ଡେରାଡୁନ,୫।୮: ଟୋକିଓ ଅଲିମ୍ପିକ୍ସ ସେମିଫାଇନାଲରେ ଆର୍ଜେଣ୍ଟିନାଠାରୁ ହାରିବା ପରେ ଭାରତୀୟ ମହିଳା ହକି ଦଳର ସ୍ବର୍ଣ୍ଣ ପଦକ ହାତେଇବା ଆଶା ମାଟିରେ ମିଶିଯାଇଛି। ହେଲେ ଏହି ପରାଜୟ ପରେ ଉତ୍ତରାଖଣ୍ଡର ହରିଦ୍ୱାର ଜିଲାରେ ମହିଳା ଦଳର ସଦସ୍ୟା ବନ୍ଦନା କାଟାରିୟାଙ୍କ ଘର ଆଗରେ ବାଣ ଫୁଟାଇ ନାଚିଥିଲେ ଦୁଇ ଜଣ ଦୃର୍ବୁତ୍ତ। ବନ୍ଦନାଙ୍କ ପରିବାର ସଦସ୍ୟଙ୍କୁ ପରିହାସ କରିବା ସହ ଜାତିଭିତ୍ତିକ କମେଣ୍ଟ କରିଥିଲେ। ଏ ଘଟଣାରେ ଜଣଙ୍କୁ ଗିରଫ କରାଯାଇଥିବା ପୋଲିସ ପକ୍ଷରୁ କୁହାଯାଇଛି।
ଆର୍ଜେଣ୍ଟିନାଠାରୁ ପରାଜୟ ମିଳିବା ପରେ ଦୁଇ ଜଣ ବ୍ୟକ୍ତି ରୋଶନାବାଦ ଅଞ୍ଚଳରେ ବନ୍ଦନାଙ୍କ ଘର ଆଗରେ ବୁଧବାର ସନ୍ଧ୍ୟାରେ ବାଣ ଫୁଟାଇ ନାଚିଥିଲେ ବୋଲି ସିଡ୍କଲ ଥାନା ଅଧିକାରୀ କହିଛନ୍ତି।
କୋଳାହଳ ଶୁଣି ଘରୁ ବାହାରିଥିଲେ ବନ୍ଦନାଙ୍କ ପରିବାର ସଦସ୍ୟ। ସେମାନଙ୍କୁ କମେଣ୍ଟ କରି କହିଥିଲେ, ଟିମ୍ ଇଣ୍ଡିଆର ପରାଜୟର କାରଣ ଦଳରେ ବହୁ ଦଳିତ ଖେଳାଳି ଥିଲେ। ଏହାପରେ ବନ୍ଦନାଙ୍କ ପରିବାର ସଦସ୍ୟ ଓ ଉକ୍ତ ଦୁଇ ବ୍ୟକ୍ତିଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଏଥିଯୋଗୁ ବନ୍ଦନାଙ୍କ ଭାଇ ଥାନାରେ ଅଭିଯୋଗ କରିଥିଲେ।
ଏହି ଘଟଣାରେ ବିଜୟ ପାଲ ନାମକ ଜଣେ ଯୁବକଙ୍କୁ ଆଇପିସି ଦଫା ୫୦୪ (ଜାଣିଶୁଣି ଅପମାନିତ କରିବା) ଓ ଏସ୍ସି-ଏସ୍ଟି ଆଇନ ଅଧୀନରେ ଗିରଫ କରାଯାଇଛି।
