ଭୁବନେଶ୍ୱର, ୪।୫(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି)ର ବହୁ ପ୍ରତୀକ୍ଷିତ ଭୁଆସୁଣୀ ବାୟୋ ମାଇନିଂ ପ୍ରକଳ୍ପ କାର୍ଯ୍ୟ ଆରମ୍ଭ ହୋଇପାରୁନାହିଁ। ଏଥିପାଇଁ ସବୁ କାମ ସରିଥିଲେ ମଧ୍ୟ ପ୍ରତିଦିନ ଆବର୍ଜନା ଗଦା ହେଉଥିବାରୁ ପ୍ରକଳ୍ପ ହୋଇପାରୁନାହିଁ। ଅକ୍ଷୟ ତୃତୀୟା ଠାରୁ ଏଠାରେ କାମ ଆରମ୍ଭ ହେବ ବୋଲି ବିଏମ୍ସି ପକ୍ଷରୁ ଏପ୍ରିଲ୍ ୨୦ ତାରିଖରେ ସୂଚନା ଦିଆଯାଇଥିଲା। ମାତ୍ର ଅଳିଆ ପକାଇବାକୁ ନେଇ ଅଞ୍ଚଳବାସୀ ଏବଂ ବିଏମ୍ସି ମଧ୍ୟରେ ଥିବା ବିବାଦ ତୁଟୁନାହିଁ। ଫଳରେ ପଦ୍ମ ଘୁଞ୍ଚତ୍ ଘୁଞ୍ଚତ୍ ଯିବା ଭଳି ପ୍ରକଳ୍ପ କାର୍ଯ୍ୟ ମଧ୍ୟ ବିଳମ୍ବ ହୋଇଚାଲିଛି। ଏପ୍ରିଲ ୨୦ରେ ବିଏମ୍ସି ମେୟର ସୁଲୋଚନା ଦାସ, ଜଟଣୀ ବିଧାୟକ ସୁରେଶ ରାଉତରାୟ, ଭୁବନେଶ୍ୱର ବ୍ଲକ ଉପାଧ୍ୟକ୍ଷ ଅଜିତ ହରିଚନ୍ଦନ ଓ ଦାରୁଠେଙ୍ଗ ସରପଞ୍ଚ ତପନ କୁମାର ଚକ୍ରବର୍ତ୍ତୀଙ୍କ ସହ ଆଲୋଚନା କରାଯାଇଥିଲା। ଆବର୍ଜନା ଗଦା କରିବା ପାଇଁ ବିକଳ୍ପ ବ୍ୟବସ୍ଥା କରାଯାଇଛି ଏବଂ ୨୩ ତାରିଖରୁ ସେଠାରେ ଆଉ ଆବର୍ଜନା ପଡ଼ିବ ନାହିଁ ବୋଲି ବିଏମ୍ସି ପ୍ରତିଶ୍ରୁତି ଦେଇଥିଲା। ମାତ୍ର ନିଜ କଥା ରକ୍ଷା କରିବାରେ ବିଏମ୍ସି ବିଫଳ ହୋଇଛି। ଆଜି ପର୍ଯ୍ୟନ୍ତ ସେଠାରେ ଅଳିଆ ପକାଇବା ବନ୍ଦ ହୋଇପାରିନାହିଁ। ତେଣୁ ଯେ ପର୍ଯ୍ୟନ୍ତ ସମ୍ପୂର୍ଣ୍ଣ ଭାବେ ଅଳିଆ ପକାଇବା ବନ୍ଦ ନ ହୋଇଛି ସେ ପର୍ଯ୍ୟନ୍ତ ବାୟୋ ମାଇନିଂ ପ୍ରକଳ୍ପ କାମ ଆରମ୍ଭ ହୋଇପାରିବ ନାହିଁ ବୋଲି ସ୍ଥାନୀୟ ସରପଞ୍ଚ ଏବଂ ବିଧାୟକ ରୋକ୍ଠୋକ୍ ଭାବେ କହିଛନ୍ତି। ଏନେଇ ୨/୩ ଦିନ ତଳେ ବିଏମ୍ସି ସହିତ ସେମାନଙ୍କର ଆଲୋଚନା ହୋଇଥିଲା। ତେବେ ବିଏମ୍ସିର ଅଧିକାରୀମାନେ ଏ ସମ୍ପର୍କରେ ବୁଝାଶୁଝା କରିବା ପରେ ସେମାନେ ୭ଦିନ ସମୟ ମାଗିଛନ୍ତି। ତେଣୁ ଭୁଆସୁଣୀରେ ବାୟୋ ମାଇନିଂ ପ୍ରକଳ୍ପ ଆରମ୍ଭ ହୋଇପାରିବ କି ନାହିଁ ତାହା ଏହି ନିଷ୍ପତ୍ତି ଉପରେ ନିର୍ଭର କରୁଛି। ଏନେଇ ବିଏମ୍ସି ଡେପୁଟି କମିଶନର (ପରିମଳ) ଶୁଭେନ୍ଦୁ ସାହୁ କହିଛନ୍ତି, ସହରରେ ବର୍ଜ୍ୟ ପରିଚାଳନା ପାଇଁ ଏବେ ୩୧ଟି ଏମ୍ସିସି (ମାଇକ୍ରୋ କମ୍ପୋଷ୍ଟିଂ ସେଣ୍ଟର) କାର୍ଯ୍ୟକ୍ଷମ ହୋଇଛି। ବାକି ୧୦ଟି ଏମ୍ସିସି ନିର୍ମାଣ ପାଇଁ ପ୍ରସ୍ତୁତି ଚାଲିଛି। ଏଥିଲାଗି ଆଉ ୨ମାସ ସମୟ ଲାଗିବ। ଏହି ସେଣ୍ଟର କାର୍ଯ୍ୟକ୍ଷମ ହେବା ପରେ ସହରର ଅଳିଆ ଭୁଆସୁଣୀ ଡମ୍ପିଂୟାର୍ଡକୁ ଯିବ ନାହିଁ। ସ୍ଥାନୀୟ ଲୋକେ ଯେପରି ପ୍ରକଳ୍ପ ପାଇଁ ସହଯୋଗ କରିବେ ସେନେଇ ପ୍ରଚେଷ୍ଟା ଜାରି ରହିଛି। ତେଣୁ ଖୁବ୍ ଶୀଘ୍ର କାମ ଆରମ୍ଭ ହେବ ବୋଲି ଆଶା ରଖିଛୁ ବୋଲି ସାହୁ ପ୍ରକାଶ କରିଛନ୍ତି।
୨୦୨୧ ମାର୍ଚ୍ଚରେ ଭୁଆସୁଣୀ ବାୟୋମାଇନିଂ ପ୍ରକଳ୍ପ ଆରମ୍ଭ ହୋଇଥିଲା। ୩ବର୍ଷ ମଧ୍ୟରେ ଏହି ପ୍ରକଳ୍ପ ସାରିବାକୁ ଲକ୍ଷ୍ୟ ରଖାଯାଇଥିଲା। ମାତ୍ର ବିଭିନ୍ନ କାରଣରୁ ଏପର୍ଯ୍ୟନ୍ତ ପ୍ରକଳ୍ପର ଶୁଭ ପଡ଼ିପାରୁନାହିଁ। ବାୟୋ ମାଇନିଂ ପ୍ରକ୍ରିୟାରେ ସବୁ ଅଳିଆକୁ ଡିସ୍ପୋଜାଲ କରାଯିବ। ଏଥିପାଇଁ ୧୦୩ କୋଟି ଟଙ୍କା ବ୍ୟୟ ଅଟକଳ ହୋଇଛି। ଜାଗୃତି ଓ ଜନାଧାର ସଂସ୍ଥା ବାୟୋମାଇନିଂ କାର୍ଯ୍ୟ ଆରମ୍ଭ କରିବାକୁ ଆବଶ୍ୟକ ପରୀକ୍ଷଣ ଶେଷ କରିଥିବାବେଳେ ୨ଟି ମେଶିନ୍ କ୍ରୟ କରିସାରିଛନ୍ତି। ମାତ୍ର କାମ ଆରମ୍ଭ ହୋଇପାରୁ ନାହିଁ। ଡମ୍ଫିଂୟାର୍ଡକୁ ନେଇ ବାଦବିବାଦ ହେବା ପରେ ଏମ୍ସିସି ପ୍ରତିଷ୍ଠା କରି ଆବର୍ଜନା ପରିଚାଳନା କରିବା ପାଇଁ ବିଏମ୍ସି ଯୋଜନା କରିଥିଲା। ଆବର୍ଜନା ଓ ପରିଚାଳନାକୁ ହିସାବ କରି ସହରରେ ୪୩ଟି ଏମ୍ସିସିି ପ୍ରତିଷ୍ଠା କଲେ ଭୁବନେଶ୍ବରରୁ ଦୈନିକ ବାହାରୁଥିବା ଆବର୍ଜନା ପରିଚାଳନା ହୋଇପାରିବ ବୋଲି ନିଷ୍ପତ୍ତି ହୋଇଥିଲା। ଏଥିପାଇଁ ଜାଗା ଚିହ୍ନଟ ହେବା ସହ ପ୍ରକଳ୍ପ ପ୍ରତିଷ୍ଠା ହେଲା। ସେଥିମଧ୍ୟରୁ ୩୧ଟି କାର୍ଯ୍ୟକ୍ଷମ ହୋଇଥିଲା। ତେବେ ସବୁଗୁଡ଼ିକ ନିୟମିତ ଚାଲୁନାହିଁ। ବାକି ୧୨ଟି ଏମ୍ସିସି ମଧ୍ୟରୁ ଜମି ବିବାଦ କାରଣରୁ ୨ଟିକୁ ବନ୍ଦ କରି ଦିଆଯାଇଛି। ଏହାବାଦ୍ ଆଉ ୧୦ଟି ମଧ୍ୟରୁ କେଉଁଠି ଜମିକୁ ନେଇ ଅଦାଲତି ଲଢ଼େଇ ତ’ ଆଉ କେଉଁଠାରେ ଦୁର୍ଗନ୍ଧ ଯୋଗୁ ଲୋକେ ପ୍ରକଳ୍ପ କରାଇ ଦେଉନାହାନ୍ତି। ତେବେ ବିବାଦ ତୁଟୁ ନ ଥିବାରୁ ଏହି ପ୍ରକଳ୍ପ କେବେ କାର୍ଯ୍ୟକାରୀ ହେବ ଏବଂ ଦାରୁଠେଙ୍ଗବାସୀ ଏହି ଆବର୍ଜନାରୁ ନିସ୍ତାର ପାଇବେ ତାହା ଅନିଶ୍ଚିତତା ମଧ୍ୟରେ ରହିଛି।
