ନୂଆଦିଲ୍ଲୀ,୯।୫: କୁସ୍ତି ମହାସଂଘର ଅଧ୍ୟକ୍ଷ ବ୍ରିଜ୍ ଭୂଷଣ ଶରଣ ସିଂଙ୍କ ବିରୋଧରେ ଦୀର୍ଘଦିନ ଧରି ରେସଲରମାନେ ଦିଲ୍ଲୀର ଯନ୍ତରମନ୍ତରରେ ଧାରଣା ପ୍ରଦର୍ଶନ କରୁଛନ୍ତି। ବ୍ରିଜ୍ ଭୂଷଣଙ୍କୁ ଗିରଫ ଦାବିରେ କୁସ୍ତିଯୋଦ୍ଧା ବିକ୍ଷୋଭ କରୁଥିଲେ ମଧ୍ୟ ଏହି ହେଭିଓ୍ବେଟ୍ ନେତାଙ୍କ ବିରୋଧରେ ସରକାର କୌଣସି କାର୍ଯ୍ୟନୁଷ୍ଠାନ ନେଉନାହାନ୍ତି। ତେବେ ଏହି ରାଜନେତା ତାଙ୍କ ରାଜନୈତିକ କ୍ୟାରିୟରରେ ୬ଥର ଏମ୍ପି ହୋଇଥିବା ବେଳେ ତାଙ୍କ ନାଁରେ ରହିଛି ୩୦ରୁ ଅଧିକ ଆପରାଧିକ ମାମଲା…
ବ୍ରିଜ୍ ଭୂଷଣ ୨୦୧୧ରେ ଭାରତୀୟ କୁସ୍ତି ସଂଘର ଅଧ୍ୟକ୍ଷ ହୋଇଥିଲେ। ୨୦୧୯କୁ ମିଶାଇ ସେ ଲଗାତର ତୃତୀୟ ଥର ପାଇଁ କୁସ୍ତିମହାସଂଘର ଅଧ୍ୟକ୍ଷ ଭାବେ ନିଯୁକ୍ତ ହୋଇଛନ୍ତି । ବ୍ରିଜ୍ ଭୂଷଣ ଅଧ୍ୟକ୍ଷ ସହ ୟୁପି ଭାଜପାର ଜଣେ ଟାଣୁଆ ନେତା ଭାବେ ଜଣାଶୁଣା। ସେ ୟୁପିର ଗୌଡା ଜିଲାର କେସରଗଞ୍ଜ ଆସନରେ ଭାଜପାର ଏମ୍ପି ଅଛନ୍ତି। ସେ ଲଗାତର ୬ଥର ଲୋକ ସଭା ନିର୍ବାଚନ ଜିତି ସାରିଛନ୍ତି। ନିଜର ନିର୍ଭୀକ ବୟାନ ପାଇଁ ସେ ସବୁବେଳେ ଚର୍ଚ୍ଚାରେ ରୁହନ୍ତି।
ବ୍ରିଜ୍ ଭୂଷଣ ୧୯୭୯ରୁ ଛାତ୍ରନେତା ଭାବରେ ନିଜର କ୍ୟାରିୟର ଆରମ୍ଭ କରିଥିଲେ। ଛାତ୍ର ସଂଗଠନ ନିର୍ବାଚନରେ ସେ ରେକର୍ଡ ସଂଖ୍ୟକ ଭୋଟରେ ଜିତି ଅଧ୍ୟକ୍ଷ ଭାବେ ନିର୍ବାଚିତ ହୋଇଥିଲେ। ପରେ ସେ ୧୯୮୦ ମସିହାରେ ଯୁବନେତା ଭାବରେ ପରିଚିତ ହୋଇଥିଲେ ଏବଂ ୧୯୮୮ରେ ଭାଜପାରେ ଯୋଗ ଦେଇଥିଲେ। ୧୯୯୧ ଲୋକ ସଭା ନିର୍ବାଚନରେ ରେକର୍ଡ ସଂଖ୍ୟକ ଭୋଟରେ ନିର୍ବାଚନରେ ବାଜିମାତ କରିଥିଲେ।
