ସୋରଡ଼ା,୨୭ା୪(ରଜନୀ ମହାପାତ୍ର): ଗଞ୍ଜାମ ଜିଲା ବଡଗଡ ଥାନା ଏକଲପୁର ପଞ୍ଚାୟତ ହରିପୁର ଗ୍ରାମ ନିକଟ ପାହାଡରୁ ଜଣେ ବ୍ୟକ୍ତିଙ୍କ ମୃତଦେହ ପୋଲିସ ଜବତ କରିଛି। ମୃତକଙ୍କ ପରିଚୟ ମିଳିପାରି ନାହିଁ। ମୃତକଙ୍କ ବୟସ ୨୫ ବର୍ଷ ହୋଇଥିବା ଅନୁମାନ କରାଯାଉଥିବା ବେଳେ ଯୁବକ ଜଣଙ୍କ ଗୋଟିଏ ହାପ୍ ପେଣ୍ଟ ପିନ୍ଧିଥିବା ବେଳେ ତାଙ୍କ ପାଖରୁ ଅଧିକ କିଛି ଜିନିଷ ମିଳିନି।
ଖବର ପାଇ ବଡଗଡ଼ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଯୁବକ ଜଣକ ଶରୀରର କିଛି ଅଂଶ କଳା ପଡି ଯାଇଥିବା ଦେଖିବାକୁ ମିଳିଛି। ଘଟଣା ସମ୍ପର୍କରେ ଅଧିକ ତଦନ୍ତ ପାଇଁ ଆସିକା ଏସଡିପିଓ ସନ୍ତୋଷ ଜେନା ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
ବଡଗଡ ଥାନାଧିକାରୀ ସନ୍ତୋଷ ବେହେରା କହିଛନ୍ତି ଆନୁମାନିକ ୭ଦିନ ହେବ ଏହି ମୃତକଙ୍କ ମୃତଦେହ ଏପରି ପଡିରହିଥିବା ଅନୁମାନ କରାଯାଉଛି ଏବଂ ଟାଣ ଖରା ଯୋଗୁ ସଂପୂର୍ଣ୍ଣ ଶରୀର କଳା ପଡିଯାଇଛି। ଶରୀର ସମ୍ପୂର୍ଣ୍ଣ କଳା ପଡିଯାଇଥିବାରୁ ଚିହ୍ନିବା ସମ୍ଭବ ହେଉନାହିଁ।
କୌଣସି ବ୍ୟକ୍ତିଙ୍କ ପାଖରେ ଯଦି ଏହି ଯୁବକଙ୍କ ସମ୍ପର୍କରେ କୌଣସି ସୂଚନା ଥାଏ ତେବେ ବଡଗଡ ଥାନାଧିକାରୀଙ୍କ ସହ ଯୋଗାଯୋଗ କରିବା ପାଇଁ କୁହାଯିବା ସହ ଫୋନ ନମ୍ବର ଦିଆଯାଇଛି। ଘଟଣା ସମ୍ପର୍କରେ ପୋଲିସ ତଦନ୍ତ କରୁଛି ବୋଲି ବଡଗଡ ଥାନା ଅଧିକାରୀ କହିଛନ୍ତି।
