ହୋଶିଆରପୁର,୧୮।୧: ଭାଇ ବରୁଣ ଗାନ୍ଧୀଙ୍କୁ ଭେଟିବା ଏବଂ କୋଳାଗ୍ରତ କରିବାକୁ ପ୍ରସ୍ତୁତ ଅଛି, ହେଲେ ତାଙ୍କ ନୀତି ଆଦର୍ଶକୁ ଗ୍ରହଣ କରିପାରିବି ନାହିଁ ବୋଲି କଂଗ୍ରେସ ନେତା ରାହୁଲ ଗାନ୍ଧୀ ମଙ୍ଗଳବାର କହିଛନ୍ତି। ଭାରତ ଯୋଡ଼ୋ ଯାତ୍ରାରେ ଭାଜପା ଏମ୍ପି ବରୁଣ ଯୋଗ ଦେଇପାରିବେ କି ବୋଲି ଖବରଦାତାମାନେ ପ୍ରଶ୍ନ କରିବାରୁ ରାହୁଲ କହିଥିଲେ, ସେମାନଙ୍କ ନୀତି ଆଦର୍ଶ ଭିନ୍ନ ହୋଇଥିବାରୁ ସମସ୍ୟା ସୃଷ୍ଟି ହୋଇପାରେ। ବରୁଣ ଭାଜପାରେ ଅଛନ୍ତି। ସେ ଏଠାକୁ ଆସିଲେ ତାଙ୍କ ପାଇଁ ସମସ୍ୟା ହେବ। ତେବେ ସେ ବରୁଣଙ୍କୁ ଭେଟି ପାରିବେ ଏବଂ କୋଳାଗ୍ରତ କରିପାରିବେ ବୋଲି ହୋଶିଆରପୁରରେ ଖବରଦାତା ସମ୍ମିଳନୀକୁ ରାହୁଲ କହିଛନ୍ତି। ତାଙ୍କ ପରିବାରର ଏକ ନୀତି ଆଦର୍ଶ ରହିଛି କିନ୍ତୁ ବରୁଣ ଅଲଗା ନୀତି ଗ୍ରହଣ କରିଛନ୍ତି, ଯାହାକୁ ସେ ଗ୍ରହଣ କରିପାରିବେ ନାହିଁ ବୋଲି ରାହୁଲ କହିଥିଲେ। ସେ କଦାପି ଆର୍ଏସ୍ଏସ୍ ଅଫିସ୍କୁ ଯାଇପାରିବେ ନାହିଁ। ତୁମେ ମୋ ତଣ୍ଟି କାଟିଦେଇପାର, ତଥାପି ମୁଁ ସେଠାକୁ ଯିବି ନାହିଁ ବୋଲି କଂଗ୍ରେସ ନେତା କହିଥିଲେ।
ଆର୍ଏସ୍ଏସ୍ ଏବଂ ଭାଜପା ସରକାରୀ ସଂସ୍ଥାଗୁଡ଼ିକୁ ନିୟନ୍ତ୍ରଣ କରୁଥିବା ରାହୁଲ ଅଭିଯୋଗ କରିଛନ୍ତି। ଗଣମାଧ୍ୟମ, ଅମଲାତନ୍ତ୍ର, ନିର୍ବାଚନ କମିଶନ ଏବଂ ନ୍ୟାୟପାଳିକା ଉପରେ ମଧ୍ୟ ଚାପ ପକାଯାଉଛି। ସେଥିପାଇଁ ଦେଶରେ ସ୍ବାଭାବିକ ଗଣତାନ୍ତ୍ରିକ ପ୍ରକ୍ରିୟା ଏବେ ଉଭାନ ହୋଇଯାଇଥିବା କଂଗ୍ରେସ ନେତା କହିଛନ୍ତି। ଏହା ଗୋଟିଏ ରାଜନୈତିକ ଦଳର ଅନ୍ୟ ଦଳ ସହ ଲଢ଼େଇ ନୁହେଁ। ଏହା ଶାସକ ଦଳ ଏବଂ ଆର୍ଏସ୍ଏସ୍ ନିୟନ୍ତ୍ରଣରେ ଥିବା ଅନୁଷ୍ଠାନ ଏବଂ ବିରୋଧୀଙ୍କ ମଧ୍ୟରେ ଲଢ଼େଇ। ସେଥିରୁ ଗୋଟିଏ ହେଲା ଇଲେକ୍ଟ୍ରୋନିକ୍ ଭୋଟିଂ ମେଶିନ ବୋଲି ରାହୁଲ କହିଥିଲେ। ସେ ପଞ୍ଜାବରେ ଏଏପି ସରକାରକୁ ମଧ୍ୟ ସମାଲୋଚନା କରିଛନ୍ତି। ପଞ୍ଜାବର ଶାସନ କେବଳ ପଞ୍ଜାବରୁ ହେବା ଉଚିତ, ଦିଲ୍ଲୀରୁ ନୁହେଁ। ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ ରିମୋଟ କଣ୍ଟ୍ରୋଲ ହେବା ଉଚିତ ନୁହେଁ ବୋଲି କଂଗ୍ରେସ ନେତା ସୋମବାର କହିଥିଲେ।
