କେସିଙ୍ଗା,୮ା୫(ତୁମେଶ୍ୱର ସାହୁ): କଳାହାଣ୍ଡି ଜିଲା ଭବାନୀପାଟଣା ବିଧାନସଭା କ୍ଷେତ୍ରର କେସିଙ୍ଗା ବ୍ଳକରେ ରାଜନୈତିକ ଉଷ୍ମତା ବଢ଼ିଚାଲିଛି। ଆସନ୍ତା ୧୩ ତାରିଖରେ ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ଭୋଟ୍ ଗ୍ରହଣ ହେବ। ୮୦-ବିଧାନ ସଭା ଭବାନୀପାଟଣା ନିର୍ବାଚନ କ୍ଷେତ୍ରକୁ ହାତେଇବା ପାଇଁ ସବୁ ଦଳର ପ୍ରାର୍ଥୀମାନେ ପ୍ରଚାର ଜୋର ଲଗାଇଛନ୍ତି। ପ୍ରତ୍ୟେକ ଦଳ ନିଜ ନିଜର ସ୍ଥିତି ବଜାୟ ରଖିବା ପାଇଁ କସରତ ଜାରି ରଖିଛନ୍ତି। ଚଳିତ ସାଧାରଣ ନିର୍ବାଚନକୁ ଆଉ ମାତ୍ର୫ ଦିନ ଥିବା ବେଳେ ୩ ପ୍ରମୁଖ ରାଜନୈତିକ ଦଳ ମଧ୍ୟରେ ଅଙ୍କକଷା ଚାଲିଛି। ପ୍ରତ୍ୟେକ ଦିନ ବିଜେଡି
ବିଧାୟକ ପ୍ରାର୍ଥିନୀ ଲଳିତା ନାଏକ ତାଙ୍କ ସମର୍ଥନମାନେ କେସିଙ୍ଗା ବ୍ଲକ ଏନ୍ଏସି ସମେତ ୧୭ଟି ପଞ୍ଚାୟତରେ ଭୋଟ୍ ପ୍ରଚାରରେ ଜୋର ଲଗାଇଛନ୍ତି। କଂଗ୍ରେସ ଦଳ ପକ୍ଷରୁ ସାଗର ଚରଣ ଦାସ ଓ ଭାଜପା ପକ୍ଷରୁ ପ୍ରଦୀପ୍ତ ନାଏକ ମଧ୍ୟ ନିର୍ବାଚନ ପ୍ରଚାର କରୁଛନ୍ତି। କେସିଙ୍ଗା ବ୍ଲକରେ ଉଭୟେ ସକ୍ରିୟ ସଂଗଠନକୁ ସୁଦୃଢ଼ କରିବା ସହ ସହ କର୍ମୀଙ୍କୁ ଉତ୍ସାହିତ କରୁଛନ୍ତି। ବିଜେଡିର ଏମ୍ପି ଓ ବିଧାୟକ ପ୍ରାର୍ଥୀଙ୍କ ପ୍ରଚାର କାର୍ଯ୍ୟକ୍ରମ ଜୋରରେ ଚାଲିଥିବା ବେଳେ ସମର୍ଥନ ବିଜେଡିକୁ ଆହୁରି ଶାଣିତ କରିଛି। ଫଳରେ କଂଗ୍ରେସ ଓ ଭାଜପା ମଧ୍ୟ ଜୋର୍ ଲଗେଇଛନ୍ତି। ଏହି ବ୍ଲକରେ ବିଜେଡି, କଂଗ୍ରେସ ଓ ଭାଜପା ତ୍ରିମୁଖୀ ଲଢ଼େଇ ପାଇଁ ନିଜ ନିଜ ସମର୍ଥନ ସହ ଗାଁ ଗାଁ ବୁଲି ଭୋଟ୍ ଭିକ୍ଷା କରୁଛନ୍ତି। କେତେକ ସ୍ବାଧୀନ ପ୍ରାର୍ଥୀ ମଧ୍ୟ ଜୋର୍ଦାର ପ୍ରଚାର କରୁଥିବା ଜଣାପଡ଼ିଛି। କେସିଙ୍ଗା ରେଳ ଷ୍ଟେଶନରେ ଦୀର୍ଘ ବର୍ଷର ଦ୍ରୁତଗାମୀ ଦୁର୍ଗ-ପୁରୀ ଏବଂ ଇସ୍ପାତ ଟ୍ରେନ୍କୁ କେସିଙ୍ଗା ଯାଏ ସମ୍ପ୍ରସାରଣ କରିବା ଦାବି କରିଆସୁଛନ୍ତି। କିନ୍ତୁ ଆଜି ଯାଏ କୌଣସି ସୁଫଳ ମିଳି ନ ଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି।
