ନୂଆଦିଲ୍ଲୀ,୧୨ା୧: ରବିବାର ସନ୍ଧ୍ୟାରେ ବାରାଣସୀର ଲାଲ ବାହାଦୁର ଶାସ୍ତ୍ରୀ ଅନ୍ତର୍ଜାତୀୟ ବିମାନବନ୍ଦରରେ ଇଣ୍ଡିଗୋର ଏକ ବିମାନ ଏମରଜେନ୍ସି ଲ୍ୟାଣ୍ଡିଂ କରିଛି । ଗୋରଖପୁରରୁ ବେଙ୍ଗାଲୁରୁ ଯାଉଥିବା ଇଣ୍ଡିଗୋ ଏୟାରଲାଇନ୍ସର ବିମାନ 6E-437 ଏକ ପକ୍ଷୀ ଧକ୍କା ଯୋଗୁଁ ଜରୁରୀକାଳୀନ ଅବତରଣ କରିଥିଲା। ବିମାନରେ ଥିବା ସମସ୍ତ ୨୧୬ ଯାତ୍ରୀଙ୍କୁ ସୁରକ୍ଷିତ ଭାବରେ ଲ୍ୟାଣ୍ଡ କରାଯାଇଥିଲା।
ବିମାନବନ୍ଦର ସୂତ୍ର ଅନୁଯାୟୀ, ମଝି ଆକାଶରେ ଥିବା ସମୟରେ ବିମାନଟି ଏକ ପକ୍ଷୀ ସହିତ ଧକ୍କା ଖାଇଥିଲା। ପକ୍ଷୀ ଧକ୍କା ହେବା ଫଳରେ ବିମାନର ଆଗ ଭାଗ ଅର୍ଥାତ୍ ନୋଜ ସେକ୍ସନ କ୍ଷତିଗ୍ରସ୍ତ ହୋଇଥିଲା। ପରିସ୍ଥିତିର ଗମ୍ଭୀରତାକୁ ଅନୁଭବ କରି, ପାଇଲଟ୍ ତୁରନ୍ତ ବାରାଣସୀ ଏୟାର ଟ୍ରାଫିକ୍ କଣ୍ଟ୍ରୋଲ ସହିତ ଯୋଗାଯୋଗ କରିଥିଲେ ଏବଂ ସତର୍କତାମୂଳକ ପଦକ୍ଷେପ ସ୍ୱରୂପ ବିମାନକୁ ନିକଟତମ ଏୟାରପୋର୍ଟରେ ଲ୍ୟାଣ୍ଡ କରିବା ପାଇଁ ନିଷ୍ପତ୍ତି ନେଇଥିଲେ । ବିମାନଟି ସନ୍ଧ୍ୟା ୭ଟା୦୫ ରେ ବାରାଣସୀ ବିମାନବନ୍ଦରରେ ସୁରକ୍ଷିତ ଭାବରେ ଅବତରଣ କରିଥିଲା।
ଅବତରଣ ପରେ ପ୍ରାଥମିକ ଯାଞ୍ଚରୁ ଆଗ ଭାଗରେ ଏକ କ୍ଷତ ଏବଂ ଏକ ଛୋଟ ଫାଟ ଜଣାପଡ଼ିଥିଲା। ପରେ ଇଣ୍ଡିଗୋ ବିମାନଟି ବିମାନବନ୍ଦରର ଓ୍ବେ ନମ୍ବର ୦୩ରେ ପାର୍କିଂ କରାଯାଇଥିଲା। ସୁରକ୍ଷା ଦୃଷ୍ଟିରୁ ପାଇଲଟ୍ ଉଡ଼ାଣ ଚଳାଇବାକୁ ମନା କରିଦେଇଥିଲେ, ଯାହା ଫଳରେ ଗୋରଖପୁର-ବେଙ୍ଗାଲୁରୁ ବିମାନ ବାତିଲ ହୋଇଥିଲା।
