ଭଞ୍ଜନଗର,୨୪।୪(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ବ୍ଲକ ପ୍ରଶାସନ ପକ୍ଷରୁ ଶୁକ୍ରବାର ସାରେ ଜାତୀୟ ପଞ୍ଚାୟତ ରାଜ ଦିବସ ପାଳିତ ହୋଇଯାଇଛି। ଏଥିରେ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ମୁଖ୍ୟ ଅତିଥି ଭାବେ ଯୋଗଦେଇ ବ୍ଲକର ୯୬ ଜଣ ହିତାଧିକାରୀଙ୍କୁ ଅନ୍ତଦୋୟ ଗୃହ ଯୋଜନାରେ କାର୍ଯ୍ୟାଦେଶ ପ୍ରଦାନ କରିଥିଲେ। ଏହି ଅବସରରେ ବିଧାୟକ ନାୟକ କହିଥିଲେ ଯେ, ମହିଳା ମାନଙ୍କୁ ଭାଜପା ସରକାର ସର୍ବଦା ସମ୍ମାନ ଦିଏ। ତେଣୁ ମହିଳାମାନଙ୍କୁ ସଂସଦରେ ୫୦ ପ୍ରତିଶତ ସଂରକ୍ଷଣ ଦେବାପାଇଁ କେନ୍ଦ୍ର ସରକାର ବିଲ ଆଣିଥିଲେ। କିନ୍ତୁ ବିରୋଧୀ ଦଳ ଗୁଡ଼ିକ ମହିଳା ବିରୋଧୀ ହୋଇଥିବା ଯୋଗୁ ଉକ୍ତ ବିଲ୍କୁ ବିରୋଧ କରିଥିଲେ। ବିରୋଧି ଦଳ ଗୁଡ଼ିକ ମହିଳା ବିରୋଧି । ଆଗାମୀ ଦିନରେ ତାହାର ଉଚିତ ଜବାବ ଦିଆଯିବ ବୋଲି ବିଧାୟକ ନାୟକ କହିଥିଲେ।
ଏଥିସହ ସେ କହିଥିଲେ ଯେ, ଆଗକୁ ତ୍ରୀସ୍ତରୀୟ ପଞ୍ଚାୟତ ନିର୍ବାଚନ ହେବ। ତେଣୁ ଆପଣମାନଙ୍କ ସୁଖଦୁଃଖର ଯିଏ ସାଥି ହେଉଛି ସର୍ବଦା ସେହିଭଳି ଲୋକଙ୍କୁ ପ୍ରତିନିଧି ଭାବେ ବାଛିବେ। ତାହାହେଲେ ଯାଇ ଅଞ୍ଚଳର ବିକାଶ ହୋଇପାରିବ। ବିଗତ ସରକାରରେ ଶାସକ ଦଳର ଲୋକଙ୍କୁ ଦେଖି ସରକାରୀ ଯୋଜନା ପ୍ରଦାନ କରାଯାଉଥିଲା। ଏହାଦ୍ବାରା ଯୋଜନାର ସୁଫଳ ପ୍ରକୃତ ହିତାଧିକାରୀଙ୍କ ପାଖରେ ପହଞ୍ଚି ପାରୁ ନ ଥିଲା। କିନ୍ତୁ ରାଜ୍ୟରେ ଭାଜପା ସରକାର ଆସିବା ପରେ ପ୍ରକୃତ ହିତାଧିକାରୀଙ୍କୁ ସରକାରୀ ଯୋଜନାର ସୁଫଳ ମିଳୁଛି ବୋଲି ବିଧାୟକ ନାୟକ କହିଥିଲେ। ବୈଠକରେ ବିଡିଓ ଭାରତୀ ଦେବୀ ଅଧ୍ୟକ୍ଷତା କରିଥିଲେ। ଅନ୍ୟମାନଙ୍କ ମଧ୍ୟରେ ଏବିଡିଓ ପୂର୍ଣ୍ଣ ଚନ୍ଦ୍ର ପାଢ଼ୀ, ଜିଲା ପରିଷଦ ଏମପି ପ୍ରତିନିଧି ଶିବ ଶଙ୍କର ପ୍ରଧାନ, ବ୍ଲକ ଏମପି ପ୍ରତିନିଧି ରବିନ୍ଦ୍ର ଗୌଡ, ଡିହପଢ଼ାଳ ସରପଞ୍ଚ ପ୍ରତିନିଧି ସୁବାଷ ଚନ୍ଦ୍ର ବରାଡ, ତିଲିସିଙ୍ଗି ସମିତିସଭ୍ୟ ଟୁଟୁ ପ୍ରଧାନ ପ୍ରମୁଖ ସଭାରେ ଉପସ୍ଥିତ ଥିଲେ। ଏହାପୂର୍ବରୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ସାରେ ବଲାଙ୍ଗୀର ଗାନ୍ଧୀ ଷ୍ଟାଡିୟମ ଠାରେ ରାଜ୍ୟ ସ୍ତରୀୟ ଜାତୀୟ ପଞ୍ଚାୟତ ରାଜ୍ୟ ଦିବସର ଶୁଭାରମ୍ଭ କରିଥିଲେ। ସେଠାରେ ୫୦ ହଜାର ହିତାଧିକାରୀଙ୍କ ୁଅନ୍ତଦୋୟ ଗୃହ ଯୋଜନାର କାର୍ଯ୍ୟାଦେଶ ବଣ୍ଟନର ଶୁଭାରମ୍ଭ କରିଥିଲେ। ତେଣୁ ଏହି ଅବସରରେ ରାଜ୍ୟର ସମସ୍ତ ବ୍ଲକରେ ଆଭାସୀ ମାଧ୍ୟମରେ କାର୍ଯ୍ୟକ୍ରମ ହୋଇଥିଲା। ଭଞ୍ଜନଗର ବ୍ଲକ ତିଲିସିଙ୍ଗି ପଞ୍ଚାୟତ ପୁଡ଼ୁରିଙ୍ଗି ଗ୍ରାମର ପ୍ରମିଳା ମଲ୍ଲିକଙ୍କୁ ମୁଖ୍ୟମନ୍ତ୍ରୀ ବଲାଙ୍ଗୀର ଠାରେ କାର୍ଯ୍ୟାଦେଶ ବଣ୍ଟନ କରିଥିଲେ।
