ଜୟପୁର,୨।୧୦ : ରାଜସ୍ଥାନରେ ଜାରି ରହିଥିବା ରାଜନୈତିକ ସଙ୍କଟ ମଧ୍ୟରେ ଭାଜପା ବିଧାୟକ କାଳିଚରଣ ସରାଫ ଏକ ବଡ଼ ବିବୃତ୍ତି ଦେଇଛନ୍ତି। ପାଇଲଟ ଭାଜପାକୁ ଆସିବା ପ୍ରଶ୍ନରେ ବିଧାୟକ ସରାଫ କହିଛନ୍ତି ଯେ ଯଦି କଂଗ୍ରେସ ସରକାରଙ୍କ ପତନ ଘଟେ ଏବଂ ଏଥି ପାଇଁ ଭାଜପାକୁ କେହି ସହଯୋଗ କରିନ୍ତି ତାଙ୍କ ପାଇଁ ଆମର ଦ୍ୱାର ସବୁବେଳେ ଖୋଲା ରହିଛି। ସେ ସହଯୋଗ କଲେ ଭାଜପା ମଧ୍ୟ ସହାୟତାର ହାତ ବଢ଼ାଇବ।
ତେବେ ଏହା ସେମାନଙ୍କର ଆଭ୍ୟନ୍ତରୀଣ ବିଷୟ । ଯଦି ଘରେ ବସି ଲକ୍ଷ୍ମୀ ଆସନ୍ତି, ତେବେ ତାଙ୍କୁ ପ୍ରତ୍ୟାଖ୍ୟାନ କରାଯିବା ଉଚିତ ନୁହେଁ । ମାଲବ୍ୟ ନଗର ବିଧାୟକ ସରାଫ କହିଛନ୍ତି ଯେ କଂଗ୍ରେସ ଏକ ବୁଡ଼ିବାକୁ ଯାଉଥିବା ଜାହାଜ, ଯିଏ ଏଥିରେ ବସୁଛି ତା’ର ଭବିଷ୍ୟତକୁ ସୁରକ୍ଷିତ ରଖିବା ପାଇଁ ଏପାଖ ସେପାଖ ଦୌଡୁଛି। ଜନସାଧାରଣ ଅପେକ୍ଷା କରିଛନ୍ତି ଯେ କଂଗ୍ରେସ ସରକାରଙ୍କ ବୁଡ଼ନ୍ତା ଜାହାଜ ଏକ ମାସରେ କିମ୍ବା ୨ମାସରେ କିମ୍ବା୬ ମାସ ମଧ୍ୟରେ କେବେ ବୁଡ଼ିବାକୁ ଯାଉଛି।
ସୂଚନାଯୋଗ୍ୟ, ରାଜସ୍ଥାନ ରାଜନୀତିରେ ସରାଫଙ୍କୁ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେଙ୍କ ନିକଟତର ବୋଲି ବିବେଚନା କରାଯାଏ। ରାଜ୍ୟର ପୂର୍ବତନ ସ୍ବାସ୍ଥ୍ୟମନ୍ତ୍ରୀଙ୍କ ଏହି ବିବୃତ୍ତି ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କଂଗ୍ରେସରେ ଚାଲିଥିବା ବିବାଦକୁ ନେଇ ଭାଜପା ଖୋଲାଖୋଲି ଭାବେ କିଛି କହୁନାହିଁ।
କିନ୍ତୁ ଏଭଳି ଏକ ବିବୃତ୍ତି ଦେଇ ସରାଫ ଏକ ଉପାୟରେ ସଚିନ ପାଇଲଟଙ୍କୁ ଦଳରେ ବିଦ୍ରୋହ କରିବାକୁ ଉସୁକାଇଛନ୍ତି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ଅତୀତରେ ଭାଜପା ନେତାମାନଙ୍କ ପକ୍ଷରୁ ସଚିନ ପାଇଲଟଙ୍କୁ ଅନେକ ଥର ପ୍ରଶଂସା କରାଯାଇଥିଲା। ଏଭଳି ପରିସ୍ଥିତିରେ ଭାଜପା ନେତାମାନେ ସଚିନ ପାଇଲଟଙ୍କ ପାଇଁ ପୁଣି ଥରେ ଥୋପ ପକାଇଥିବା କୁହାଯାଉଛି।
