ସମ୍ବଲପୁର,୨୫।୧୨(ବ୍ୟୁରୋ): ସମ୍ବଲପୁର ସହର ଏବଂ ଗ୍ରାମାଞ୍ଚଳରେ ରବିବାର ବଡ଼ଦିନ ପର୍ବ ଆଡ଼ମ୍ବର ସହ ପାଳିତ ହୋଇଯାଇଛି। କରୋନା କଟକଣା ଯୋଗୁ ଗତ ଦୁଇ ବର୍ଷ ନିରାଡ଼ମ୍ବର ଭାବେ ଖ୍ରୀଷ୍ଟଧର୍ମାବଲମ୍ବୀମାନେ ବଡ଼ଦିନ ପାଳନ କରିଥିଲେ। ତେଣୁ ଚଳିତ ବର୍ଷ ହର୍ଷଉଲ୍ଲାସର ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ଏହି ପର୍ବ ପାଳନ କରାଯାଇଛି। ଚର୍ଚ୍ଚଗୁଡ଼ିକୁ ରଙ୍ଗବେରଙ୍ଗର ଆଲୋକମାଳାରେ ସଜ୍ଜିତ କରାଯାଇଛି। ଏନେଇ ଚର୍ଚ୍ଚ ପରିସର ସୁନେଲି, ରୌପ୍ୟ, ସବୁଜ, ନୀଳରେ ଝଲସି ଉଠୁଛି।
ଅପରାହ୍ନ ପ୍ରାର୍ଥନା ଶେଷ ପରେ ଖ୍ରୀଷ୍ଟଧର୍ମାବଲମ୍ବୀମାନେ ପରସ୍ପରକୁ ଆଲିଙ୍ଗନ କରି ବଡ଼ଦିନର ଶୁଭେଚ୍ଛା ଜଣାଇଥିଲେ। ଏହି କ୍ରମରେ ଗଙ୍ଗାଧର ମେହେର କଲେଜ ଛକସ୍ଥିତ ଓଡ଼ିଆ ବାପ୍ଟିଷ୍ଟ ଚର୍ଚ୍ଚ, ସାକ୍ଷୀପଡା କ୍ୟାଥେଲିକ୍ ଚର୍ଚ୍ଚ, ବିନାଖଣ୍ଡି ସେଣ୍ଟ୍ ଜେମ୍ସ ଚର୍ଚ୍ଚ, କୁଲୁଥକାନି ଗୋସନର ଇ.ଏଲ୍. ଚର୍ଚ୍ଚ, ଅଇଁଠାପାଲି ଦୟାସାଗର ପ୍ରାର୍ଥନା ଭବନ, ଲକ୍ଷ୍ମୀଟକିଜ୍ ମୁଣ୍ଡା ବାପ୍ଟିଷ୍ଟ ଚର୍ଚ୍ଚ ଓ ପାଞ୍ଚଗଛିଆ ଚର୍ଚ୍ଚରେ ସ୍ବତନ୍ତ୍ର ପ୍ରାର୍ଥନା ସହ ବିବିଧ କାର୍ଯ୍ୟକ୍ରମ ହୋଇଥିଲା। ସମ୍ବଲପୁର ସମେତ ବୁର୍ଲା ଓ ହୀରାକୁଦର ୮ଟି ଚର୍ଚ୍ଚରେ ବଡ଼ଦିନ ପର୍ବ ପାଳିତ ହୋଇଯାଇଛି। ବଡ଼ଦିନକୁ ସ୍ବାଗତ କରିବାକୁ ଭକ୍ତମାନେ ଶନିବାର ମଧ୍ୟରାତି ପର୍ଯ୍ୟନ୍ତ ଉଜାଗର ରହିଥିଲେ। ଏପରି କି ନିର୍ଦ୍ଧାରିତ ସମୟାନୁସାରେ ଆତସବାଜିରେ ବଡ଼ଦିନକୁ ସ୍ବାଗତ କରାଯାଇଥିଲା। ସୂଚନାଯୋଗ୍ୟ, ୧୮୮୧ରେ ଓଡ଼ିଆ ବାପ୍ଟିଷ୍ଟ ଚର୍ଚ୍ଚ ନିର୍ମାଣ ହୋଇଥିଲା। ୧୯୨୯ରେ ବିନାଖଣ୍ଡି ସେଣ୍ଟ ଜେମ୍ସ ଚର୍ଚ୍ଚ ପ୍ରତିଷ୍ଠା ହୋଇଥିଲା। ସେହିଦିନଠାରୁ ଐତିହାସିକ ସମ୍ବଲପୁର ସହରରେ ବଡ଼ଦିନ ପର୍ବ ପାଳିତ ହୋଇଆସୁଛି।
