ପାଟନା/ନୂଆଦିଲ୍ଲୀ,୧୧ା୧୧: ବିହାର ବିଧାନସଭା ନିର୍ବାଚନକୁ ନେଇ ଅଧିକାଂଶ ଏକ୍ଜିଟ୍ ପୋଲ୍ର ଭବିଷ୍ୟବାଣୀ ଭୁଲ୍ ପ୍ରମାଣିତ ହୋଇଛି। ଭୋଟ ଗଣତି ଶେଷ ପର୍ଯ୍ୟାୟରେ ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍ଡିଏ) ସ୍ପଷ୍ଟ ବହୁମତ ସହ ପୁଣି ଥରେ ସରକାର ଗଠନ ଦିଗରେ ଅଗ୍ରସର ହୋଇଛି। ତେବେ ବିହାର ଭୋଟର ଏଥର ଡ୍ରାଇଭର ସିଟ୍ରେ ନୀତୀଶ କୁମାରଙ୍କ ସଂଯୁକ୍ତ ଜନତା ଦଳ (ଜେଡିୟୁ)କୁ ନୁହେଁ, ବରଂ ଭାଜପାକୁ ବସାଇଛନ୍ତି। ଏହି ହିନ୍ଦୀ ଭାଷୀ ଉତ୍ତର ଭାରତୀୟ ରାଜ୍ୟର ୨୦୨୦ ଭୋଟ୍ରେ ସୁଶାସନ ବାବୁଙ୍କ ‘ବ୍ରାଣ୍ଡ୍ ନୀତୀଶ’ କାମ କରିନାହିଁ। ୨୪୩ ଆସନ ବିଶିଷ୍ଟ ବିହାର ବିଧାନସଭାରେ ସରକାର ଗଠନ ପାଇଁ କୁହୁକ ସଂଖ୍ୟା ୧୨୨ ହୋଇଥିବାବେଳେ ଭାଜପାକୁ ୭୪ (୭୩+୧) ଆସନରେ ସଫଳତା ମିଳିଛି। ଜେଡିୟୁ ୪୩ (୪୨+୧) ଆସନରେ ସନ୍ତୁଷ୍ଟ ହୋଇ ତିନି ନମ୍ବରକୁ ଖସିଛି। ଲାଲୁ ଯାଦବଙ୍କ ରାଷ୍ଟ୍ରୀୟ ଜନତା ଦଳ (ଆର୍ଜେଡି) ୭୫(୭୪+୧) ଆସନ ଦଖଲ କରି ସବୁଠୁ ବଡ଼ ଦଳ ଭାବେ ଉଭା ହୋଇଛି। ମହାମେଣ୍ଟର ଅଂଶୀଦାର କଂଗ୍ରେସ ୧୯ ଓ ବାମଦଳ ୧୬ ଆସନରେ ବିଜୟୀ ହୋଇଛନ୍ତି କିମ୍ବା ଆଗୁଆ ଅଛନ୍ତି। ଚିରାଗ ପାଶ୍ୱାନଙ୍କ ଲୋକ ଜନଶକ୍ତି ପାର୍ଟି (ଏଲ୍ଜେପି) ମାତ୍ର ଗୋଟିଏ ଆସନ ଜିତି କେବଳ ଖାତା ଖୋଲିପାରିଛି।
ଷୋଡ଼ଶ ବିଧାନସଭାର କାର୍ଯ୍ୟକାଳ ୨୦୨୦ ନଭେମ୍ବର ୨୦ରେ ଶେଷ ହେବାକୁ ଥିବାବେଳେ ଭାରତର ନିର୍ବାଚନ କମିଶନ(ଇସିଆଇ)ଙ୍କ ଘୋଷଣା ଅନୁସାରେ ମୋଟ ୩ଟି ପର୍ଯ୍ୟାୟରେ ନିର୍ବାଚନ ହୋଇଥିଲା। ଅକ୍ଟୋବର ୨୮ରେ ପ୍ରଥମ ପର୍ଯ୍ୟାୟରେ ୭୧ ଆସନ ପାଇଁ ଭୋଟ ଗ୍ରହଣ କରାଯାଇଥିଲା। ଦ୍ୱିତୀୟ ପର୍ଯ୍ୟାୟ ଲାଗି ନଭେମ୍ବର ୩ରେ ୯୪ ଆସନ ଓ ଶେଷ ପର୍ଯ୍ୟାୟରେ ୭ ତାରିଖରେ ୭୮ ଆସନରେ ମତଦାନ ହୋଇଥିଲା। ମଇଦାନରେ ମୋଟ ୩,୭୫୫ ପ୍ରାର୍ଥୀ ଅବତୀର୍ଣ୍ଣ ହୋଇଥିଲେ। ଏହି ନିର୍ବାଚନରେ ଏନ୍ଡିଏର ଜେଡିୟୁ ୧୧୫, ଭାଜପା ୧୧୦, ମୁକେଶ ସହାନୀଙ୍କ ନେତୃତ୍ୱାଧୀନ ବିକାଶଶୀଳ ଇନ୍ଶାନ ପାର୍ଟି (ଭିଆଇପି) ୧୧ ଓ ଜିତନ୍ରାମ ମାଞ୍ଝିଙ୍କ ହିନ୍ଦୁସ୍ଥାନୀ ଆଓ୍ବାମ ମୋର୍ଚ୍ଚା (ଏଚ୍ଏଏମ୍) ୭ ଆସନରେ ଲଢ଼ିଥିଲେ। ସେହିପରି ମହାମେଣ୍ଟ ପକ୍ଷରୁ ଆର୍ଜେଡି ୧୪୪, କଂଗ୍ରେସ ୭୦ ଓ ବାମଦଳ ପ୍ରାର୍ଥୀ ୨୯ ଆସନରେ ପ୍ରତିଦ୍ୱନ୍ଦ୍ୱିତା କରିଥିଲେ। ଚିରାଗଙ୍କ ଏଲ୍ଜେପି ପକ୍ଷରୁ ୧୩୭ ଆସନରେ ପ୍ରାର୍ଥୀ ଦିଆଯାଇଥିଲା। ପୂର୍ବତନ କେନ୍ଦ୍ରମନ୍ତ୍ରୀ ରାମବିଲାସ ପାଶ୍ୱାନଙ୍କ ପରଲୋକ ପରେ ଚିରାଗ ଯେଉଁ ଅନୁକମ୍ପାମୂଳକ ଭୋଟ ପାଇବେ ବୋଲି ଆଶା କରିଥିଲେ, ସେପରି କିଛି ହେଲା ନାହିଁ। ଚିରାଗଙ୍କ ‘କିଙ୍ଗ୍ ମେକର’ ସ୍ପପ୍ନ ମଧ୍ୟ ଧୂଳିସାତ ହୋଇଯାଇଛି। ଅଥଚ ତାଙ୍କ ନକାରାମତ୍କ ଭୂମିକା ନୀତୀଶ କୁମାରଙ୍କୁ ଅନୂ୍ୟନ ୩୦ ଆସନରେ କ୍ଷତି ପହଞ୍ଚାଇଛି। ଏଲ୍ଜେପି ଭୋଟ କାଟିବାରେ ସଫଳ ହେବାରୁ ଜେଡିୟୁ ୩ ନମ୍ବର ଦଳରେ ପରିଣତ ହୋଇଛି। ଫଳରେ ଭାଜପାର ମୂଲଚାଲ କ୍ଷମତା ବଢ଼ିବା ସହ ନୀତୀଶ ଚତୁର୍ଥ ଥର ପାଇଁ ମୁଖ୍ୟମନ୍ତ୍ରୀ ହେବେ କି ନାହିଁ ତାକୁ ନେଇ ଅନିଶ୍ଚିତତା ସୃଷ୍ଟି ହୋଇଛି। ଭାଜପା ଅଧିକ ଆସନ ଦଖଲ କରିଥିବାରୁ ବଡ଼ଭାଇ ହିସାବରେ ଦଳରୁ ହିଁ ମୁଖ୍ୟମନ୍ତ୍ରୀ କରାଯାଉ ବୋଲି କେତେଜଣ ନେତା ଦାବି କରିଛନ୍ତି। ମହାମେଣ୍ଟରେ ଥିବା କଂଗ୍ରେସର ପ୍ରଦର୍ଶନ ସେତେଟା ଭଲ ହୋଇନାହିଁ। ମାତ୍ର ବାମପନ୍ଥୀ ଦଳଗୁଡ଼ିକୁ ଉଲ୍ଲେଖନୀୟ ସଫଳତା ମିଳିଛି। ଏହାସତ୍ତ୍ୱେ ସଂଖ୍ୟାଗରିଷ୍ଠତାଠାରୁ ମହାମେଣ୍ଟ ଦୂରରେ ଥିବାରୁ ଏହାର ନେତା ତେଜସ୍ବୀ ଯାଦବ ମୁଖ୍ୟମନ୍ତ୍ରୀ ହୋଇ ନ ପାରନ୍ତି।
ଇସିଆଇଙ୍କ ଓ୍ବେବ୍ସାଇଟ୍ରୁ ସଂଗୃହୀତ ତଥ୍ୟାନୁସାରେ ରାତି ୨ଟା୧୫ ସୁଦ୍ଧା ୨୪୦ ଆସନର ବିଜେତାଙ୍କ ନାମ ଆସିଥିଲା ଓ ଅବଶିଷ୍ଟ ୩ ସିଟ୍ରେ ଗଣତି ଚାଲିଥିଲା। ସେଥିମଧ୍ୟରୁ ଏନ୍ଡିଏ ୨୨୩ ଆସନରେ ବିଜୟୀ ହୋଇଥିବାବେଳେ ୨ ସିଟ୍ରେ ଆଗୁଆ ରହିଛି। ଭାଜପା ସପକ୍ଷରେ ୭୪ ଆସନ ରହିଥିବାବେଳେ ଜେଡିୟୁ ୪୨ ଆସନରେ ବିଜୟୀ ହୋଇ ୧ ଆସନରେ ଆଗୁଆ ରହିଛି। ଏନ୍ଡିଏର ଅନ୍ୟ ଦୁଇ ସହଯୋଗୀ ଭିଆଇପି ଏବଂ ଏଚ୍ଏଏମ୍ ୪ଟି ଲେଖାଏ ଆସନ ଜିତିଛନ୍ତି। ଅନ୍ୟପକ୍ଷେ ଆର୍ଜେଡିକୁ ୭୪ ଆସନରେ ସଫଳତା ମିଳିସାରିଥିବାବେଳେ ଦଳ ୧ ଆସନରେ ଆଗୁଆ ରହିଛି। ସହଯୋଗୀ କଂଗ୍ରେସ ୧୯ ଆସନରେ ବିଜୟୀ ହୋଇଛି। ବାମଦଳଙ୍କ କଥା ଦେଖିଲେ ସିପିଆଇ, ସିପିଆଇଏମ୍ ୨ଟି ଲେଖାଏ ଆସନରେ ବିଜୟୀ ହୋଇଥିବାବେଳେ ସିପିଆଇଏମ୍ଏଲ୍ ୧୨ ସିଟ୍ ଜିତିଛି। ଅସାଦୁଦ୍ଦିନ ଓଓ୍ବାଇସିଙ୍କ ଏଆଇଏମ୍ଆଇଏମ୍ ୫ ଆସନ ଦଖଲ କରିବାରେ ସକ୍ଷମ ହୋଇଛି। ସେହିପରି ମାୟାବତୀଙ୍କ ବହୁଜନ ସମାଜ ପାର୍ଟି (ବିଏସ୍ପି) ଓ ସ୍ବାଧୀନ ପ୍ରାର୍ଥୀ ମଧ୍ୟ ଗୋଟିଏ ଲେଖାଏ ଆସନରେ ସଫଳ ହୋଇଛନ୍ତି। ୨୦୧୫ ବିଧାନସଭା ନିର୍ବାଚନରେ ଆର୍ଜେଡି ୮୦ ଆସନ ପାଇଥିଲା। ଭାଜପା ୫୩, ଜେଡିୟୁ ୭୧, କଂଗ୍ରେସ ୨୭, ଏଲ୍ଜେପି ୨ ଓ ଅନ୍ୟ ଦଳ ତଥା ସ୍ବାଧୀନ ପ୍ରାର୍ଥୀ ୧୦ ଆସନରେ ବିଜୟୀ ହୋଇଥିଲେ।
