ଭୁବନେଶ୍ୱର,୧୬ା୧୦(ବ୍ୟୁରୋ): ଗ୍ରାମାଞ୍ଚଳ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବାକୁ ରାଜ୍ୟ ସରକାର ପ୍ରାଥମିକତା ଦେଉଛନ୍ତି। ଜଳ ଜୀବନ ମିଶନ(ଜେଜେଏମ୍) ଯୋଜନାରେ ସରକାର ରାଜ୍ୟର ୪ଟି ଜିଲା ଖୋର୍ଦ୍ଧା,କଳାହାଣ୍ଡି, ବରଗଡ଼ ଓ ନୟାଗଡ଼ ଜିଲାର ୧୧ଟି ବ୍ଲକରେ ଥିବା ୨୩୦ ପଞ୍ଚାୟତର ୧୨୫୬ ଗ୍ରାମର ୧୨ ଲକ୍ଷ ୧୭ ହଜାର ଲୋକଙ୍କୁ ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଇ ଦେବେ। ଏ ବାବଦରେ ୧୬୫୩.୯୫ କୋଟି ଟଙ୍କା ବ୍ୟୟବରାଦ କରାଯାଇଛି। ଏହି ପ୍ରକଳ୍ପକୁ ରାଜ୍ୟ କ୍ୟାବିନେଟର ଏକ ଗୁରୁତ୍ୱପୂର୍ଣ୍ଣ ବୈଠକରେ ଅନୁମୋଦନ କରାଯାଇଛି। ଶନିବାର ଅପରାହ୍ନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ମୋଟ ୯ଟି ପ୍ରସ୍ତାବକୁ ଅନୁମୋଦନ କରାଯାଇଛି।
ବୈଠକ ଶେଷରେ ଗଣମାଧ୍ୟମକୁ ସୂଚନା ଦେଇ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କହିଛନ୍ତି ଯେ ଖୋର୍ଦ୍ଧା ଜିଲାର ୪ଟି ବ୍ଲକର ୬୩ ପଞ୍ଚାୟତ ଅନ୍ତର୍ଗତ ୩୫୬ ଗ୍ରାମର ୪,୧୬,୮୮୬ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦିଆଯିବ। ଟାଙ୍ଗୀ ବ୍ଲକର ୧୭ଟି ପଞ୍ଚାୟତର ୧୧୦ଟି ଗ୍ରାମର ୧,୦୩,୦୮୫ ଜଣ, ଭୁବନେଶ୍ୱର ବ୍ଲକର ୧୫ ପଞ୍ଚାୟତର ୮୭ ଗ୍ରାମର ୯୧,୩୪୫ ଜଣଙ୍କୁ ପାନୀୟ ଜଳ ଯୋଗାଇ ଦିଆଯିବ। ଏଥିରେ ଏକାମ୍ର ନିର୍ବାଚନମଣ୍ଡଳୀର ୬ଟି ପଞ୍ଚାୟତ ରହିଛି। ସେହିପରି ବାଲିପାଟଣା ବ୍ଲକର ୧୫ ପଞ୍ଚାୟତର ୭୫ ଗ୍ରାମର ୧,୦୭,୯୯୭ ଏବଂ ବାଲିଅନ୍ତା ବ୍ଲକର ୧୬ଟି ପଞ୍ଚାୟତର ୮୪ ଗ୍ରାମର ୧,୧୪,୪୫୯ ଲୋକଙ୍କୁ ପାନୀୟ ଜଳ ଯୋଗାଇ ଦିଆଯିବ। ଏହି ପାନୀୟ ଜଳ ପ୍ରକଳ୍ପ ପାଇଁ ୫୫୬ କୋଟି ୫୧ଲକ୍ଷ ୫ ହଜାର ୯୦୫ ଟଙ୍କାର ଟେଣ୍ଡରକୁ ରାଜ୍ୟ କ୍ୟାବିନେଟ ଅନୁମୋଦନ କରିଛି। ପ୍ରକଳ୍ପଗୁଡ଼ିକ ୨୪ ମାସ ମଧ୍ୟରେ ଶେଷ କରିବାକୁ ଲକ୍ଷ୍ୟଧାର୍ଯ୍ୟ କରାଯାଇଛି।
