ଭୁବନେଶ୍ୱର,୧୧।୪(ବ୍ୟୁରୋ): ରାଜଧାନୀ ଭୁବନେଶ୍ୱରରେ ସ୍କୁଲ ପାଲଟିଛି ଅସାମାଜିକଙ୍କ ଆଡ୍ଡାସ୍ଥଳ। ଅସୁରକ୍ଷିତ ହୋଇପଡୁଛନ୍ତି ଛାତ୍ରୀଛାତ୍ର। ଭୁବନେଶ୍ୱର ମହାନଗର ନିଗମ(ବିଏମ୍ସି)ର ୫୨ ନମ୍ବର ୱାର୍ଡ ଅନ୍ତର୍ଗତ ବରମୁଣ୍ଡା ଉଚ୍ଚ ପ୍ରାଥମିକ ବିଦ୍ୟାଳୟର ଚିତ୍ର ଓ ସ୍ଥିତିକୁ ଦେଖିଲେ ଶିକ୍ଷାନଗରୀର ଶିକ୍ଷାନୁଷ୍ଠାନ କେତେ ସୁରକ୍ଷିତ ତାହା ବାରିହୋଇପଡୁଛି। ଅସାମାଜିକମାନେ ମଦ୍ୟପାନ କରିବା ସହ ଶ୍ରେଣୀଗୃହ ଓ ସ୍କୁଲ ପରିସରରେ ଚାରିଆଡେ ମଦ ବୋତଲ ଓ ଗ୍ଲାସ୍ ଭାଙ୍ଗି ପକାଇବାରୁ ସୋମବାର ପିଲାଙ୍କ ପାଠପଢ଼ା ବାଧାପ୍ରାପ୍ତ ହେବା ସହ ଶିକ୍ଷୟିତ୍ରୀଶିକ୍ଷକମାନେ ନାନା ହଇରାଣ ହୋଇଥିଲେ। ସେମାନେ ବାଧ୍ୟହୋଇ ପିଲାମାନଙ୍କୁ ଶ୍ରେଣୀ ଗୃହରେ ବାହାରେ ଥିବା ଏକ ଗଛମୂଳେ ଜରି ପକାଇ ପାଠ ପଢାଇଥିଲେ। ଭଙ୍ଗା କାଚଖଣ୍ଡ ସଫା କରାଯିବା ପରେ ପିଲାଙ୍କୁ ଶ୍ରେଣୀ ଗୃହକୁ ନିଆଯାଇଥିଲା। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। ସା ହେଲେ ଏହି ସ୍କୁଲ ପରିସରରେ ଅସାମାଜିକ ଯୁବକ ଆଡ୍ଡା ଜମାଇ ବିଭିନ୍ନ ନିଶାଦ୍ରବ୍ୟ ସେବନ କରିବା ସହ ବିଭିନ୍ନ ଅପରାଧ ଘଟାଇଥାନ୍ତି ବୋଲି ସେମାନେ ଅଭିଯୋଗ କରିଛନ୍ତି। ସେହିପରି ସ୍କୁଲ ଶିକ୍ଷକମାନେ ଏହାକୁ ନିନ୍ଦା କରିବା ସହ ଘଟଣା ବାବଦରେ ଉପରିସ୍ଥ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯିବ ବୋଲି କହିଛନ୍ତି। ଏପରିସ୍ଥିତିରେ ରବିବାର ସ୍କୁଲ ପରିସରରେ ୫୦ ନମ୍ବର ୱାର୍ଡ କର୍ପୋରେଟର ଏକବର୍ଷ ପୂର୍ତି ଉତ୍ସବର ଆୟୋଜନ କରିଥିଲେ। ଏହାର ଫଟୋ ସୋସିଆଲ ମିଡିଆରେ ଭାଇରାଲ ହେଉଥିବାବେଳେ ଏହି ଉତ୍ସବ ସରିବା ପରେ ସ୍କୁଲ ପରିସରରେ ଏହି ଘଟଣା ଘଟିଥାଇପାରେ ବୋଲି ଅନୁମାନ କରାଯାଇଛି। ଏନେଇ ସମ୍ପୃକ୍ତ କର୍ପୋରେଟର କହିଛନ୍ତି, ମହିଳା ସମିତି ମିଟିଂ ଚାଲିଥିଲା। କାର୍ଯ୍ୟକ୍ରମ ପରେ ଆମେ ସମସ୍ତେ ଚାଲିଯାଇଥିଲୁ। ପରେ କେହି ଆସି ଏମିତି କରିଥାଇ ପାରନ୍ତି। ଏହାସହ ଅସାମାଜିକ ଯୁବକମାନେ ସା ହେଲେ ପାଚେରୀ ଡେଇଁ ସ୍କୁଲରେ ପ୍ରବେଶ କରିବା ସହ ଉତ୍ପାତ କରି ମଦ ବୋତଲ ଭାଙ୍ଗିଥାନ୍ତି। ଏସଂକ୍ରାନ୍ତରେ ବାରମ୍ବାର ପୋଲିସକୁ ଜଣାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନାହିଁ। ତେଣୁ ପୋଲିସ ପକ୍ଷରୁ କଡାକଡି ପେଟ୍ରୋଲିଂ କରାଯିବା ସହ ଅସାମାଜିକଙ୍କ ଆଡ୍ଡା ଉପରେ ଚଢାଉ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି। ସେହିପରି ପୋଲିସ ପକ୍ଷରୁ ବିଭିନ୍ନ ଖଟି ଜାଗାରେ ଚଢାଉ କରାଯାଉଥିବାରୁ ଧରା ନ ପଡିବା ଲାଗି ଅସାମାଜିକ ଯୁବକମାନେ ସ୍କୁଲ ପରିସରକୁ ଚାଲି ଯାଇ ଉତ୍ପାତ କରୁଥିବା କୁହାଯାଉଛି।
