ଭୁବନେଶ୍ୱର, ୬।୯(ଅନିଲ ଦାସ):ଓଡ଼ିଶା ଦ୍ରବ୍ୟ ଓ ସେବା କର(ଜିଏସ୍ଟି) ଅଧିନିୟମରେ ଥିବା ବ୍ୟବସ୍ଥାଗୁଡ଼ିକୁ ସରଳ କରିବା ଏବଂ କରଦାତାମାନଙ୍କୁ ଅଧିକ ସୁବିଧା ଦେବା ଲାଗି ଓଡ଼ିଶା ଦ୍ରବ୍ୟ ଓ ସେବାକର ଅଧିନିୟମ,୨୦୧୭ରେ ସଂଶୋଧନ କରାଯାଇଛି। ଅର୍ଥ ବିଭାଗ ପକ୍ଷରୁ ଦିଆଯାଇଥିବା ଏହି ପ୍ରସ୍ତାବକୁ ରାଜ୍ୟ କ୍ୟାବିନେଟ ବୁଧବାର ଅନୁମୋଦନ କରିଛି। ତୃତୀୟ ପକ୍ଷଠାରୁ ମୁଖ୍ୟ କାର୍ଯ୍ୟାଳୟ ଦ୍ବାରା ନିଜର ଉପଯୋଗ କିମ୍ବା ଶାଖା ଅଫିସରେ ଉପଯୋଗ ଲାଗି କ୍ରୟ କରାଯାଇଥିବା ସେବା ହେତୁ ଉପଲବ୍ଧ ଇନପୁଟ୍ କର ଜମାର ବଣ୍ଟନ ପାଇଁ, ଅଧିନିୟମର ଧାରା ୨୦ରେ ଧାର୍ଯ୍ୟ କରାଯାଇଥିବା ଇନପୁଟ୍ ସର୍ଭିସ୍ ଡିଷ୍ଟ୍ରିବ୍ୟୁଟର ପ୍ରକ୍ରିୟାକୁ ବାଧ୍ୟତାମୂଳକ କରାଯିବ। ଧାରା (୨)ର ଉପ-ଧାରା (୬୧)କୁ ପ୍ରତିସ୍ଥାପିତ କରିବା ମାଧ୍ୟମରେ ଇନପୁଟ୍ ସର୍ଭିସ୍ ଡିଷ୍ଟ୍ରିବ୍ୟୁଟରମାନେ ବାଧ୍ୟତାମୂଳକ ଭାବେ ଇନପୁଟ୍ କର ଜମାର ବଣ୍ଟନକାରୀ ଭାବେ ପରିଗଣିତ ହେବେ। ସେମାନଙ୍କ ଦ୍ବାରା ଗ୍ରହଣ କରାଯାଇଥିବା ସେବା ଉପରେ ଓଡ଼ିଶା ଦ୍ରବ୍ୟ ଓ ସେବା କର ଅଧିନିୟମ, ୨୦୧୭ ଧାରା ୯(୩) ଏବଂ ୯(୪) ଅନୁଯାୟୀ ବିପରୀତ ଚାର୍ଜ ବ୍ୟବସ୍ଥା ଅଧୀନରେ କର ପ୍ରଦାନ କରିବେ । ଯଦି ଏକ ମୁଖ୍ୟ କାର୍ଯ୍ୟାଳୟ ନିଜର ଉପଯୋଗ ତଥା ଶାଖା କାର୍ଯ୍ୟାଳୟଗୁଡ଼ିକ ଉପଯୋଗ ଲାଗି ସାଧାରଣ ଇନପୁଟ୍ ସେବା କ୍ରୟ କରୁଥିବେ ଏବଂ ଭିନ୍ନ ଭିନ୍ନ ପଞ୍ଜୀକୃତ ବ୍ୟକ୍ତିଙ୍କୁ ଇନପୁଟ୍ କର ଜମା ବଣ୍ଟନ କରୁଥିବେ ତେବେ ଇନପୁଟ୍ ସର୍ଭିସ୍ ଡିଷ୍ଟ୍ରିବ୍ୟୁଟର (ଆଇଏସ୍ଡି) ଭାବରେ ସେମାନଙ୍କର ପଞ୍ଜୀକରଣ ବାଧ୍ୟତାମୂଳକ ହେବ। ପୂର୍ବରୁ ଏକ ସର୍କୁଲାର ଜରିଆରେ ସ୍ପଷ୍ଟ କରାଯାଇଥିଲା ଯେ ମୁଖ୍ୟ କାର୍ଯ୍ୟାଳୟ ପାଖରେ ଇନପୁଟ୍ ସର୍ଭିସ୍ ଡିଷ୍ଟ୍ରିବ୍ୟୁଟର ବ୍ୟବସ୍ଥା କିମ୍ବା କ୍ରସ ଚାର୍ଜ ପଥ ଅନୁସରଣ କରି ଏଭଳି ସାଧାରଣ ଇନପୁଟ୍ ସେବାରୁ ଉପଲବ୍ଧ ଇନପୁଟ୍ କର ଜମାକୁ ବଣ୍ଟନ କରିବାର ବିକଳ୍ପ ଅଛି। ଇନପୁଟ୍ ସର୍ଭିସ୍ ଡିଷ୍ଟ୍ରିବ୍ୟୁଟର ମାର୍ଗ ସେମାନଙ୍କ ଲାଗି ବାଧ୍ୟତାମୂଳକ ନ ଥିଲା। ଇନପୁଟ୍ ସର୍ଭିସ୍ ଡିଷ୍ଟ୍ରିବ୍ୟୁଟର ବ୍ୟବସ୍ଥା ଦ୍ବାରା ମିଳିଥିବା ସେବା ଉପରେ ଆଦାୟ କରାଯାଉଥିବା କେନ୍ଦ୍ରୀୟ କର ବା ସମନ୍ବିତ କର ଜମା ବଣ୍ଟନ କରିବା ପାଇଁ ଏବେ କଟକଣା ଓ ସର୍ତ୍ତାବଳୀ ସହିତ ଏକ ନୂତନ ପଦ୍ଧତି ପ୍ରଚଳନ କରାଯିବ । ସରକାରଙ୍କ ଦ୍ବାରା ବିଜ୍ଞାପିତ ସ୍ବତନ୍ତ୍ର ପ୍ରକ୍ରିୟା ଅନୁଯାୟୀ ପାନ ମସଲା, ତମାଖୁ ଇତ୍ୟାଦି ଦ୍ରବ୍ୟ ଉତ୍ପାଦନରେ ବ୍ୟବହୃତ କେତେକ ମେଶିନ ପଞ୍ଜୀକରଣ କରିବାରେ ବିଫଳ ହେଲେ ଜରିମାନା ବ୍ୟବସ୍ଥା କରିବା ପାଇଁ ଏକ ନୂତନ ଧାରା ୧୨୨କ’ ଅନ୍ତର୍ଭୁକ୍ତ କରାଯିବ। ଓଡ଼ିଶା ଦ୍ରବ୍ୟ ଓ ସେବା କର ଅଧିନିୟମ, ୨୦୧୭ର ଧାରା ୩(କ)ର ସଂଶୋଧନ ମାଧ୍ୟମରେ ଆୟୁକ୍ତ, ବାଣିଜ୍ୟ କର ଏବଂ ଦ୍ରବ୍ୟ ଓ ସେବା କରଙ୍କ ପଦବୀର ନାମକୁ ପରିବର୍ତ୍ତିତ କରି ସେ ଯଦି ପ୍ରମୁଖ ଶାସନ ସଚିବ ପାହ୍ୟାର ହୋଇଥିବେ ତେବେ ତାଙ୍କୁ ମୁଖ୍ୟ ଆୟୁକ୍ତ, ବାଣିଜ୍ୟ କର ଏବଂ ଦ୍ରବ୍ୟ ଓ ସେବା କର ଭାବେ ନାମିତ କରାଯିବ।
