ଚଣ୍ଡିଗଡ଼,୬ ।୧୨: ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ଆସନ୍ତା ବିଧାନସଭା ନିର୍ବାଚନକୁ ନେଇ ସୋମବାର ବଡ ଘୋଷଣା କରିଛନ୍ତି । ତାଙ୍କ ଦଳ ପଞ୍ଜାବ ଲୋକ କଂଗ୍ରେସ ଆଗମୀ ବିଧାନସଭା ନିର୍ବାଚନ ଭାରତୀୟ ଜନତା ପାର୍ଟି(ଭାଜପା) ଓ ଅକାଳିଦଳକୁ ବିରୋଧ କରୁଥିବା ଢିଡସା ପାର୍ଟି ସହ ମିଶି ନିର୍ବାଚନ ଲଢିବ । ଚଣ୍ଡିଗଡରେ ଏକ ଖବରଦାତା ସମ୍ମିଳନୀରେ କ୍ୟାପଟେନ ସୋମବାର ଏହା ପ୍ରକାଶ କରିଛନ୍ତି । ସୂଚନାଯୋଗ୍ୟ, ନିକଟରେ ଅସନ୍ତୁଷ୍ଟ ହୋଇ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ସହ କଂଗ୍ରେସ ଦଳରୁ ବି ଇସ୍ତଫା ଦେଇଥିଲେ କ୍ୟାପଟେନ ଅମରିନ୍ଦର ସିଂ । ଏହାସହ ସେ ତାଙ୍କର ନୂଆ ଦଳ ଗଠନ କରି ଆଗାମୀ ବିଧାନସଭା ନିର୍ବାଚନ ଲଢିବା କଥା ବି ଘୋଷଣା କରିଥିଲେ । ଭାଜପାର ବରିଷ୍ଠ ନେତା ତଥା କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହା କ୍ୟାପଟେନଙ୍କ ମିଶ୍ରଣକୁ ନେଇ ଆଗରୁ ସୂଚନା ଦେଇଥିବା ବେଳେ ଏବେ କ୍ୟାପଟେନ ନିଜେ ଏହାର ସୂଚନା ଦେଇଛନ୍ତି । ହେଲେ ସୁଖଦେବ ସିଂ ଢିଡୱା ଏପର୍ଯ୍ୟନ୍ତ ଏହାକୁ ନେଇ ମୁହଁ ଖୋଲି ନାହାନ୍ତି । ଗୁରୁତ୍ୱପୂର୍ଣ୍ଣ କଥା ହେଲା ଯେଉଁ କ୍ୟାପଟେନ ୨୫ ବର୍ଷ ହେବ ଭାଜପା ଉପରେ ବର୍ଷୁଥିଲେ ଏବେ ସେ ସେହି ଭାଜପା ସହ ମିଶି ନିର୍ବାଚନ ଲଢିବାକୁ ଯାଉଛନ୍ତି । ଯଦିଓ ଦଳୀୟ ସ୍ତରରେ ଏହା ଘୋଷଣା କରାଯାଇ ନାହିଁ ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ସହ କ୍ୟାପଟେନ କଥା ହୋଇଥିବା ପ୍ରକାଶ କରିଛନ୍ତି ।
