ଭୁବନେଶ୍ୱର, ୧୦ । ୧୦(ବ୍ୟୁରୋ): ସାଇକେଲ ଚଲାଇଲେ ଶରୀର ସୁସ୍ଥ ରହିବା ସହ ପରିବେଶ ଉପରେ ସୁପ୍ରଭାବ ପଡ଼ିବ। ସାଇକେଲ ପ୍ରତି ଲୋକଙ୍କ ଉତ୍ସାହ ବୃଦ୍ଧି ନିମନ୍ତେ ଭୁବନେଶ୍ୱର ସ୍ମାର୍ଟ ସିଟି ଲିମିଟେଡ୍ ଓ ଭୁବନେଶ୍ୱର ମହାନଗର ନିଗମ ପକ୍ଷରୁ ଅଭିନବ ପରିକଳ୍ପନା ‘ସାଇକେଲ୍ ଗିରି’ର ଶୁଭାରମ୍ଭ ହୋଇଛି। ଶୁକ୍ରବାର ସକାଳ ୬ଟା ୩୦ରେ ଶିଶୁ ଭବନ ଛକଠାରେ ଏକ ସାଇକ୍ଲୋଥୋନ୍କୁ ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ ଉଦ୍ଘାଟନ କରିଥିଲେ। ଛୋଟପିଲାଙ୍କଠାରୁ ଆରମ୍ଭ କରି ବହୁ ବିଶିଷ୍ଟ ବ୍ୟକ୍ତି, ଯୁବକ ଓ ସଚେତନ ନାଗରିକ ସାଇକେଲ ଧଉଳି ପର୍ଯ୍ୟନ୍ତ ୧୨ କି.ମି. ଯାତ୍ରା କରି ନୂଆ ବାର୍ତ୍ତା ଦେଇଥିଲେ। ଏହି ଅବସରରେ ପ୍ରତି ଶୁକ୍ରବାର ସାଇକେଲ ଚଲାଇବାକୁ ଚୌଧାରୀ ଆହ୍ବାନ ଦେଇଥିଲେ। ସେ କହିଛନ୍ତି ଯେ, ନାଗରିକମାନଙ୍କୁ ସାଇକେଲ ଚଳାଇବାକୁ ପ୍ରୋତ୍ସାହିତ କରିବା ତଥା ଉଭୟ ସ୍ବାସ୍ଥ୍ୟ ଏବଂ ପରିବେଶକୁ ଲାଭ ପହଞ୍ଚାଇବା ଉଦ୍ଦେଶ୍ୟରେ ଏହି ସାଇକେଲଗିରିର ପ୍ରାରମ୍ଭ କରାଯାଇଛି। ଆମେ ସମାଜରେ ସାଇକେଲ ଚାଳକଙ୍କୁ ସମ୍ମାନ ଦେବା ପାଇଁ ଲୋକଙ୍କ ନିକଟରେ ସଚେତନତା ସୃଷ୍ଟି କରିବା ପାଇଁ ଏହି ସାଇକେଲ ରାଲିର ଆୟୋଜନ କରିଛୁ। ଲୋକଙ୍କୁ ପ୍ରତ୍ୟେକ ଶୁକ୍ରବାର ସାଇକେଲ ଚଲାଇବା ପାଇଁ ସୁଅଭ୍ୟାସ ରଖିବାକୁ ଅନୁରୋଧ କରୁଛୁ। ଏହାଦ୍ୱାରା ଆଗାମୀ ଦିନରେ ନିଜ ସହରକୁ ସ୍ବଚ୍ଛ ସବୁଜ କରାଯାଇପାରିବ। ଲୋକେ ସାଇକେଲରେ ନିଜ କର୍ମକ୍ଷେତ୍ରକୁ ଯିବା ଆସିବା କରି ସୁସ୍ଥତା ଆପଣାଇବା ପାଇଁ ଉତ୍ସାହ ସୃଷ୍ଟି କରିବା ଏହି କାର୍ଯ୍ୟକ୍ରମର ଲକ୍ଷ୍ୟ ବୋଲି ଚୌଧାରୀ କହିଛନ୍ତି। ଏହାବ୍ୟତୀତ କରୋନା ମହାମାରୀ ସମୟରେ ନିଜ ଜୀବନକୁ ବାଜି ଲଗାଇ ପ୍ରତ୍ୟେକ୍ଷ ଓ ପରୋକ୍ଷ ରୂପେ ରୋଗୀଙ୍କ ସେବାରେ ନିୟୋଜିତ ଥିବା କୋଭିଡ୍ ଯୋଦ୍ଧାଙ୍କୁ ସାଇକେଲ ଉପହାର ଆକାରରେ ପ୍ରଦାନ କରାଯାଇଥିଲା। ଏଥିସହ ସାଇକେଲ ଚଳାଳିଙ୍କୁ ସମ୍ମାନ ଉଦ୍ଦେଶ୍ୟରେ ସଙ୍ଗୀତର ଶୁଭାରମ୍ଭ ହୋଇଛି।
