ରାୟଗଡା,୫।୨(ଆଶିଷ ରଞ୍ଜନ ପଣ୍ଡା): ଗୁଡାରି ବ୍ଲକ ଅଧକ୍ଷାଙ୍କ ବିରୋଧରେ ଆଗତ ହୋଇଥିବା ଅନାସ୍ଥା ପ୍ରସ୍ତାବ ସପକ୍ଷରେ ଭୋଟ ଦେଇ ଦଳ ବିରୋଧୀ କାର୍ଯ୍ୟ ଓ ବିଶୃଙ୍ଖଳା ଆଚରଣ ଯୋଗୁ ବ୍ଲକର ୩ ସରପଞ୍ଚ, ୩ ସମିତି ସଭ୍ୟଙ୍କୁ କଂଗ୍ରେସ ଦଳରୁ ନିଳମ୍ବିତ କରାଯାଇଛି। ସରପଞ୍ଚ, ସମିତି ସଭ୍ୟଙ୍କ ବ୍ୟତୀତ ବରିଷ୍ଠ କଂଗ୍ରେସ ନେତା ରଘୁନାଥ ପାତ୍ର, ଭାସ୍କର ଜାଗାରଙ୍ଗା, ସାଇମନ ନାରେଙ୍ଗାଙ୍କୁ ମଧ୍ୟ କଂଗ୍ରେସ ଦଳରୁ ନିଳମ୍ବିତ କରାଯାଇଛି। ପିସିସି ସଭାପତି ଭକ୍ତ ଦାସଙ୍କ ନିର୍ଦ୍ଦେଶକ୍ରମେ ପ୍ରଦେଶ କଂଗ୍ରେସ ଶୃଙ୍ଖଳା କାର୍ଯ୍ୟାନୁଷ୍ଠାନ କମିଟି ଦ୍ୱାରା ପ୍ରେସ ବିଜ୍ଞପ୍ତି ମାଧ୍ୟମରେ ପ୍ରକାଶ କରିଛନ୍ତି। ଅସଡା ସରପଞ୍ଚ ସୁଦାମ ଶବର, ସମିତି ସଭ୍ୟା ରଶ୍ମିତା ଶବର, ଖାରିଗୁଡା ସରପଞ୍ଚ ଲୁସି ନାରେଙ୍ଗାକା, ସମିତି ସଭ୍ୟା ସବିତା ଶବର, ମଧୁବନ ସରପଞ୍ଚ ସୁଦାମ ଶବର, ଏମ କେ ରାଇ ସମିତି ସଭ୍ୟା ଅର୍ଜୁନ ଶବର କଂଗ୍ରେସ ଦଳରୁ ନିଳମ୍ବିତ କରାଯାଇଛି। ଏହି ନିଳମ୍ବନ ପରେ ଗୁଡାରି ରାଜନୈତିକ ସମୀକରଣ ସୃଷ୍ଟି ହେବା ନେଇ ଏକ ପ୍ରକାର ନିଶ୍ଚିତ ହୋଇଛି। ଏହି ନିଲମ୍ବନକୁ ନେଇ ଆଗାମୀ ଦିନରେ ଭାଜପା କେଉଁ ରଣନୀତି ଆପଣାଉଛି ତାହା ଦେଖିବାକୁ ବାକି ରହିଲା।
