ନୂଆଦିଲ୍ଲୀ,୯।୧: ଭାରତ ଓ ଘରୋଇ ଦକ୍ଷିଣ ଆଫ୍ରିକା ମଧ୍ୟରେ ମଙ୍ଗଳବାରଠାରୁ କେପ୍ଟାଉନ୍ରେ ତୃତୀୟ ତଥା ଅନ୍ତିମ ଟେଷ୍ଟ ମ୍ୟାଚ୍ ଆରମ୍ଭ ହେବ। ଏହି ମ୍ୟାଚ୍ରେ ବୋଲିଂ କମ୍ବିନେଶନ ନେଇ ଭାରତୀୟ ଟିମ୍ ମ୍ୟାନେଜମେଣ୍ଟ ଦ୍ୱନ୍ଦ୍ୱରେ ରହିଛି। ଯୁବ ଦ୍ରୁତ ବୋଲର ମହମ୍ମଦ ସିରାଜ ଆହତ ହୋଇଥିବାରୁ ତାଙ୍କ ସ୍ଥାନରେ କାହାକୁ ଖେଳାଯିବ ସେ ନେଇ ଦ୍ୱିଧା ସୃଷ୍ଟି ହୋଇଛି। ସିରାଜଙ୍କ ସ୍ଥାନରେ ଅଭିଜ୍ଞ ଈଶାନ୍ତ ଶର୍ମା ଓ ଉମେଶ ଯାଦବଙ୍କ ମଧ୍ୟରୁ ଜଣଙ୍କୁ ସୁଯୋଗ ମିଳିବ। ଈଶାନ୍ତଙ୍କ ପାଖରେ ପର୍ଯ୍ୟାପ୍ତ ଅଭିଜ୍ଞତା ରହିଛି। ଅନ୍ୟପଟେ ଉମେଶ କ୍ଲାସିକାଲ ଆଉଟ ସୁଇଙ୍ଗର ଘରୋଇ ବ୍ୟାଟ୍ସମ୍ୟାନଙ୍କୁ ସମସ୍ୟାରେ ପକାଇବ ବୋଲି ଆଶା କରାଯାଉଛି।
ଜୋହାନ୍ସବର୍ଗରେ ଖେଳାଯାଇଥିବା ଦ୍ୱିତୀୟ ଟେଷ୍ଟର ପ୍ରଥମ ସନ୍ଧ୍ୟାରେ ବୋଲିଂ କରିବା ଅବସରରେ ସିରାଜ ହାମଷ୍ଟ୍ରିଙ୍ଗ୍ ଷ୍ଟ୍ରେନ୍ର ଶିକାର ହୋଇଥିଲେ। ଦୁଇଟି ଇନିଂସରେ ସେ ମାତ୍ର ୧୫.୫ ଓଭର ବୋଲିଂ କରିବାକୁ ସକ୍ଷମ ହୋଇଥିଲେ। ତାଙ୍କ ଇଞ୍ଜୁରି ଭାରତ ରଣନୀତିକୁ ପ୍ରଭାବିତ କରିଥିଲା ବୋଲି କୋଚ ରାହୁଲ ଡ୍ରାଭିଡ୍ ସ୍ବୀକାର କରିଛନ୍ତି। ଫଳରେ ଭାରତ ୨୪୦ ରନକୁ ଡିଫେଣ୍ଡ କରିବାରେ ବିଫଳ ହୋଇଥିଲା। ଆଉ ୨ ଦିନ ମଧ୍ୟରେ ସିରାଜ ସମ୍ପୂର୍ଣ୍ଣ ଭାବେ ଫିଟ୍ ହେବେ ବୋଲି ଆଶା କରାଯାଉନାହିଁ। ତାଙ୍କୁ ଏବେ ବିଶ୍ରାମ ନେବାର ଆବଶ୍ୟକତା ରହିଛି। ଏଭଳି ସ୍ଥିତିରେ ଭାରତ ପାଖରେ ଈଶାନ୍ତ ଓ ଉମେଶ ଦୁଇଟି ବିକଳ୍ପ ରହିଛନ୍ତି। ୩୩ ବର୍ଷୀୟ ଈଶାନ୍ତ ଶ୍ରେଷ୍ଠ ଫର୍ମରେ ନ ଥିଲେ ମଧ୍ୟ ତାଙ୍କ ପାଖରେ ୧୦୦ ଟେଷ୍ଟ ଖେଳିବାର ଅଭିଜ୍ଞତା ରହିଛି। ଅନ୍ୟପଟେ ୩୪ ବର୍ଷୀୟ ଉମେଶଙ୍କ ନିକଟରେ ୫୧ଟି ଟେଷ୍ଟ ଖେଳିବାର ଅଭିଜ୍ଞତା ରହିଛି। ତେବେ ନିକଟ ଅତୀତରେ ସେ ଈଶାନ୍ତଙ୍କଠାରୁ ଭଲ ପ୍ରଦର୍ଶନ କରିଛନ୍ତି। ତାଙ୍କ ଗତିରେ ମଧ୍ୟରେ ସାମାନ୍ୟ ଅବନତି ହୋଇଛି। ତେବେ କୋଚ୍ ଡ୍ରାଭିଡ୍ ଓ ଅଧିନାୟକ କୋହଲି ଏକାଧିକ କାରଣ ପାଇଁ ଈଶାନ୍ତଙ୍କୁ ଖେଳିବାକୁ ଚାହିଁବେ।
