ସୋସିଆଲ୍ ମିଡିଆରେ ଏବେ ଏକ ଆଶ୍ଚର୍ଯ୍ୟଜନକ ଭିଡିଓ ଦ୍ରୁତ ଗତିରେ ଭାଇରାଲ୍ ହେଉଛି । ଭିଡିଓଟି ଇଣ୍ଡୋନେସିଆର ବୋଲି ଦାବି କରାଯାଉଛି । ଏଥିରେ କିଛି ପିଲା ପ୍ରାୟ ୨୦ ଫୁଟ୍ ଲମ୍ବର ଏକ ଜୀବନ୍ତ ଅଜଗର ସହ ଖେଳୁଥିବା ଦେଖିବାକୁ ମିଳିଛି। ସାଧାରଣତଃ ଏତେ ବଡ଼ ସାପକୁ ଦେଖିଲେ ଲୋକେ ଭୟରେ ଦୂରକୁ ଚାଲିଯାଆନ୍ତି । କିନ୍ତୁ ଏଠାରେ ପିଲାମାନେ ତାହାର ପିଠିକୁ ସ୍ଲାଇଡ୍ ଭାବେ ବ୍ୟବହାର କରି ଖେଳୁଥିବା ଦୃଶ୍ୟ ସମସ୍ତଙ୍କୁ ଚକିତ କରିଛି।
ଭାଇରାଲ୍ ଭିଡିଓରେ ଏକ ବିଶାଳକାୟ ଅଜଗର ମାଟିରେ ଲମ୍ବା ହୋଇ ପଡ଼ିଥିବା ଦେଖାଯାଉଛି। ଏହାର ଶରୀର ମାଟିର ଏକ ଢାଲୁ ଅଂଶ ଉପରେ ରହିଛି। ଏହି ସମୟରେ ପିଲାମାନେ ଭୟ ନକରି ଅଜଗରର ଶରୀର ଉପରକୁ ଚଢ଼ୁଛନ୍ତି ଏବଂ ତା’ ଉପରୁ ଖସି ତଳକୁ ଆସୁଛନ୍ତି । ଜଣକ ପରେ ଜଣେ ଏହି ଅଜବ ଖେଳର ମଜା ନେଉଥିବା ବେଳେ ସେମାନଙ୍କ ମୁହଁରେ ଭୟର ଚିହ୍ନ ମଧ୍ୟ ଦେଖାଯାଉନାହିଁ।
ଏହି ଘଟଣାରେ ଆଉ ଏକ ଚିନ୍ତାଜନକ ଦିଗ ହେଉଛି, ପିଲାମାନେ ଏଭଳି ବିପଜ୍ଜନକ ଖେଳ ଖେଳୁଥିବା ବେଳେ ଅନେକ ବୟସ୍କ ଲୋକ ସେଠାରେ ଉପସ୍ଥିତ ଥିଲେ । କିନ୍ତୁ ସେମାନଙ୍କ ମଧ୍ୟରୁ କେହି ପିଲାଙ୍କୁ ଅଟକାଇବାକୁ ଆଗେଇ ଆସୁନଥିବା ଭିଡିଓରେ ଦେଖାଯାଉଛି। କିଛି ଲୋକ ମୋବାଇଲ୍ରେ ଏହି ଦୃଶ୍ୟକୁ ରେକର୍ଡ କରୁଛନ୍ତି। ଏହାକୁ ନେଇ ସୋସିଆଲ୍ ମିଡିଆରେ ଅନେକ ଲୋକ ପ୍ରଶ୍ନ ଉଠାଇଛନ୍ତି।