ବ୍ରିଜ୍ ଭୂଷଣ ୧୯୯୧ରେ ପ୍ରଥମ ଲୋକ ସଭା ନିର୍ବାଚନ ଲଢିଥିଲେ। ନିର୍ବାଚନରେ ଗୌଡା ଆସନରୁ ବିପୁଳ ଭୋଟରେ ବିଜୟୀ ହୋଇଥିଲେ। ସେ ଆନନ୍ଦ ସିଂଙ୍କୁ ରେକର୍ଡ ସଂଖ୍ୟକ ୧.୧୩ ଲକ୍ଷ ଭୋଟରେ ହରାଇଥିଲେ। ଏହାପରେ ଗୌଡା, ବଲରାମପୁର, ଅଯୋଧ୍ୟା ସମେତ ଅନେକ ଜିଲାରେ ତାଙ୍କର ପ୍ରାଧାନ୍ୟ ବୃଦ୍ଧି ପାଇଥିଲା। ୧୯୯୯ ପରେ ସେ ଏମିତି କୌଣସି ନିର୍ବାଚନ ନାହିଁ ଯେଉଁଥିରେ ସେ ଜିତି ନାହାନ୍ତି। ଯଦିଓ ବିଭିନ୍ନ ନିର୍ବାଚନରେ ତାଙ୍କ ନିର୍ବାଚନମଣ୍ଡଳୀ ପରିବର୍ତ୍ତନ ହେଉଥିଲା, କିନ୍ତୁ ଫଳାଫଳ ପ୍ରତ୍ୟେକ ଥର ତାଙ୍କ ସପକ୍ଷରେ ରହୁଥିଲା।
ଭାଜପାରେ ମତଭେଦ କାରଣରୁ ସେ ଦଳ ଛାଡିଥିଲେ। ୨୦୦୯ ଲୋକ ସଭା ନିର୍ବାଚନରେ ସେ ସପା(ସମାଜବାଦୀ ପାର୍ଟି) ଟିକେଟରେ କେସରଗଞ୍ଜ ଆସନରୁ ଜିତିଥିଲେ। କିନ୍ତୁ ୨୦୧୪ ନିର୍ବାଚନ ପୂର୍ବରୁ ସେ ପୁଣି ଭାଜପାରେ ଯୋଗ ଦେଇଥିଲେ। କେସରଗଞ୍ଜ ଆସନରୁ ଭାଜପା ଟିକେଟ୍ରେ ୨୦୧୪ ଏବଂ ୨୦୧୯ ଲୋକ ସଭା ନିର୍ବାଚନରେ ବିଜୟ ହାସଲ କରିଥିଲେ। ବ୍ରିଜ୍ ଭୂଷଣଙ୍କ ପୁଅ ପ୍ରତୀକ ଭୂଷଣ ମଧ୍ୟ ରାଜନୀତିରେ ସକ୍ରିୟ ଅଛନ୍ତି। ପ୍ରତୀକ ଗୋଣ୍ଡା ଆସନରୁ ଭାଜପା ବିଧାୟକ ଅଛନ୍ତି।
୧୯୯୨ରେ ଅଯୋଧ୍ୟାରେ ବାବ୍ରି ମସ୍ଜିଦ ଭାଙ୍ଗିବା ମାମଲାରେ ୪୦ ଅଭିଯୁକ୍ତଙ୍କ ମଧ୍ୟରୁ ବ୍ରିଜ୍ ଭୂଷଣଙ୍କ ନାମ ରହିଥିଲା। କେତେକ ସାକ୍ଷାତକାରରେ ସେ ନିଜେ ସ୍ବୀକାର କରିଛନ୍ତି ଯେ ବାବ୍ରି ମସ୍ଜିଦ ଭାଙ୍ଗିବା ରାତିରେ ସେ ଘଟଣା ସ୍ଥଳରେ ଉପସ୍ଥିତ ଥିଲେ । ତେବେ ୩୦ ସେପ୍ଟେମ୍ବର ୨୦୨୦ରେ କୋର୍ଟ ତାଙ୍କୁ ଦୋଷମୁକ୍ତ କରିଥିଲେ।
ବ୍ରିଜ୍ ଭୂଷଣଙ୍କ ବିରୋଧରେ ଅନେକ ଗୁରୁତର ମାମଲା ରୁଜୁ ହୋଇଛି। ଏଥିମଧ୍ୟରୁ ୩୦ରୁ ଅଧିକ ମାମଲାରେ ସେ ନିର୍ଦ୍ଦୋଷରେ ଖଲାସ ହୋଇଛନ୍ତି। ୨୦୧୯ ନିର୍ବାଚନରେ ନିଜ ଘୋଷଣାପତ୍ରରେ ତାଙ୍କ ନାଁରେ ୪ଟି ଆପରାଧିକ ମାମଲା ଏବେ ମଧ୍ୟ କୋର୍ଟରେ ବିଚାରାଧୀନ ରହିଛିି ବୋଲି ଦର୍ଶାଇଥିଲେ।
