ନୂଆଦିଲ୍ଲୀ, ୬ା୧: ଜଣେ ବିବାହିତ ଯୁବକଙ୍କୁ ଦେଢ଼ କୋଟି ଟଙ୍କା ବଦଳରେ ତାଙ୍କ ସ୍ତ୍ରୀଙ୍କଠାରୁ କିଣି ନେଇଛନ୍ତି ପ୍ରେମିକା। ମଧ୍ୟପ୍ରଦେଶର ଭୋପାଳରେ ଏଭଳି ଘଟଣା ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି। ଯୁବକଙ୍କ ଝିଅ ଫ୍ୟାମିଲି କୋର୍ଟର ଦ୍ୱାରସ୍ଥ ହେବା ପରେ ପୂରା ଘଟଣା ପଦାକୁ ଆସିଛି। ନାବାଳିକା ଝିଅ ଜଣକ ବାପାଙ୍କ ବିରୋଧରେ କୋର୍ଟରେ ଏକ କେସ୍ ଫାଇଲ କରି କହିଥିଲେ ଯେ, ବାପା ତାଙ୍କ ଅଫିସ୍ର ଅନ୍ୟ ଜଣେ ଝିଅଙ୍କୁ ପ୍ରେମ କରୁଥିବାରୁ ସବୁବେଳେ ଘରେ ଅଶାନ୍ତି ଲାଗିରହୁଛି। ଏଥିଯୋଗୁ ପାଠପଢ଼ା ବାଧାପ୍ରାପ୍ତ ହେଉଛି। ପରେ କୋର୍ଟ ଏହି ମାମଲାରେ ସ୍ବାମୀ ସ୍ତ୍ରୀଙ୍କୁ ସମନ କରିବା ସହ ସେମାନଙ୍କ କାଉନ୍ସେଲିଂ କରାଇଥିଲେ। ପରେ ସ୍ତ୍ରୀ ଏକ ସର୍ତ୍ତରେ ସ୍ବାମୀଙ୍କୁ ଛାଡ଼ପତ୍ର ଦେବାକୁ ରାଜି ହୋଇଥିଲେ। ମହିଳା ଜଣକ ତାଙ୍କ ସ୍ବାମୀଙ୍କ ପ୍ରେମିକାଙ୍କ ଏକ ଆପାର୍ଟମେଣ୍ଟ ଓ ୨୭ ଲକ୍ଷ ଟଙ୍କା ଦେବାକୁ ସର୍ତ୍ତ ରଖିଥିଲେ। ଏଥିରେ ପ୍ରେମିକା ମଧ୍ୟ ରାଜି ହୋଇଯାଇଥିଲେ। ଉଭୟଙ୍କ ମଧ୍ୟରେ ସମ୍ପର୍କ ଭଲ ରହୁ ନ ଥିବାରୁ ଏବଂ ପିଲାଙ୍କ ଭବିଷ୍ୟତକୁ ଦୃଷ୍ଟିରେ ରଖି ସେ ଏପରି ନିଷ୍ପତ୍ତି ନେଇଥିବା ମହିଳା ଜଣକ କହିଛନ୍ତି।
