ନୂଆଦିଲ୍ଲୀ,୧୦।୧: ଦିଲ୍ଲୀ ବିଧାନସଭା ନିର୍ବାଚନରେ ଭୋଟରମାନଙ୍କୁ ପ୍ରଲୋଭିତ କରିବା ପାଇଁ ଶାସକ ଆମ୍ ଆଦ୍ମୀ ପାର୍ଟି (ଆପ୍) ଏବଂ ବିରୋଧୀ ଭାଜପା ମଧ୍ୟରେ ପ୍ରତିଦ୍ୱନ୍ଦ୍ୱିତା ଜୋର୍ଦାର ହୋଇଛି।
ଆପ୍ର ନିର୍ବାଚନୀ ପ୍ରତିଶ୍ରୁତିକୁ ଟକ୍କର ଦେବା ଲାଗି ଭାଜପା ୩୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଜୁଳି, ମାଗଣା ପାନୀୟ ଜଳ ଏବଂ ମହିଳାଙ୍କୁ ଆକୃଷ୍ଟ କରିବା ପାଇଁ ଲାଡଲି ବେହନା ଭଳି ଯୋଜନା ପ୍ରତିଶ୍ରୁତି ଦେଇପାରେ ବୋଲି ଜଣାପଡ଼ିଛି। ଏଥିସହିତ ଭାଜପା ମନ୍ଦିର, ଗୁରୁଦ୍ୱାରା ଆଦି ଧର୍ମୀୟ ସ୍ଥଳଗୁଡ଼ିକୁ ୫୦୦ ୟୁନିଟ୍ ପର୍ଯ୍ୟନ୍ତ ବିଜୁଳି ମାଗଣା ଦେବା ପାଇଁ ଯୋଜନା କରିଛି।
ମହାରାଷ୍ଟ୍ର ଏବଂ ମଧ୍ୟପ୍ରଦେଶରେ ମହିଳାମାନଙ୍କୁ ଆର୍ଥତ୍କ ସହାୟତା ପ୍ରତିଶ୍ରୁତି ଦେଇ ଭାଜପା ସଫଳତା ପାଇଥିବାବେଳେ ଦିଲ୍ଲୀରେ ମଧ୍ୟ ଅନୁରୂପ ଯୋଜନାର ପ୍ରତିଶ୍ରୁତି ଦେଇପାରେ ବୋଲି କୁହାଯାଉଛି। ସମ୍ପ୍ରତି ମହିଳାମାନେ ନୂଆ ଭୋଟବ୍ୟାଙ୍କ ଭାବେ ଉଭା ହୋଇଛନ୍ତି। ତେଣୁ ମହିଳା ଭୋଟରଙ୍କୁ ଆକୃଷ୍ଟ କରିବା ପାଇଁ ପ୍ରତ୍ୟେକ ଦଳ ଉଦ୍ୟମ କରୁଛନ୍ତି। ଆପ୍ ଏବଂ କଂଗ୍ରେସ ମଧ୍ୟ ମହିଳାଙ୍କ ହାତକୁ ସିଧାସଳଖ ଟଙ୍କା ଦେବା ପାଇଁ ଯୋଜନା ଆଣିବାକୁ କହିଛନ୍ତି।
ତୃତୀୟ ଥର ପାଇଁ କ୍ଷମତା ବଜାୟ ରଖିବାକୁ ଲକ୍ଷ୍ୟ ରଖିଥିବା ଆପ୍ ମହିଳା ସମ୍ମାନ ଯୋଜନାକୁ ଏହାର ମୁଖ୍ୟ ଗେମ୍ ପ୍ଲାନ୍ କରିଛି। ଏହି ଯୋଜନାରେ ଦିଲ୍ଲୀର ମହିଳାମାନଙ୍କୁ ପ୍ରଥମ ପର୍ଯ୍ୟାୟରେ ମାସିକ ୧,୦୦୦ ଟଙ୍କା ଓ ପରେ ୨,୧୦୦ ଟଙ୍କା ଲେଖାଏ ଯୋଗାଇ ଦିଆଯିବ। ସେହିପରି ୬୦ ବର୍ଷରୁ ଊର୍ଦ୍ଧ୍ୱ ନାଗରିକଙ୍କୁ ମାଗଣା ସ୍ବାସ୍ଥ୍ୟସେବା ଯୋଗାଇଦେବାକୁ ଶାସକ ଦଳ ସଞ୍ଜୀବନୀ ଯୋଜନାର ପ୍ରତିଶ୍ରୁତି ଦେଇଛି। ଦିଲ୍ଲୀର ଅଟୋ ଡ୍ରାଇଭରମାନଙ୍କ ପାଇଁ ଆପ୍ ନେତା ଅରବିନ୍ଦ କେଜ୍ରିଓ୍ବାଲ ୧୫ ଲକ୍ଷ ଟଙ୍କାର ଜୀବନ ବୀମା ସହ ଝିଅ ବାହାଘର ପାଇଁ ଲକ୍ଷେ ଟଙ୍କା ସହାୟତା ଯେଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି।
