ଭୁବନେଶ୍ୱର, ୨।୧୦(ବ୍ୟୁରୋ):ରାଜ୍ୟରେ କୋଭିଡ୍ ସଂକ୍ରମଣ ସମ୍ପୂର୍ଣ୍ଣ ନିୟନ୍ତ୍ରଣକୁ ଆସି ନାହିଁ। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ଗୁରୁବାର ଅକ୍ଟୋବର ପାଇଁ ଗାଇଡ୍ଲାଇନ ଜାରି କରିଛନ୍ତି। ଏ ନେଇ ସ୍ବତନ୍ତ୍ର ରିଲିଫ କମିଶନରଙ୍କ କାର୍ଯ୍ୟାଳୟ ପକ୍ଷରୁ ବିଜ୍ଞପ୍ତି ପ୍ରକାଶ କରାଯାଇଛି।
ବିଜ୍ଞପ୍ତି ଅନୁଯାୟୀ ଆସନ୍ତା ୩୧ ଯାଏ ରାଜ୍ୟରେ ମଠ ମନ୍ଦିର, ସିନେମା ହଲ୍, ଶିକ୍ଷାନୁଷ୍ଠାନ ବନ୍ଦ ରହିବ। ଆସନ୍ତା ନଭେମ୍ବର ୩ ତାରିଖରେ ବାଲେଶ୍ୱର ଏବଂ ତିର୍ତ୍ତୋଲ ଉପନିର୍ବାଚନ ଥିବାରୁ ଭାରତର ନିର୍ବାଚନ ଆୟୋଗଙ୍କ ନିର୍ଦ୍ଦେଶାନୁସାରେ ସେହି ନିର୍ବାଚନ ମଣ୍ଡଳୀଗୁଡିକରେ ସର୍ବାଧିକ ୧୦୦ ଜଣଙ୍କୁ ନେଇ ସମାବେଶ କରିବାକୁ ଅନୁମତି ଦିଆଯାଇଛି। ତେବେ ଏହି ସମୟ ମଧ୍ୟରେ ଅନ୍ୟାନ୍ୟ ଅଞ୍ଚଳରେ ସାମାଜିକ, ରାଜନୈତିକ, ଧାର୍ମିକ, ସାଂସ୍କୃତିକ ସମାବେସ ଉପରେ କଟକଣା ବଳବତ୍ତର ରହିଛି।
ସଂକ୍ରମିତ ଅଞ୍ଚଳରେ ପୂର୍ବଭଳି ଲକ୍ଡାଉନ ଜାରି ରହିବ। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଗାଇଡ୍ଲାଇନ ଅନୁଯାୟୀ ସ୍ଥାନୀୟ ଅଧିକାରୀମାନେ ସଂକ୍ରମିତ ଜୋନ୍ ଚିହ୍ନଟ କରିବେ। ସେହି ସବୁ ଅଞ୍ଚଳରେ କେବଳ ଅତ୍ୟାବଶ୍ୟକ ସାମଗ୍ରୀ ପରିବହନ ବ୍ୟତୀତ ଅନ୍ୟ କୌଣସି ପ୍ରକାର ଯାତାୟାତକୁ ବାରଣ କରାଯାଇଛି। ଘରକୁ ଘର ବୁଲି ସଂକ୍ରମିତଙ୍କ ପର୍ଯ୍ୟବେକ୍ଷଣ କାର୍ଯ୍ୟ ଜାରି ରହିବ। ସଂକ୍ରମିତ ଅଞ୍ଚଳ ବାହାରେ କୌଣସି ପ୍ରଶାସନ ଲକ୍ଡାଉନ ଘୋଷଣା କରି ପାରିବେ ନାହିଁ।
