କୋରାପୁଟ,୧୦।୧୧(ଅମିତାଭ ବେହେରା ): ଡିଜିଙ୍କ ଗସ୍ତ ପରେ କୋରାପୁଟ ଜିଲାରେ ଆରମ୍ଭ ହୋଇଛି ଗଞ୍ଜେଇ କ୍ଲିନ୍ ଅଭିଯାନ। ଲମତାପୁଟରୁ ଆରମ୍ଭ ହୋଇଛି ଅପରେଶନ ଗ୍ରୀନ କ୍ଳୀନ୍। ମାଛକୁଣ୍ଡ ପୋଲିସ, ଅବକାରୀ ଓ ରାଜସ୍ବ ଓ ଜଙ୍ଗଲ ବିଭାଗ ପକ୍ଷରୁ ମିଳିତ ଭାବେ ଗଞ୍ଜେଇ ଚାଷ ନଷ୍ଟ କରାଯାଉଛି।
କୋରାପୁଟ ଜିଲାରୁ ଗଞ୍ଜେଇ ଚାଷ ସଫା କରାଯିବା ସହ ଗଞ୍ଜେଇ ମାଫିଆଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଏବଂ ସୀମାନ୍ତ ଅଞ୍ଚଳରେ ସୁରକ୍ଷା ବ୍ୟବସ୍ଥା କଡ଼ାକଡି କରାଯିବ ବୋଲି ନିକଟରେ ପୋଲିସ ମହାନିର୍ଦ୍ଦେଶକ ପ୍ରତିଶ୍ରୁତି ଦେଇଥିଲେ। ଏହାର ପ୍ରଥମ ପଦକ୍ଷେପ ସ୍ବରୁପ ଜିଲାର ଲମତାପୁଟ ବ୍ଲକରୁ ଗଞ୍ଜେଇ ଗଛକୁ ନଷ୍ଟ କରିଛି କୋରାପୁଟ ପୋଲିସ।
ଗୋଡିହଞ୍ଜର ପଞ୍ଚାୟତର ଦହନାପୁଟ ଗ୍ରାମ ଏବଂ ଏନୁଗୁ ଗ୍ରାମ ନିକଟରେ ସ୍ଥାନୀୟ ମାଜିଷ୍ଟେଟ ତଥା ଅତିରିକ୍ତ ତହସିଲଦାରଙ୍କ ଉପସ୍ଥିତିରେ ପ୍ରାୟ ୨୦ ଏକର ଜମିରେ ଚାଷ ହୋଇଥିବା ୨୪ ହଜାରରୁ ଊଦ୍ଧର୍ବ ଗଞ୍ଜେଇ ଗଛ ନଷ୍ଟ କରାଯାଇଛି।
ଗୋଇନ୍ଦା ସୂଚନାକୁ ଆଧାର କରି କୋରାପୁଟ ଜିଲାରେ ଆରମ୍ଭ ହୋଇଛି ଅପେରଶନ ଗ୍ରୀନ୍ କ୍ଳିନ। ପୂର୍ବରୁ ଏହି ଅଞ୍ଚଳ ମାଓବାଦୀ ପ୍ରଭାବିତ ଅଞ୍ଚଳ ହୋଇଥିବାରୁ ଦୁଇ ପ୍ଲାଟୁନ ଡିଭିଏଫ୍ ଫୋର୍ସ, ମାଛକୁଣ୍ଡ ଥାନା ଅଧିକାରୀ ଶୂକ୍ରା ମାଢି, ଲମତାପୁଟ ଫାଣ୍ଡି ଅଧିକାରୀ ବିଷ୍ଣୁ ମାଡ଼କାମି, ଜଲାପୁଟ ଥାନା ଅଧିକାରୀ ମୀନ କେତନ ପାତ୍ର, ଅବକାରୀ ବିଭାଗ ଅଧିକାରୀ ଅର୍ଣ୍ଣପୂର୍ଣ୍ଣା ରଥଙ୍କ ମିଳିତ ଉଦ୍ୟମରେ ସକାଳୁ ସନ୍ଧ୍ୟା ପର୍ଯ୍ୟନ୍ତ ଅପରେଶନ ଜାରି ରହିଥିଲା।
ଗଞ୍ଜେଇ ଚାଷ ଜଙ୍ଗଲ ଜମିରେ ହୋଇଛି ନା ବ୍ୟକ୍ତିଗତ ମାଲିକାନା ଜମିରେ ହୋଇଛି ସ୍ଥାନୀୟ ଆର୍ଆଇଙ୍କୁ ରିପୋର୍ଟ ଦେବାକୁ ପୋଲିସ ପକ୍ଷରୁ କୁହାଯାଇଛି। ରିପୋର୍ଟ ଆସିବା ପରେ କେଉଁମାନେ ଗଞ୍ଜେଇ ଚାଷରେ ସମ୍ପୃକ୍ତ ଅଛନ୍ତି ତାଙ୍କୁ ଚିହ୍ନଟ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସ୍ଥାନୀୟ ପୋଲିସ ପକ୍ଷରୁ କୁହାଯାଇଛି।
