ରାୟଗଡ଼ା (ସ୍ବ.ପ୍ର.)/ ରାୟଗଡ଼ା ଅଫିସ ,୧୪।୪: ବ୍ରାଞ୍ଚ ପୋଷ୍ଟମାଷ୍ଟର ଚାକିରିରେ ଦ୍ୱିତୀୟ ପର୍ଯ୍ୟାୟ ସାର୍ଟିଫିକେଟ୍ ଯାଞ୍ଚବେଳେ ସନ୍ଦେହ ଘେରରେ ଜଣେ ପ୍ରାର୍ଥୀ। ସେ ହେଲେ ବିଷମକଟକ ବ୍ଲକ ଘଣ୍ଟିଖାଲ ଗ୍ରାମର ରବି ହିଆଲ।
ଡାକ ବିଭାଗର ବ୍ରାଞ୍ଚ ପୋଷ୍ଟମାଷ୍ଟର ଚାକିରି ପାଇଁ ଆବେଦନ କରିଥିଲେ ରବି। ପ୍ରଥମ ପର୍ଯ୍ୟାୟରେ ରବିଙ୍କ ସାର୍ଟିଫିକେଟ ସମସ୍ତ ନଥିପତ୍ର ଯାଞ୍ଚ କରାଯାଇଥିଲା। ପରେ ତାଙ୍କୁ ନିଜର ସମସ୍ତ ଅରିଜିନାଲ ଡକ୍ୟୁମେଣ୍ଟ ସହ ରାୟଗଡ଼ା ଡାକ ଡିଭିଜନ କାର୍ଯ୍ୟାଳୟକୁ ଆସିବାକୁ କୁହାଯାଇଥିଲା। ରବି ଗୁରୁବାର ସମସ୍ତ ସାର୍ଟିଫିକେଟ ନେଇ ଆସିଥିଲେ ା ବ୍ରାଞ୍ଚ ପୋଷ୍ଟମାଷ୍ଟର ପାଇଁ ଯୋଗ୍ୟତା ଦଶମ ଶ୍ରେଣୀ ରହିଥିବାରୁ ରବିଙ୍କ ଦଶମ ଶ୍ରେଣୀ ସାର୍ଟିଫିକେଟ ଯାଞ୍ଚ କରାଯାଇଥିଲା। ରବି ହିଆଲଙ୍କ ସାର୍ଟିଫିକେଟ ଅନୁଯାୟୀ, ସେ ୨୦୧୧ରେ ଉତ୍ତରପ୍ରଦେଶ ରାଜ୍ୟର ମାଧ୍ୟମିକ ଶିକ୍ଷା ବୋର୍ଡରୁ ଦଶମ ଶ୍ରେଣୀରେ ପାସ୍ କରିଥିବା ଉଲ୍ଲେଖ ରହିଛି। ସେ ପ୍ରତ୍ୟେକ ବିଷୟରେ ୯୯ ପ୍ରତିଶତ ମାର୍କ ରଖିବା ସତ୍ତ୍ୱେ ଏହାର ୧୦ ବର୍ଷ ପରେ ବି.ଟେକ୍ରେ କାହିଁକି ଜଏନ କରିଛନ୍ତି ତାହା ରାୟଗଡ଼ା ଡାକ ଡିଭିଜନ ସହକାରୀ ଅଧୀକ୍ଷକ ସି.ଏଚ୍.ଜୱାହର ରାଓଙ୍କ ମନରେ ସନ୍ଦେହ ସୃଷ୍ଟି କରିଥିଲା। ଦ୍ୱିତୀୟ ପର୍ଯ୍ୟାୟ ତଦନ୍ତରେ ସହକାରୀ ଅଧୀକ୍ଷକ ରାଓ ଡିଜି ଲକର ଏବଂ ବୋର୍ଡ ୱେବ୍ସାଇଟରେ ରବିଙ୍କ ସାର୍ଟିଫିକେଟ ତଦନ୍ତ କରିଥିଲେ ମଧ୍ୟ ସେଠାରେ ତାହାର କୌଣସି ଖୋଜଖବର ପାଇ ନ ଥିଲେ। ଏହାପରେ ସେ ରବିଙ୍କୁ କିଛି ପ୍ରଶ୍ନ କରିଥିଲେ। ରବି ତାହାର ସନ୍ତୋଷଜନକ ଉତ୍ତର ଦେଇପାରି ନ ଥିଲେ। ଏଣୁ ରାଓ ଏନେଇ ରାୟଗଡ଼ା ଟାଉନ ଥାନାକୁ ଜଣାଇଥିଲେ। ଉକ୍ତ ସାର୍ଟିଫିକେଟ୍ର ସତ୍ୟତା ପାଇଁ ପୋଲିସକୁ ତଦନ୍ତ ଦାୟିତ୍ୱ ଦିଆଯିବ ବୋଲି ରାଓ ସୂଚନା ଦେଇଛନ୍ତି। ସାର୍ଟିଫିକେଟ୍କୁ ନେଇ ରବିଙ୍କୁ ପ୍ରଶ୍ନ କରିବାରୁ ସେ ଠିକ୍ଭାବେ ଉତ୍ତର ଦେଇ ପାରି ନ ଥିଲେ। କେତେବେଳେ ସେ ସାର୍ଟିଫିକେଟ୍ କିଣିଥିବା ତ କେତେବେଳେ ସେ ଜାଣିନାହାନ୍ତି କହୁଛନ୍ତି। ପୋଲିସ ତଦନ୍ତ ପରେ ପ୍ରକୃତ ସତ୍ୟ ସାମ୍ନାକୁ ଆସିବ ବୋଲି ରାଓ କହିଛନ୍ତି। ପ୍ରକାଶ ଯେ, ରାୟଗଡ଼ା ଡାକ ଡିଭିଜନରେ ବ୍ରାଞ୍ଚ ପୋଷ୍ଟମାଷ୍ଟର, ଆସିଷ୍ଟାଣ୍ଟ ପୋଷ୍ଟମାଷ୍ଟର ଓ ଡାକ ସେବକ ପାଇଁ ୭୮ଟି ପଦବୀ ରହିଛି। ତେବେ ରାୟଗଡ଼ା ଡିଭିଜନ କାର୍ଯ୍ୟାଳୟରେ ୬୮ଜଣଙ୍କୁ ଯାଞ୍ଚ ପାଇଁ ସୂଚନା ହୋଇଥିବାବେଳେ ପ୍ରଥମ ପର୍ଯ୍ୟାୟରେ ୪୫ଜଣ ଆସି ସାର୍ଟିଫିକେଟ ଯାଞ୍ଚ କରାଇଥିଲେ। ଅନ୍ଲାଇନରେ ଯାଞ୍ଚବେଳେ ଏହା ହେଉଛି ପ୍ରଥମ ମାମଲା ଯାହା ସନ୍ଦେହଘେରକୁ ଆସିଛି। ଏହିଭଳି ନିରପେକ୍ଷ ତଦନ୍ତ କରାଗଲେ ଆଗକୁ ଆହୁରି ବହୁ ନକଲି ସାର୍ଟିଫିକେଟ ମାମଲାର ପର୍ଦ୍ଦାଫାଶ ହୋଇପାରିବ ବୋଲି ବୁଦ୍ଧିଜୀବୀ କହିଛନ୍ତି।
