ମୁମ୍ବାଇ, ୨୩।୨ : ଜାତିଗତ ପ୍ରମାଣପତ୍ର ଆବେଦନକାରୀଙ୍କ ଜୀବନଶୈଳୀ ଆଧାରରେ ମନା କରିହେବ ନାହିଁ। ଏହା ଆଫିନିଟ୍ ଟେଷ୍ଟ୍ ହୋଇପାରେ କିନ୍ତୁ ଲିଟମସ୍ ଟେଷ୍ଟ୍ ନୁହେଁ ବୋଲି ବମ୍ବେ ହାଇକୋର୍ଟ ଏକ ମାମଲାର ବିଚାର କରି କହିଛନ୍ତି। ସମୟ ସହିତ କୌଣସି ଏକ ନିର୍ଦ୍ଦିଷ୍ଟ ସମ୍ପ୍ରଦାୟର ଜୀବନଧାରଣ ମାନରେ ଉନ୍ନତି ଆସିବା ସହିତ ଦୈନଦିନ ଜୀନଶୈଳୀରେ ବହୁ ପରିବର୍ତ୍ତନ ହୋଇଥାଏ।
କିନ୍ତୁ ଏଭଳି ପରିବର୍ତ୍ତନକୁ ଦୃଷ୍ଟିରେ ରଖି ଆବେଦନକାରୀ ସମ୍ପୃକ୍ତ ସମ୍ପ୍ରଦାୟର ନୁହେଁ ବୋଲି କହି ଜାତିଗତ ପ୍ରମାଣପତ୍ର ଦେବାକୁ ମନା କରିହେବ ନାହିଁ ବୋଲି କୋର୍ଟ କହିଛନ୍ତି।
ବିଚାରପତି ଏସ୍.ଭି.ଗଙ୍ଗାପୁରଓ୍ବାଲା ଏବଂ ଏସ୍.ଜି.ଡିଗେଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହି ମାମଲାର ବିଚାର କରି ଏଭଳି ରାୟ ପ୍ରଦାନ କରିଛନ୍ତି।
କଲେଜରେ ନାମ ଲେଖାଇବା ସମୟରେ ଜଣେ ଛାତ୍ରଙ୍କ ଜାତିଗତ ପ୍ରମାଣପତ୍ରକୁ ସ୍କୃଟିନି କମିଟି ପକ୍ଷରୁ ମିଥ୍ୟା ବୋଲି କୁହାଯାଇଥିଲା। ଛାତ୍ରଙ୍କ ଜୀବନଶୈଳୀକୁ ଦୃଷ୍ଟିରେ ରଖି କମିଟି ପକ୍ଷରୁ ଏଭଳି ନିଷ୍ପତ୍ତିଗ୍ରହଣ କରାଯାଇଥିଲା। ଏହାକୁ ଭେରିଫିକେଶନ ପାଇଁ ପଠାଯିବା ସହିତ ଭିଜିଲାନ୍ ସେଲ୍କୁ ପଠାଇ ଦିଆଯାଇଥିଲା।
ଛାତ୍ରଙ୍କ ସମ୍ପର୍କୀୟ ଭାଇ ଭଉଣୀ କଲେଜରେ ଅଧ୍ୟୟନ କରୁଛନ୍ତି। ମାତ୍ର ତାଙ୍କର ଜାତିଗତ ପ୍ରମାଣପତ୍ରକୁ ମନା କରାଯାଇଥିଲା। ପରେ ଛାତ୍ର ଜଣକ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
