ଉଦୟପୁର,୧୩।୧୧ : ରାଜସ୍ଥାନ-ଗୁଜରାଟକୁ ରେଳ ଲାଇନ ସହିତ ସଂଯୋଗ କରୁଥିବା ବ୍ରଡ ଗେଜ ଟ୍ରାକକୁ ବିସ୍ଫୋରଣ କରି କେତେକ ଅଜଣା ବ୍ୟକ୍ତି ଶନିବାର ରାତିରେ ଉଡ଼ାଇ ଦେଇଛନ୍ତି। ବିସ୍ଫୋରଣ ଶବ୍ଦ ଏତେ ଜୋରରେ ଥିଲା ଯେ ଏହାର ଶବ୍ଦ ୩ କିଲୋମିଟର ବ୍ୟାସାର୍ଦ୍ଧରେ ଶୁଣାଯାଇଥିଲା। ମେୱାର-ଭାଗାଦର ଲୋକମାନେ ଗତ ୧୪ ବର୍ଷ ଧରି ଏହି ଟ୍ରାକର ଦାବି କରିଆସୁଥିଲେ।
ତେବେ ଏହାକୁ ସାମାଜିକ ବିରୋଧୀ ଲୋକେ ୧୪ ଦିନ ମଧ୍ୟ ରହିବାକୁ ଦେଇ ନାହାନ୍ତି। ୧୩ ଦିନ ପୂର୍ବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁଜରାଟର ଆସୱର ରେଳ ଷ୍ଟେଶନରୁ ଟ୍ରେନରୁ ଫ୍ଲାଗ ଦେଖାଇ ଶୁଭାରମ୍ଭ କରିଥିଲେ ଏବଂ ଏହା ପରେ ନିୟମିତ ଟ୍ରେନ ଚଳାଚଳ କରୁଥିଲା। ଏହି ଘଟଣା ପରେ ରେଳବାଇ ସମେତ ପ୍ରଶାସନର ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଜିଲା କଲେକ୍ଟର ତାରାଚନ୍ଦ ମୀନା ମଧ୍ୟ ଅପରାହ୍ନରେ ଏଠାରେ ପହଞ୍ଚିଛନ୍ତି।
ସ୍ଥାନୀୟ ଲୋକଙ୍କ ଅନୁସାରେ ଶନିବାର ରାତି ୮ ରୁ ୯ ମଧ୍ୟରେ ଏହି ଘଟଣା ଘଟିଛି। ଉଦୟପୁର ସହରଠାରୁ ୫୦ କିଲୋମିଟର ଦୂରରେ ଥିବା ଜାୱାର ମାଇନ୍ସ ଟାଉନ ନିକଟରେ ଏହି ଘଟଣା ଘଟିଛି। ପ୍ରାୟ ୮ କିଲୋମିଟର ଦୂରରେ ଖାରୱା ଚନ୍ଦା ଷ୍ଟେଶନ ଏବଂ ଜାୱାର ମାଇନ୍ସ ଷ୍ଟେଶନ ମଧ୍ୟରେ ଏହି ବିସ୍ଫୋରଣ ଘଟିଛି। ଗ୍ରାମବାସୀ ରାତିରେ ଏହି ଶବ୍ଦ ଶୁଣିଥିଲେ, କିନ୍ତୁ ଏହାକୁ ଖଣିରେ ବିସ୍ଫୋରଣ ହୋଇଥିବା ମନେ କରିଥିଲେ। ସକାଳେ କିଛି ଗାଁ ଲୋକେ ଟ୍ରାକ ନିକଟରେ ପହଞ୍ଚି ଦେଖିଥିଲେ ଯେ ଟ୍ରାକ ଭାଙ୍ଗି ଯାଇଛି ଏବଂ ବୋଲ୍ଟ ମଧ୍ୟ ବାହାରତ ଯାଇଛି। ଏଥିରୁ ଅନୁମାନ କରାଯାଇଥିଲା ଯେ ଏଠାରେ ବିସ୍ଫୋରଣ ଘଟିଥିଲା ଏବଂ ଖଣିରେ ବ୍ୟବହୃତ ବିସ୍ଫୋରକ ଏଥିରେ ବ୍ୟବହୃତ ହୋଇଥିଲା।
