ବେଙ୍ଗାଲୁରୁ,୩୧।୧୨ : କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଘୋଷଣା କରିଛନ୍ତି ଯେ କର୍ନାଟକରେ ଭାଜପା ଏକୁଟିଆ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ। ୨୦୨୩ ରେ ହେବାକୁ ଥିବା ରାଜ୍ୟ ବିଧାନସଭା ନିର୍ବାଚନ ସମ୍ପର୍କରେ ସେ କର୍ନାଟକରେ ଅସମ୍ପୂର୍ଣ୍ଣ ସରକାର ଗଠନ ନକରିବାକୁ, ଦୁଇ ତୃତୀୟାଂଶ ସଂଖ୍ୟାଗରିଷ୍ଠତା ସହ ସରକାର ଗଠନ କରିବାକୁ ଲୋକଙ୍କୁ ନିବେଦନ କରିଛନ୍ତି। ଭାଜପା ନିଜେ ଏକୁଟିଆ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ ଏବଂ ସରକାର ଗଠନ କରିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।
ବେଙ୍ଗାଲୁରୁରେ ଶାହା କହିଛନ୍ତି ଯେ କଂଗ୍ରେସ ପାଇଁ କ୍ଷମତା ପାଇବା ଦୁର୍ନୀତି କରିବାର ଏକ ମାଧ୍ୟମ। କିନ୍ତୁ ଆମ ପାଇଁ ଏହା ଲୋକଙ୍କ ଜୀବନରେ ଉନ୍ନତି ଆଣିବାର ଉଦ୍ୟମ। ନିକଟରେ ସାତୋଟି ରାଜ୍ୟରେ ହୋଇଥିବା ନିର୍ବାଚନରେ ଭାଜପା ପାଞ୍ଚଟି ରାଜ୍ୟରେ ଜିତିଥିଲା ଏବଂ ୬ଟି ରାଜ୍ୟରେ କଂଗ୍ରେସ ମୂଳପୋଛ ହୋଇଯାଇଥିଲା।
ସେ କହିଛନ୍ତି ଯେ ଜେଡି (ଏସ) ସହ ଜଡିତ ଲୋକମାନେ ଗୁଜବ ପ୍ରଚାର କରୁଛନ୍ତି ଯେ ଭାଜପା ସେମାନଙ୍କ ସହ ଏକ ମେଣ୍ଟ କରିବ। ମୁଁ କର୍ନାଟକର ଜନସାଧାରଣଙ୍କୁ ସ୍ପଷ୍ଟ ଭାବରେ କହିବାକୁ ଚାହେଁ ଯେ ଭାଜପା ରାଜ୍ୟରେ ଏକୁଟିଆ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ ଏବଂ ରାଜ୍ୟରେ ନିଶ୍ଚିତ ସରକାର ଗଠନ କରିବ।