ସଂକ୍ରମିତ ଅଞ୍ଚଳ ବାହାରେ ଆସନ୍ତା ୩୧ ତାରିଖ ଯାଏ ଧାର୍ମିକ ଅନୁଷ୍ଠାନ, ସ୍କୁଲ କଲେଜ, ବିଶ୍ୱବିଦ୍ୟାଳୟ, କୋଚିଂ ସେଣ୍ଟର, ଅଙ୍ଗନଓ୍ବାଡି କେନ୍ଦ୍ର ବନ୍ଦ ରହିବ। ଅନଲାଇନ ପାଠପଢା ଜାରି ରହିବ। ସ୍କୁଲ ଓ ଗଣଶିକ୍ଷା ବିଭାଗ, ଉଚ୍ଚଶିକ୍ଷା ବିଭାଗ ଶିକ୍ଷକ ଓ କର୍ମଚାରୀମାନଙ୍କୁ ଅନ୍ଲାଇନ କ୍ଲାସ, ଟେଲି କାଉନ୍ସେଲିଂ କାର୍ଯ୍ୟ ପାଇଁ ଅନୁମତି ଦେଇପାରିବେ। ଯଦି କୌଣସି ଅଡିଟୋରିୟମ କିମ୍ବା ସମ୍ମିଳନୀ କକ୍ଷରେ ସମାବେଶ କରାଯିବ ତେବେ ସମୁଦାୟ ଆସନ ସଂଖ୍ୟାର ୫୦ ପ୍ରତିଶତ ଅର୍ଥାତ୍ ସର୍ବାଧିକ ୧୦୦ଜଣଙ୍କୁ ଅନୁମତି ଦିଆଯିବ। ଖୋଲା ସ୍ଥାନରେ ଆୟତନ ଅନୁଯାୟୀ ୧୦୦ ଜଣରୁ ଅଧିକ ଲୋକଙ୍କୁ ଏକାଠି ହେବାକୁ ଦିଆଯିବ ନାହିଁ। ଉପନିର୍ବଚନ ବେଳେ ସମ୍ପୃକ୍ତ ଜିଲାର ଜିଲାପାଳ ରାଜନୈତିକ ସମାବେଶକୁ ନେଇ କଟକଣା ଜାରି କରିପାରିବେ। ସୁଇମିଂପୁଲ୍, ଥିଏଟର, ଆସେମ୍ବ୍ଲ୍ଲି , ଅଡିଟୋରିୟମ ଇଦ୍ୟାଦି ଅକ୍ଟୋବର ୩୧ ତାରିଖ ଯାଏ ବନ୍ଦ ରହିବ। ଅକ୍ଟୋବର ୧୫ ପରେ କେତେକ କାର୍ଯ୍ୟକଳାପ ପାଇଁ ସ୍ବରାଷ୍ଟ୍ର ମନ୍ତ୍ରଣାଳୟ ଗାଇଡ୍୍ଲାଇନ ଜାରି କରିବେ। ଏହା ପରେ ରାଜ୍ୟ ସରକାର ନିୟମାବଳୀ ଜାରି କରିବେ। ଏଥିସହିତ ସାମାଜିକ ଦୂରତା, ମାସ୍କ ପିନ୍ଧିବାକୁ କଡାକଡି କରିବା ସହ ସର୍ବସାଧାରଣ ସ୍ଥାନରେ ପାନ, ଗୁଟ୍ଖା ଛେପ ପକାଇବା ଉପରେ କଟକଣା ଜାରି କରାଯାଇଛି।
ଶୁକ୍ରବାର ବିଧାନସଭା ବନ୍ଦ
ଭୁବନେଶ୍ୱର,୧ା୧୦(ବ୍ୟୁରୋ)- ଅକ୍ଟେବାର ୨ ଗାନ୍ଧୀ ଜୟନ୍ତୀ ପାଇଁ ଶୁକ୍ରବାର ବିଧାନସଭା ବନ୍ଦ ରହିବ। ଶନିବାର ପୂର୍ବାହ୍ନ ୧୦ଟା ୩୦ ମିନିଟରେ ବିଧାନସଭା ଆରମ୍ଭ ହେବ ବୋଲି ବାଚସ୍ପତି ସୂର୍ଯ୍ୟନାରାୟଣ ପାତ୍ର ଗୁରୁବାର ବିଧାନସଭାରେ ସୂଚନା ଦେଇଛନ୍ତି। ତେବେ ଆସନ୍ତା ରବିବାର ଛୁଟି ସତ୍ତ୍ୱେ ବିଧାନସଭା କାର୍ଯ୍ୟ ଚାଲୁ ରହିବ। ଚଳିତ ମୌସୁମୀ ଅଧିବେଶନ ମାତ୍ର ୮ ଦିନ ପାଇଁ ବସୁଥିବାରୁ ରବିବାର ବିଧାନସଭା ଚଲାଇବା ପାଇଁ ନିଷ୍ପତ୍ତି ହୋଇଛି।
