ଭୁବନେଶ୍ୱର, ୧୧।୧୧(ବ୍ୟୁରୋ): ଶୀତଋତୁରେ କରୋନାର ଦ୍ୱିତୀୟ ପର୍ଯ୍ୟାୟ ସଂକ୍ରମଣ ଆଶଙ୍କା କରାଯାଉଛି। ଏହାକୁ ଦୃଷ୍ଟିରେ ରଖି ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ ବିବାହ କାର୍ଯ୍ୟକ୍ରମ ଓ ଅନ୍ତିମ ସଂସ୍କାର ପାଇଁ ଏକ ନିର୍ଦ୍ଦେଶାବଳୀ ଜାରି ହୋଇଛି। ଏହି ନିର୍ଦ୍ଦେଶାବଳୀ ଅନୁଯାୟୀ ବିବାହ କାର୍ଯ୍ୟକ୍ରମ ପାଇଁ ୧୦୦ ଓ ଅନ୍ତିମ ସଂସ୍କାର ପାଇଁ ୫୦ଜଣ ଲୋକଙ୍କୁ ଅନୁମତି ମିଳିବ। ଯେଉଁ କାର୍ଯ୍ୟକ୍ରମ କରିବେ ସେଥିପାଇଁ ନିକଟସ୍ଥ ଥାନା କିମ୍ବା ସ୍ଥାନୀୟ କର୍ତ୍ତୃପକ୍ଷଙ୍କ ଅନୁମତି ନେବା ଆବଶ୍ୟକ। ବିବାହରେ ବରଯାତ୍ରୀଙ୍କୁ ସମ୍ପୂର୍ଣ୍ଣ ନିଷେଧ କରାଯାଇଛି। ବୟସ୍କ ବ୍ୟକ୍ତି, ଗର୍ଭବତୀ କିମ୍ବା ୧୦ବର୍ଷରୁ କମ୍ ପିଲା ସେହି କାର୍ଯ୍ୟକ୍ରମକୁ ନ ଯିବା ପାଇଁ ପରାମର୍ଶ ଦିଆଯାଇଛି। କାର୍ଯ୍ୟକ୍ରମ ସ୍ଥଳୀର ପ୍ରବେଶ ପଥରେ ଥର୍ମାଲ ସ୍କ୍ରିନିଂର ବ୍ୟବସ୍ଥା କରାଯିବା, ହଲ୍ରେ ସାମାଜିକ ଦୂରତା ବଜାୟ ରଖିବା, ସମସ୍ତଙ୍କ ପାଇଁ ମାସ୍କ ପିନ୍ଧିବା ଭଳି ଅନେକ ନିର୍ଦ୍ଦେଶ ରହିଛି। ଯଦି ଏହି ନିୟମର କେହି ଖିଲାପ କରନ୍ତି, ତେବେ ଆୟୋଜକ ଓ ମଣ୍ଡପ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ। ଏହି ନିର୍ଦ୍ଦେଶନାମା ଆସନ୍ତା ୨୫ତାରିଖରୁ କାର୍ଯ୍ୟକାରୀ ହେବ। ପୋଲିସ ଏବଂ ବିଏମ୍ସି ଏନ୍ଫୋର୍ସମେଣ୍ଟ ସ୍କ୍ବାଡ୍ ଏ ଦିଗରେ କଡ଼ା ନଜର ରଖିବା ପାଇଁ କୁହାଯାଇଛି।
