ଅତାବିରା,୨।୫(ଯୁଧିଷ୍ଠିର ମହାପାତ୍ର): ପୁଣି ଜଣେ ସରକାରୀ ବାବୁଙ୍କ ନାଁରେ ଆସିଲା ଯୌନ କେଳେଙ୍କାରୀର ଅଭିଯୋଗ। ବରଗଡ଼ ଜିଲା ଅତାବିରା ଆରଏମସି ସମ୍ପାଦକ ଶଶାଙ୍କ ଶେଖର ସାହାଣି ନିଜ ଅଫିସରେ କାର୍ଯ୍ୟରତ ଜଣେ ଅସ୍ଥାୟୀ ମହିଳା କର୍ମଚାରୀଙ୍କୁ ସ୍ଥାୟୀ ଚାକିରି କରାଇ ଦେବା ନାଁରେ ଯୌନ ସୁଖ ଚାହୁଁଥିଲେ ବୋଲି ହୋଇଛି ସାଂଘାତିକ ଅଭିଯୋଗ l ସେହିପରି ତାଙ୍କ ତଳସ୍ତରର କର୍ମଚାରୀଙ୍କୁ ଜାତିଆଣ ଆକ୍ଷେପ କରି ଅଶ୍ଳୀଳ ଭାଷାରେ ଗାଳି ଗୁଲଜ କରିଥିବା ଅଭିଯୋଗ ହୋଇଛି ଅତାବିରା ଥାନାରେ। ଏନେଇ ଅତାବିରା ଥାନା ପୋଲିସ ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିଛି l
ରେଗୁଲାର ଚାକିରି କରାଇ ଦେବା ନାଁରେ ଶାରୀରିକ ସୁଖ ଖୋଜୁଥିଲେ ସମ୍ପାଦକ ଶଶାଙ୍କ ବାବୁ l ହେଲେ ଥାନାରେ ପହଞ୍ଚିଗଲା ମାମଲା। ଏବେ ଅଡୁଆରେ ଅତାବିରା ଆରଏମସି ସମ୍ପାଦକ ଶଶାଙ୍କ ଶେଖର ସାହାଣୀ। ବରଗଡ ଜିଲାରୁ ପୁଣି ଆସିଲା ଏଭଳି ଏକ ସାଂଘାତିକ ଅଭିଯୋଗ। ଅତାବିରା ନିୟନ୍ତ୍ରିତ ବଜାର କମିଟିର ସମ୍ପାଦକ ଶଶାଙ୍କ ଶେଖର ସାହାଣୀ ଜଣେ ଯୁବତୀଙ୍କୁ ଅସ୍ଥାୟୀରୁ ସ୍ଥାୟୀ ଚାକିରି କରାଇ ଦେବାର ପ୍ରଲୋଭନ ଦେଖାଇ ବାରମ୍ବାର ଶାରିରୀକ ସମ୍ପର୍କ ରଖିବାକୁ ବାଧ୍ୟ କରୁଥିଲେ।
ଅତାବିରା ଥାନାରେ ଯୁବତୀ ଜଣକ ଲିଖିତ ଅଭିଯୋଗ କରିଛନ୍ତି। ଯୁବତୀଙ୍କ ଅଭିଯୋଗକୁ ର୍ଭିତ୍ତି କରି ଅତାବିରା ଥାନା କେଶ ନମ୍ବର ୧୫୮/୨୦୨୬ ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛନ୍ତି l ରସିକିଆ ସମ୍ପାଦକ ବାବୁ ସ୍ଥାୟୀ ଚାକିରି କରାଇ ଦେବା ନାଁରେ ଶାରୀରିକ ସମ୍ପର୍କ ରଖିବାକୁ ଚାପ ଦେବା ସହ କଥା ପ୍ରଘଟ କଲେ ଜୀବନରୁ ମାରିଦେବାର ଧମକ ଦେଇଥିବା ଅଭିଯୋଗରେ ଉଲ୍ଲେଖ ରହିଛି l ସେହିପରି ଅଫିସର ତଳିଆ କର୍ମଚାରୀଙ୍କୁ ଜାତିଆଣ ଆକ୍ଷେପ କରି ଅଶ୍ଳୀଳ ଭାବେ ଗାଳିଗୁଲଜ କରୁଥିବା ମଧ୍ୟ ଅଭିଯୋଗ ହୋଇଛି l ଗୋଡ଼ଭଗା ମାର୍କେଟ ଇନଚାର୍ଜ ଲିଙ୍ଗରାଜ ସୁନା ଓ ଆରଏମସି କର୍ମଚାରୀ ଭରତ ବାରିକ ସମ୍ପାଦକ ଶଶାଙ୍କଙ୍କ ବିରୋଧରେ ଅଭିଯୋଗ କରିଛନ୍ତି l
ତଦନ୍ତରୁ ଜଣାପଡିଛି ଯେ, ଆରଏମସି କର୍ମଚାରୀ ଓ ସମ୍ପାଦକଙ୍କ ଝାମେଲା ଯୋଗୁ ଦୀର୍ଘ ଦିନ ହେଲା କାର୍ଯ୍ୟାଳୟ ବନ୍ଦ ରହିଛି l କାରଣ ଅଭିଯୋଗ ହେବା ପରଠୁ ସମ୍ପାଦକ ମହାଶୟ ଦେଖା ଦେଉନାହାନ୍ତି କି ଫୋନ ବି ଉଠାଉ ନାହାନ୍ତି, ଯାହାକୁ ନେଇ ଏବେ ଚିନ୍ତାରେ ଚାଷୀ l ଚଳିତ ମାସ ୧୧ରୁ ଡାଳୁଅ ଧାନ କିଣାବିକା ଆରମ୍ଭ ହେବାକୁ ଥିବାରୁ ତୁରନ୍ତ ଏହାର ସମାଧାନ କରିବାକୁ ଚାଷୀ ଦାବି କରିଛନ୍ତି। ଏନେଇ ବରଗଡ଼ ଏସଡିପିଓ ପଦାରବିନ୍ଦ ତ୍ରିପାଠୀଙ୍କୁ ପଚରାଯିବାରୁ ସେ ଥାନାରେ ମାମଲା ରୁଜ୍ଜୁ ହୋଇଥିବା ଏବଂ ପୋଲିସ ଏହା ଉପରେ ତଦନ୍ତ ଜାରି ରଖିଥିବା କହିଛନ୍ତି।
ତେବେ ପୋଲିସ ତଦନ୍ତ କେବେ ସରିବ ଏବଂ ସରକାରୀ ବାବୁଙ୍କ ଉପରେ କଣ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ତାହା ଉପରେ ଏବେ ସମସ୍ତଙ୍କ ନଜର ରହିଛି l
Dharitri – Odisha’s No.1 Odia Daily