ସକାଳେ ବହୁ ସଂଖ୍ୟାରେ ଗ୍ରାମବାସୀ ଘଟଣାସ୍ଥଳରେ ପହଞ୍ଚି ପରିସ୍ଥିତି ଦେଖିଥିଲେ। ଏହା ପରେ ଗ୍ରାମବାସୀ ଘଟଣାସ୍ଥଳଠାରୁ କିଛି ଦୂରରେ ଟ୍ରାକରେ ଏକ ଲାଲ କପଡ଼ା ବାନ୍ଧିଥିଲେ, ଯେପରି କୌଣସି ଦୁର୍ଘଟଣା ଘଟିବ ନାହିଁ। ଏହା ପରେ ରେଳବାଇକୁ ସୂଚନା ଦିଆଯାଇଥିଲା। ଏହା ପରେ ସକାଳ ୬ ଟା ୩୦ ସମୟରେ ଅହମଦାବାଦର ଆସୱାରାରୁ ଆସୁଥିବା ଟ୍ରେନକୁ ଡଙ୍ଗରପୁରରେ ଅଟକା ଯାଇଥିଲା।
ଉତ୍ତର ପଶ୍ଚିମ ରେଳବାଇର ମୁଖ୍ୟ ଜନସମ୍ପର୍କ ଅଧିକାରୀ କ୍ୟାପଟେନ ଶଶି କିରଣ କହିଛନ୍ତି ଯେ ସକାଳ ୮ ଟାରେ ସୂଚନା ମିଳିଥିଲା ଯେ ଜାଭର୍ ମଧ୍ୟରେ ଖାରୱା ଚନ୍ଦା ପର୍ଯ୍ୟନ୍ତ ଟ୍ରାକକୁ ନଷ୍ଟ କରିବାକୁ ଚେଷ୍ଟା କରାଯାଇଛି। ସିଭିଲ ପୋଲିସ ଏବଂ ରେଳ ଅଧିକାରୀ ଘଟଣାସ୍ଥଳରେ ପହଞ୍ଚିଥିଲେ। ଘଟଣାସ୍ଥଳରୁ ଏଫଏସଏଲ ନମୁନା ମଧ୍ୟ ନିଆଯାଇଛି। ଆସାରୱା ଠାରୁ ଉଦୟପୁରକୁ ଆସୁଥିବା ଟ୍ରେନଗୁଡ଼ିକୂ ଡଙ୍ଗରପୁରରେ ଅଟକ ରଖାଯାଇଥିଲା। ଏହାଯୋଗୁ ଡୁଙ୍ଗରପୁରରୁ ଉଦୟପୁର ଏବଂ ଉଦୟପୁରରୁ ଡୁଙ୍ଗରପୁରକୁ ଯାଉଥିବା ଟ୍ରେନ ଗୁଡିକ ଆଂଶିକ ବାତିଲ କରାଯାଇଥିଲା। ଏଠାରେ ଜାଓ୍ବରମାଇନ୍ସ ପୋଲିସ ଅଧିକାରୀ ଅନିଲ କୁମାର ବିଶ୍ନୋଇ କହିଛନ୍ତି ଯେ ଘଟଣାସ୍ଥଳରେ ତଦନ୍ତ ଚାଲିଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଖଣିରେ ବ୍ୟବହୃତ ବିସ୍ଫୋରକ ସାମଗ୍ରୀ ଟ୍ରାକକୁ ନଷ୍ଟ କରିବା ପାଇଁ ବ୍ୟବହୃତ ହୋଇଛି।
