏ କେତୋଟି ଆର୍ଥତ୍କ ଅନିୟମିତତା ମାମଲାର ତଦନ୍ତ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି ବୋଲି ଅଦାଲତ ପ୍ରଶ୍ନ କରିଥିଲେ। ପ୍ରକାଶ ଯେ, ଓଡ଼ିଶା ସମେତ ପଶ୍ଚିମବଙ୍ଗ, ତ୍ରିପୁରା ଓ ଆସାମରେ ଲୋକଙ୍କଠାରୁ ଚିଟ୍ଫଣ୍ଡ ସଂସ୍ଥାଗୁଡ଼ିକ ପ୍ରାୟ ୧୦ ହଜାର କୋଟି ଟଙ୍କା ଲୁଟି ନେଇଥିବା ଅଭିଯୋଗ ଆଣି ପିନାକ ପାଣି ଜନସ୍ବାର୍ଥ ମାମଲା କରିଛନ୍ତି। ହାଇକୋର୍ଟ କିମ୍ବା ସୁପ୍ରିମକୋର୍ଟଙ୍କ ଜଣେ କାର୍ଯ୍ୟରତ ବିଚାରପତିଙ୍କ ଅଧୀନରେ ସର୍ବୋଚ୍ଚ ଅଦାଲତ ଏକ ଜଣିକିଆ କମିଶନ/ଷ୍ଟାଣ୍ଡିଂ କମିଟି ଗଠନ କରନ୍ତୁ ବୋଲି ସେ ଏଥିରେ ନିବେଦନ କରିଥିଲେ।
