ନୂଆଦିଲ୍ଲୀ,୨୫।୭: ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଶୁକ୍ରବାର କହିଛନ୍ତି ଯେ ତାଙ୍କ ଦଳ କ୍ଷମତାରେ ଥିବା ସମୟରେ ଜାତିଗତ ଜନଗଣନା ନକରିବା ତାଙ୍କର ଭୁଲ ଥିଲା, କିନ୍ତୁ ଏବେ ସେ ଏହି ଭୁଲକୁ ସଂଶୋଧନ କରିବା ପାଇଁ ପଦକ୍ଷେପ ନେଇଛନ୍ତି। ସେ କହିଛନ୍ତି ଯେ ଜାତିଗତ ଜନଗଣନା ପ୍ରସଙ୍ଗ ଏକ ରାଜନୈତିକ ଭୂମିକମ୍ପ ଯାହା ଦେଶର ରାଜନୈତିକ ଭୂମିକୁ ଦୋହଲାଇ ଦେଇଛି।
କଂଗ୍ରେସର ‘ଓବିସି ଭାଗୀଦାରୀ ନ୍ୟାୟ ସମ୍ମିଳନୀ’କୁ ସମ୍ବୋଧିତ କରି ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ କହିଛନ୍ତି, ‘ମୁଁ ୨୦୦୪ରୁ ରାଜନୀତି କରିଆସୁଛି। ଯେତେବେଳେ ମୁଁ ନିଜକୁ ମୂଲ୍ୟାଙ୍କନ କରେ, ମୁଁ ପାଏ ଯେ କେଉଁଠି ମୁଁ ଭଲ କାମ କରିଛି ଏବଂ କେଉଁଠି ମୋର ଅଭାବ ଅଛି… ଆଦିବାସୀ, ଦଳିତ ଏବଂ ସଂଖ୍ୟାଲଘୁଙ୍କ ବିଷୟରେ ହେଉ, ମୋତେ ଭଲ ନମ୍ବର ମିଳିବା ଉଚିତ। ମହିଳା ପ୍ରସଙ୍ଗରେ ମୋତେ ଭଲ ନମ୍ବର ମିଳିବା ଉଚିତ, କିନ୍ତୁ ଯେତେବେଳେ ମୁଁ ପଛକୁ ଫେରି ଦେଖେ, ଗୋଟିଏ କଥା ସ୍ପଷ୍ଟ ଯେ ଗୋଟିଏ ଜିନିଷର ଅଭାବ ଥିଲା। ମୁଁ କରିଥିବା ଏହି ଗୋଟିଏ ଭୁଲ ହେଉଛି ଯେ ମୁଁ ଓବିସି ବର୍ଗ (ସ୍ବାର୍ଥ)କୁ ଯେପରି ଭାବରେ ସୁରକ୍ଷା ଦେବା କଥା ସେପରି କରିନଥିଲି। ଏହାର କାରଣ ହେଉଛି ଯେ ମୁଁ ସେତେବେଳେ ଆପଣଙ୍କ ପ୍ରସଙ୍ଗଗୁଡ଼ିକୁ ଗଭୀର ଭାବରେ ବୁଝିପାରି ନଥିଲି।’
ପୂର୍ବତନ କଂଗ୍ରେସ ଅଧ୍ୟକ୍ଷ କହିଛନ୍ତି, ଦଳିତଙ୍କ ଅସୁବିଧା ବୁଝିବା ସହଜ… ଆଦିବାସୀଙ୍କ ସମସ୍ୟା ମଧ୍ୟ ସହଜରେ ବୁଝିହେବ, କିନ୍ତୁ ଓବିସିଙ୍କ ଅସୁବିଧା କିମ୍ବା ସମସ୍ୟାଗୁଡ଼ିକ ସହଜରେ ଦୃଶ୍ୟମାନ ହେଉନାହିଁ। ମୁଁ ଦୁଃଖିତ ଯେ ଯଦି ମୁଁ ଆପଣଙ୍କ ଇତିହାସ ଏବଂ ସମସ୍ୟାଗୁଡ଼ିକ ବିଷୟରେ ଅଧିକ ଜାଣିଥାନ୍ତି, ତେବେ ମୁଁ ସେହି ସମୟରେ (ଯେତେବେଳେ କଂଗ୍ରେସ କ୍ଷମତାରେ ଥିଲା) ଜାତି ଜନଗଣନା କରାଇଥାନ୍ତି। ସେହି ସମୟ ଚାଲିଯାଇଛି, କିନ୍ତୁ ଏହା ମୋର ଭୁଲ। … ଏହା କଂଗ୍ରେସର ଭୁଲ ନୁହେଁ, ଏହା ମୋର ଭୁଲ।’
