ଲଣ୍ଡନ, ୨ା୮ (ପି.ଟି.)-କିମ୍ବଦନ୍ତୀ ଇଂଲଣ୍ଡ ଅଲରାଉଣ୍ଡର ଇଆନ ବୋଥାମ ବ୍ରିଟିଶ ପାର୍ଲାମେଣ୍ଟର ହାଉସ୍ ଅଫ୍ ଲଡର୍ସ ସଦସ୍ୟ ହୋଇଛନ୍ତି। ୬୪ ବର୍ଷୀୟ ପୂର୍ବତନ କ୍ରିକେଟ ଅଧିନାୟକଙ୍କ ସମେତ ୨୬ ଜଣ ଅଣନିର୍ବାଚିତ ସଦନର ସଦସ୍ୟ ଭାବେ ମନୋନୀତ ହୋଇଥିବା ସରକାରଙ୍କ ତରଫରୁ ଘୋଷଣା କରାଯାଇଛି। ବୋଥାମ ୧୯୭୭ରୁ ୧୯୯୨ ପର୍ଯ୍ୟନ୍ତ ଇଂଲଣ୍ଡ ତରଫରୁ ୧୦୨ ଟେଷ୍ଟ ମ୍ୟାଚ ଖେଳିଛନ୍ତି। ବ୍ରେକିଷ୍ଟର ସେ ଜଣେ ଦୃଢ ସମର୍ଥକ। କ୍ରିକେଟ ଓ ଚ୍ୟାରିଟି କ୍ଷେତ୍ରରେ ତାଙ୍କର ଉଲ୍ଲେଖନୀୟ ଅବଦାନ ପାଇଁ ୨୦୦୭ରେ ସେ ନାଇଟ୍ ଉପାଧିରେ ସମ୍ମାନିତ ହୋଇଥିଲେ। ୨୦୧୧ରେ ପୂର୍ବତନ ଇଂଲଣ୍ଡ ମହିଳା ଟିମ୍ ଅଧିନାୟିକା ରାଚେଲ୍ ହେହୋ-ଫ୍ଲିଣ୍ଟ୍ଙ୍କ ପରେ ପ୍ରଥମ କ୍ରିକେଟର ଭାବେ ବୋଥାମ ହାଉସ୍ ଅଫ୍ ଲଡର୍ସର ସଦସ୍ୟ ଭାବେ ମନୋନୀତ ହୋଇଛନ୍ତି। ପୂର୍ବରୁ ଅନ୍ୟମାନଙ୍କ ମଧ୍ୟରେ ଡେଭିଡ ଶେଫର୍ଡ, କଲିନ୍ କାଉଡ୍ରି ଓ ଲିଆରି କନଷ୍ଟାଣ୍ଟିନ୍ ହାଉସ୍ ଅଫ୍୍ ଲଡର୍ସ ଆସନ ଅଳଙ୍କୃତ କରିଛନ୍ତି। କ୍ରିକେଟ ପଡ଼ିଆରେ ବୋଥାମଙ୍କ ଶ୍ରେଷ୍ଠ ମୁହୂର୍ତ୍ତ ୧୯୮୧ରେ ଦେଖିବାକୁ ମିଳିଥିଲା। ସେତେବେଳେ ତାଙ୍କର ପ୍ରଭାବୀ ପ୍ରଦର୍ଶନ ବଳରେ ଅଷ୍ଟ୍ରେଲିଆ ବିପକ୍ଷ ଆଶେସ ସିରିଜରେ ଇଂଲଣ୍ଡ ରୋମାଞ୍ଚକ ବିଜୟ ହାସଲ କରିଥିଲା। ଅବସର ପରେ ସେ ଚ୍ୟାରିଟି କାର୍ଯ୍ୟରେ ନିଜକୁ ନିୟୋଜିତ କରିଥିଲେ। ଲିଉକେମିଆ ଉପରେ ଗବେଷଣା ପାଇଁ ପାଣ୍ଠି ସଂଗ୍ରହ ବ୍ୟତୀତ କ୍ରିକେଟ ମ୍ୟାଚ୍ରେ କମେଣ୍ଟ୍ରି ମଧ୍ୟ କରୁଥିଲେ।
