ତେଲ ଆଭିବ,୨୯।୧୨: ହାମାସ ଦ୍ୱାରା ବନ୍ଦୀ ଅବସ୍ଥାରେ ଥିବା ସବୁଠାରୁ ବୟସ୍କ ଇସ୍ରାଏଲ ମହିଳାଙ୍କର ମତ୍ୟୁ ହୋଇଛି। ଇସ୍ରାଏଲର କିବୁତ୍ଜ ନିର ଓଜ ଗୁରୁବାର କହିଛନ୍ତି ଯେ ଏହାର ବାସିନ୍ଦା ଜୁଡିଥ ୱେନଷ୍ଟାଇନ ହାଗାଇଙ୍କୁ ଅକ୍ଟୋବର ୭ରେ ହମାସ ଆତଙ୍କବାଦୀମାନେ ହତ୍ୟା କରିଥିଲେ। ଅଦ୍ୟାବଧି ବିଶ୍ୱାସ କରାଯାଉଥିଲା ଯେ ଜୁଡିଥ ତଥାପି ହମାସର ବନ୍ଦୀ ଅବସ୍ଥାରେ ଥିଲେ। ସୂଚନାଯୋଗ୍ୟ, ଅକ୍ଟୋବର ୭ଆକ୍ରମଣରେ ହମାସ ଜୁଡିଥଙ୍କ ସ୍ବାମୀ ଗାଦି ହାଗାଇଙ୍କୁ ମଧ୍ୟ ହତ୍ୟା କରିଥିଲା।
ଆମେରିକାର ରାଷ୍ଟ୍ରପତି ଜୋ ବାଇଡେନ ମଧ୍ୟ ଏକ ବିବୃତ୍ତି ଜାରି କରି ଜୁଡିଥଙ୍କ ମୃତ୍ୟୁକୁ ନେଇ ଦୁଃଖ ପ୍ରକାଶ କରିଛନ୍ତି। ସୂଚନାଯୋଗ୍ୟ, ଜୁଡିଥ ଆମେରିକା ସହ ଇସ୍ରାଏଲର ବି ନାଗରିକ ଥିଲେ। ଗଣମାଧ୍ୟମ ରିପୋର୍ଟ ଅନୁଯାୟୀ, ଅକ୍ଟୋବର ୭ରେ ହମାସ ଆତଙ୍କବାଦୀମାନେ ଇସ୍ରାଏଲ ଉପରେ ଆକ୍ରମଣ କରୁଥିବାବେଳେ ଜୁଡିଥ ଏବଂ ତାଙ୍କ ସ୍ବାମୀ ସକାଳୁ ବୁଲିବାକୁ ଯାଇଥିଲେ। ଜୁଡିଥ ଏବଂ ତାଙ୍କ ସ୍ବାମୀ ମଧ୍ୟ ହମାସର ବନ୍ଦୀ ଅବସ୍ଥାରେ ଥିବା ଆଠ ଜଣ ଆମେରିକୀୟ ନାଗରିକଙ୍କ ମଧ୍ୟରେ ଥିଲେ ବୋଲି ବିଶ୍ୱାସ କରାଯାଉଥିଲା।