ସେହିପରି ଜେଜେଏମ୍ ମିଶନ ଯୋଜନାରେ କଳାହାଣ୍ଡି ଜିଲାର ୨ଟି ବ୍ଲକ ଧୁଆମୂଳରାମପୁର ଓ କୋକସରା ବ୍ଲକର ୩୬ ପଞ୍ଚାୟତର ୧୫୫ ଗ୍ରାମର ୧,୨୬,୩୨୮ ଲୋକଙ୍କୁ ନିରାପଦ ପାନୀୟ ଜଳ ଯୋଗାଇ ଦିଆଯିବ। ଏହି ପ୍ରକଳ୍ପ ପାଇଁ ଡକାଯାଇଥିବା ୨୪୮ କୋଟି ୯୧ ଲକ୍ଷ ୫ ହଜାର ଟଙ୍କାର ଟେଣ୍ଡରକୁ କ୍ୟାବିନେଟ ଅନୁମୋଦନ ମିଳିଛି। ଏହି ପ୍ରକଳ୍ପ କାର୍ଯ୍ୟ ୨ ବର୍ଷରେ ଶେଷ କରିବାକୁ ଲକ୍ଷ୍ୟ ରଖାଯାଇଛି।
ଜେଜେଏମ୍ ମିଶନ ଯୋଜନାରେ ବରଗଡ଼ ଜିଲାର ୩ଟି ବ୍ଲକ ଅମ୍ବାଭୋନା, ଭଟଲି ଓ ସୋହେଲା ବ୍ଲକର ୫୮ଟି ପଞ୍ଚାୟତର ୩୧୬ ଗ୍ରାମର ୨,୯୫,୨୯୦ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦିଆଯିବ। ଅମ୍ବାଭୋନା ବ୍ଲକର ୧୫ ପଞ୍ଚାୟତର ୧୦୪ ଗ୍ରାମର ୬୫,୭୧୫ ଜଣ, ଭଟଲି ବ୍ଲକର ୧୬ ପଞ୍ଚାୟତର ୮୪ ଗ୍ରାମର ୯୦୩୨୧ ଜଣ ଏବଂ ସୋହେଲା ବ୍ଲକର ୨୭ ପଞ୍ଚାୟତର ୧୨୮ ଗ୍ରାମର ୧,୯୩,୨୫୪ ଜଣଙ୍କୁ ପାନୀୟ ଜଳ ଯୋଗାଇ ଦିଆଯିବ। ଏହି ପ୍ରକଳ୍ପ ପାଇଁ ଡକାଯାଇଥିବା ୪୫୩ କୋଟି ୧୦ ଲକ୍ଷ ୩୩ ହଜାର ଟଙ୍କାର ଟେଣ୍ଡରକୁ କ୍ୟାବିନେଟ ମୋହର ଲାଗିଛି। ପ୍ରକଳ୍ପଗୁଡ଼ିକ ୨୪ ମାସ ମଧ୍ୟରେ ଶେଷ କରିବାକୁ ଲକ୍ଷ୍ୟଧାର୍ଯ୍ୟ କରାଯାଇଛି।
ସେହିପରି ଜଳ ଜୀବନ ମିଶନ ଯୋଜନାରେ ନୟାଗଡ଼ ଜିଲାର ୨ଟି ବ୍ଲକ ରଣପୁର ଏବଂ ଓଡ଼ଗାଁ ବ୍ଲକ ଅଧୀନରେ ଥିବା ୭୩ ପଞ୍ଚାୟତର ୪୨୯ ଗ୍ରାମର ପ୍ରାୟ ୩,୦୮,୨୩୧ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦିଆଯିବ। ଏଥିପାଇଁ ଡକାଯାଇଥିବା ୩୯୫ କୋଟି ୪୩ ଲକ୍ଷ ୭୯ ହଜାର ୭୨୨ ଟଙ୍କାର ଟେଣ୍ଡରକୁ କ୍ୟାବିନେଟ ମଞ୍ଜୁରୀ ମିଳିଛି। ଏହି ପ୍ରକଳ୍ପ କାର୍ଯ୍ୟ ୨୪ ମାସ ମଧ୍ୟରେ ଶେଷ କରିବାକୁ ଲକ୍ଷ୍ୟ ରଖାଯାଇଛି।
