କାନପୁର, ୨୫।୧୨: ଉତ୍ତରପ୍ରଦେଶରେ କେବଳ ଜଣେ ବ୍ୟକ୍ତିଙ୍କ ଘରୁ ବିପୁଳ ପରିମାଣର ନଗଦ ଜବତ ହୋଇଛି। ଅତର ବ୍ୟବସାୟୀ ପୀୟୂଷ ଜୈନଙ୍କ ଘରୁ ଆୟକର ଚଢ଼ାଉ ସମୟରେ ବିଡ଼ା ବିଡ଼ା ନଗଦ ୧୮୦ କୋଟି ଟଙ୍କା ଜବତ ହୋଇଛି। ଏହାକୁ ୮୦ଟି ବାକ୍ସ୍ରେ ଭର୍ତ୍ତି କରି ବୋହି ନିଆଯାଇଛି।ଜବତ ହୋଇଥିବା ଟଙ୍କା ୨୦୨୦ ସରକାରୀ ରିପୋର୍ଟ ଅନୁସାରେ ଦେଶର ପ୍ରାୟ ୧୨୩୫୫ ଲୋକଙ୍କ ମୁଣ୍ଡପିଛା ରୋଜଗାର ହେବ ବୋଲି କୁହାଯାଉଛି। ଆୟକର ବିଭାଗ ତାଙ୍କ ଘରୁ ନୋଟରେ ପରିପୂର୍ଣ୍ଣ ଏକ ଆଲମାରୀ ମଧ୍ୟ ପାଇଥିବା ଜଣାଯାଇଛି। କେବଳ ଏତିକି ନୁହେଁ, ତାଙ୍କ ଘରେ ଏକ ବେସମେଣ୍ଟ ବିଷୟରେ ମଧ୍ୟ ଖବର ମିଳିଛି।
ପୀୟୂଷଙ୍କ ମୁମ୍ବାଇ, କନୌଜ, ଗୁଜରାଟ ଏବଂ କାନପୁରରେ ଥିବା ଘରେ ଏକାଦିକ୍ରମେ ଚଢ଼ାଉ ଜାରି ରହିଛି। ତାଙ୍କ ଘରେ ଆୟକର ଚଢ଼ାଉ ୟୁପି ନିର୍ବାଚନ ସହ ଜଡିତ ଥିବା ନେଇ ଚର୍ଚ୍ଚା ହେଉଛି। ଏହା କୁହାଯାଉଛି ଯେ ପୀୟୁଷ ସମାଜବାଦୀ ପାର୍ଟି ନେତା ଅଖିଳେଶ ଯାଦବଙ୍କ ନିକଟତମ। ଆୟକର ବିଭାଗର ଚଢ଼ାଉରେ ଜବତ ହୋଇଥିବା ଟଙ୍କା ଆରବିଆଇକୁ ହସ୍ତାନ୍ତର କରାଯିବ।
ଜବତ ହୋଇଥିବା ଟଙ୍କା ଗଣିବା ଲାଗି ୧୯ଟି ମେସିନ ଦ୍ୱାରା ମଧ୍ୟ ସମ୍ଭବ ହୋଇ ନ ଥିବା ଆୟକର ଅଧିକାରୀମାନେ କହିଛନ୍ତି। ଗତ ୩୬ ଘଣ୍ଟା ଧରି ନୋଟ ଗଣନା ଚାଲିଥିଲା। ୨୭ ଜଣ ଆୟକର ଅଧିକାରୀ ଚଢ଼ାଉରେ ନିୟୋଜିତ ଥିଲେ। ଟଙ୍କା ଗଣିବା ପାଇଁ ପ୍ରଥମେ ୬ ଟି ମେସିନ ଆସିଥିଲା। ପରେ ଆଉ ୧୩ ମେସିନ ଅଣାଯାଇଥିଲା। ପୀୟୂଷ ପ୍ରାୟ ୪୦ ଟି କମ୍ପାନୀର ମାଲିକ।
