ମୂମ୍ବାଇ: ଖୁବ୍ଶୀଘ୍ର ପରଦାକୁ ଆସିବ ସଲମାନ ଖାନଙ୍କ ଲୋକପ୍ରିୟ ରିଆଲିଟି ଶୋ’ ‘ବିଗ ବସ ୨୦୨୫’। ଏହି ସିଜନରେ କେଉଁ କେଉଁ ପ୍ରତିଯୋଗୀ ଅଂଶଗ୍ରହଣ କରିବେ, ସେନେଇ ଅନେକ ଚର୍ଚ୍ଚା ହୋଇଆସୁଥିଲା। କିନ୍ତୁ ଏବେ ସେଥିରେ ପଡ଼ିଛି ପୂର୍ଣ୍ଣଚ୍ଛେଦ। ସଲମାନ ଖାନଙ୍କ ଏହି ଶୋ’ରେ ଅଂଶଗ୍ରହଣ କରୁଥିବା ସମସ୍ତ ପ୍ରତିଯୋଗୀଙ୍କ ନାମ ସାମ୍ନାକୁ ଆସିଛି। ବିଗ ବସ ହାଉସରେ ମୋଟ ୧୮ ଜଣ ପ୍ରତିଯୋଗୀ ପ୍ରବେଶ କରିବେ। ସେହିଭଳି ଓାଇଲ୍ଡ କାର୍ଡ ଏଣ୍ଟ୍ରି ନେଇ ଅନେକ ନାମ ଚର୍ଚ୍ଚାରେ ରହିଛି। ପୂର୍ବରୁ ବିଶ୍ୱପ୍ରସିଦ୍ଧ ବକ୍ସର ମାଇକ ଟାଇସନ ଶୋ’ରେ ଭାଗନେବେ ବୋଲି କୁହାଯାଉଥିଲା। କିନ୍ତୁ ଏବେ ଖବର ମିଳୁଛି ଯେ ଡବ୍ଲ୍ୟୁଡବ୍ଲ୍ୟୁଇର ମହାନ ରେସଲର ଦି ଅଣ୍ଡରଟେକର ମଧ୍ୟ ସଲମାନ ଖା ନଙ୍କ ଏହି ଶୋ’ରେ ଓାଇଲ୍ଡ କାର୍ଡ ଏଣ୍ଟ୍ରି ନେଇପାରନ୍ତି।
ପୂର୍ବରୁ ରିପୋର୍ଟରେ କୁହାଯାଇଥିଲା ଯେ ପ୍ରସିଦ୍ଧ ବକ୍ସର ମାଇକ ଟାଇସନ ସଲମାନ ଖାନଙ୍କ ବିଗ ବସ ଶୋ’ରେ ଅଂଶଗ୍ରହଣ କରିବେ, ଯାହା ନେଇ ପ୍ରାୟ ୬୦ ପ୍ରତିଶତ ନିଶ୍ଚିତ ହୋଇଛି। କିନ୍ତୁ ଏବେ ଯେଉଁ ଖବର ସାମ୍ନାକୁ ଆସୁଛି, ତାହା ସମସ୍ତଙ୍କୁ ଚକିତ କରିଛି। ଡବ୍ଲୁଡବ୍ଲୁଇ ଜଗତର ବାଦ୍ଶାହ ତଥା ରିଙ୍ଗର ମାଷ୍ଟର ଦି ଅଣ୍ଡରଟେକର ଏହି ଶୋ’ରେ ଏଣ୍ଟ୍ରି ନେବାକୁ ଯାଉଛନ୍ତି ବୋଲି ଚର୍ଚ୍ଚା ହେଉଛି।
ଟାଇମ୍ସ ଅଫ ଇଣ୍ଡିଆର ରିପୋର୍ଟ ଅନୁସାରେ, ଅଣ୍ଡରଟେକର ଏହି ଶୋ’ରେ ଏକ ସପ୍ତାହ ପାଇଁ ଦେଖାଦେଇପାରନ୍ତି। ସେ ଓାଇଲ୍ଡ କାର୍ଡ ପ୍ରତିଯୋଗୀ ଭାବେ ଶୋ’ର ଅଂଶ ହୋଇପାରନ୍ତି। ଏହି ଖବର ଶୁଣି ଦର୍ଶକମାନେ ଆଶ୍ଚର୍ଯ୍ୟ ହେଉଛନ୍ତି। ବିଗ ବସ୍ ଓ ଡବ୍ଲୁଡବ୍ଲୁଇ ଫ୍ୟାନ୍ମାନଙ୍କ ମଧ୍ୟରେ ଏକ ହଲଚଲ ସୃଷ୍ଟି ହୋଇଛି। ସଲମାନ ଖାନ ଓ ଅଣ୍ଡରଟେକରଙ୍କୁ ଏକାଠି ସ୍କ୍ରିନରେ ଦେଖିବା ପାଇଁ ଫ୍ୟାନ୍ମାନେ ବ୍ୟାକୁଳ ହୋଇଛନ୍ତି। ଏହା ମଧ୍ୟ କୁହାଯାଉଛି ଯେ ଅଣ୍ଡରଟେକର ଏହି ଶୋ’ ପାଇଁ ମୋଟା ଅଙ୍କର ପାରିଶ୍ରମିକ ନେଇପାରନ୍ତି। ମେକର୍ସମାନେ ତାଙ୍କୁ ଅପ୍ରୋଚ କରିବାରେ ଲାଗିଛନ୍ତି ଏବଂ ଶୀଘ୍ର ଏ ନେଇ ଆନୁଷ୍ଠାନିକ ନିଶ୍ଚିତି ମିଳିପାରେ।
ଏହା ମନେ କରାଯାଉଛି ଯେ ଯଦି ଅଣ୍ଡରଟେକର ଏହି ଶୋ’ରେ ଯୋଗ ଦିଅନ୍ତି, ତେବେ ସେ ବିଗ ବସ୍ର ଦୁଇ ଦଶନ୍ଧିର ଇତିହାସରେ ସର୍ବାଧିକ ପାରିଶ୍ରମିକ ନେଉଥିବା ପ୍ରତିଯୋଗୀ ହୋଇପାରନ୍ତି। ଏହା ପୂର୍ବରୁ ଦି ଗ୍ରେଟ ଖଲି ବିଗ ବସ ସିଜନ ୪ରେ ଅଂଶଗ୍ରହଣ କରିଥିଲେ, ଯେତେବେଳେ ତାଙ୍କୁ ପ୍ରତି ସପ୍ତାହ ପାଇଁ ୫୦ ଲକ୍ଷ ଟଙ୍କା ପାରିଶ୍ରମିକ ମିଳିଥିଲା। ଏହାକୁ ଏବେ ବହୁତ ସମୟ ବିତି ଯାଇଛି। ତେଣୁ ଯଦି ଅଣ୍ଡରଟେକର ଶୋ’ର ଅଂଶ ହୁଅନ୍ତି, ତେବେ ସେ ବିଗ ବସ୍ ଇତିହାସରେ ସର୍ବାଧିକ ପାରିଶ୍ରମିକ ନେଉଥିବା ପ୍ରତିଯୋଗୀ ହେବେ ବୋଲି ଆଶା କରାଯାଉଛି।
ବିଗ ବସ ୧୯ ଆଗଷ୍ଟ ୨୪, ୨୦୨୫ରେ ଜିଓ ହଟଷ୍ଟାରରେ ରାତି ୯ଟାରେ ଷ୍ଟ୍ରିମିଂ ଆରମ୍ଭ ହେବ ଏବଂ ପରେ ରାତି ୧୦:୩୦ରେ କଲର୍ସ ଟିଭିରେ ପ୍ରସାରିତ ହେବ। ରିପୋର୍ଟ ଅନୁସାରେ, ଶୋ’ ୧୫ ଜଣ ପ୍ରତିଯୋଗୀଙ୍କୁ ନେଇ ଆରମ୍ଭ ହେବ, ଏବଂ ପରେ ୩ ଜଣ ଓାଇଲ୍ଡ କାର୍ଡ ପ୍ରତିଯୋଗୀ ଯୋଗ ଦେବେ। ମାଇକ ଟାଇସନଙ୍କ ଏନ୍ଟ୍ରି ଅକ୍ଟୋବର ମାସରେ ଏବଂ ଅଣ୍ଡରଟେକରଙ୍କ ଏନ୍ଟ୍ରି ନଭେମ୍ବର ମାସରେ ହେବାର ସମ୍ଭାବନା ରହିଛି।
