ଦୁନିଆର ପ୍ରତିଟି ବ୍ୟକ୍ତି ଭଲ ଜୀବନସାଥୀଟିଏ ଚାହାଁନ୍ତି। ଅନେକ ଏଥିରେ ସଫଳ ହେଉଥିଲେ ହେଁ କେତେକ ନିରାଶ ହୋଇଥାନ୍ତି। ସେମାନେ ସାରାଜୀବନ ପ୍ରକୃତ ସାଥୀଟିଏ ପାଇପାରିବେ ନାହିଁ ବୋଲି ଭାବିଥାନ୍ତି। ପୂର୍ବରୁ ବିବାହକୁ ନେଇ ମଧ୍ୟସ୍ଥି, ବାୟୋଡାଟା, ମାଟ୍ରିମୋନି ଆଦି ଅନେକ କୌଶଳ ଆପଣା ଯାଉଥିଲା। ହେଲେ ଏବେ ଏହା ଭିନ୍ନ। ବ୍ରିଟେନରେ ରହୁଥିବା ଜଣେ ବ୍ୟକ୍ତି ମନ ପାଉଥିବା ଜୀବନସାଥୀ ଖୋଜିବା ଲାଗି ଏଭଳି କୌଶଳ ଆପଣାଇଛନ୍ତି ଯାହା ବିଷୟରେ ଆପଣ ଜାଣିଲେ ଆଶ୍ଚର୍ଯ୍ୟ ହୋଇଯିବେ। କାରଣ ଆଜିଯାଏ ସେଭଳି କେହି କରିନାହାନ୍ତି। ବ୍ରିଟେନ୍ରେ ରହୁଥିବା ୨୯ ବର୍ଷୀୟ ମହମ୍ମଦ ମଲିକ ପ୍ରେମ ବିବାହ କରିବା ଲାଗି ରାସ୍ତା କଡ଼ରେ ବଡ଼ ବଡ଼ ବିଜ୍ଞାପନ ଦେଇଛନ୍ତି। ଏପରି କରି ସେ ପ୍ରକୃତ ଜୀବନସାଥୀ ପାଇପାରିବେ ବୋଲି ଆଶା ରଖିଛନ୍ତି।
ଏକ ରିପୋର୍ଟ ଅନୁଯାୟୀ, ମଲିକ ‘findmalikwife.com’ ନାମକ ଏକ ଓ୍ବେବ୍ସାଇଟ୍ ସ୍ଥାପନ କରିଛନ୍ତି। ବର୍ମିଂହାମରେ ଜୀବନସାଥୀ ଖୋଜିବା ନିମନ୍ତେ ସେ ଅନେକ ହୋର୍ଡିଂ ଲଗାଇଛନ୍ତି। ହୋର୍ଡିଂରେ ମଲିକଙ୍କର ଏକ ଫଟୋ ରହିଛି। ସେଥିରେ ସେ ଶୋଇଥିବା ଅବସ୍ଥାରେ ହସୁଥିବା ଦେଖାଯାଉଛି। ସେ ଗୋଟିଏ ହାତର ଆଙ୍ଗୁଠି ଆଡକୁ ଇଙ୍ଗିତ କରି ‘ମୋତେ ଆରେଞ୍ଜ ମ୍ୟାରେଜ୍ରୁ ରକ୍ଷା କର’ ବୋଲି ଲେଖିଛନ୍ତି। ଓ୍ବେବ୍ସାଇଟ୍ ଲିଙ୍କ ମଧ୍ୟ ଏହାର ତଳେ ଦିଆଯାଇଛି।
ମଲିକ କୁହନ୍ତି, ‘ପ୍ରସ୍ତାବିତ ବିବାହର ସେ ବିରୋଧୀ ନୁହନ୍ତି। ହେଲେ ସେ ନିଜ ଇଚ୍ଛାରେ କାହାକୁ ଖୋଜିବାକୁ ଚାହାନ୍ତି। ଓ୍ବେବ୍ସାଇଟ୍ରେ ତାଙ୍କୁ ସଠିକ୍ ଝିଅ ମିଳି ନ ଥିଲା। ହେଲେ ହୋଡିଂ ଲଗାଇବା ମାତ୍ରେ ସେ ଅନେକ ପ୍ରସ୍ତାବ ପାଇଲେଣି। ଏପର୍ଯ୍ୟନ୍ତ ସେ କାହାକୁ କିଛି ଉତ୍ତର ଦେଇନାହାନ୍ତି। ଜାନୁୟାରୀ ୧୪ ଯାଏ ହୋର୍ଡିଂଗୁଡ଼ିକ ଲାଗିବ। ପରେ କଣ କରାଯିବ ସେନେଇ ନିଷ୍ପତ୍ତି ନିଆଯିବ। ’ ଏବେ ଏହି ଘଟଣା ଚାରିଆଡେ ଚର୍ଚ୍ଚାର ବିଷୟ ପାଲଟିଛି।
