ଥୁଆମୂଳ ରାମପୁର, ୨୦।୫ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ବାଗଡିଆଣି ଗ୍ରାମ ପଞ୍ଚାୟତ ଅନ୍ତର୍ଗତ କୁମ୍ଭାରକାନି ପୁରୁଣା ଖେଳ ପଡ଼ିଆ (କାଶୀପୁର ରୋଡ) ଠାରେ ଚାଲିଥିବା ପ୍ରତିଷ୍ଠିତ ବିଜିସିସି (B.G.C.C.) ନକ୍ଆଉଟ୍ କ୍ରିକେଟ ଟୁର୍ଣ୍ଣାମେଣ୍ଟ (ସିଜନ-୧) ବୁଧବାର ଦିନ ଏକ ଭବ୍ୟ ଏବଂ ଆକର୍ଷଣୀୟ ସମାରୋହ ମଧ୍ୟରେ ଉଦ୍ଯାପିତ ହୋଇଯାଇଛି। ଏହି ହୃଦୟଥରା ଗ୍ରାଣ୍ଡ ଫାଇନାଲ୍ ମ୍ୟାଚ୍ରେ ଶକ୍ତିଶାଳୀ ବାରାକାଉଡ଼ି ଦଳକୁ ପରାସ୍ତ କରି କାଠକୁରା ଦଳ ଚଳିତ ସିଜନର ଚମ୍ପିୟାନ୍ ମୁକୁଟ ପିନ୍ଧିବାର ଗୌରବ ହାସଲ କରିଛି।
ପ୍ରକାଶଯୋଗ୍ୟ ଯେ, ଗତ ୧୫ ମେ’ ରିଖରୁ ଆରମ୍ଭ ହୋଇଥିବା ଏହି ଆଞ୍ଚଳିକ ମେଗା କ୍ରିକେଟ୍ ଟୁର୍ଣ୍ଣାମେଣ୍ଟରେ ସ୍ଥାନୀୟ ଅଞ୍ଚଳର ମୋଟ ୧୬ଟି ନାମୀଦାମୀ ଦଳ ଅଂଶଗ୍ରହଣ କରିଥିଲେ। ବୁଧବାର ଅନୁଷ୍ଠିତ ଚୂଡ଼ାନ୍ତ ମ୍ୟାଚ୍ଟି କାଠକୁରା ଏବଂ ବାରାକାଉଡ଼ି ଦଳ ମଧ୍ୟରେ ୧୨ ଓଭର ବିଶିଷ୍ଟ ଖେଳାଯାଇଥିଲା। ଟସ୍ ଜିତି ପ୍ରଖମେ ବ୍ୟାଟିଂ କରିଥିବା ବାରାକାଉଡ଼ି ଦଳ ନିର୍ଦ୍ଧାରିତ ୧୨ ଓଭର ଖେଳି ସମସ୍ତ ଉଇକେଟ୍ ହରାଇ ୧୧୦ ରନ୍ ସଂଗ୍ରହ କରିଥିଲା। ଜବାବରେ ୧୧୧ ରନ୍ର ବିଜୟ ଲକ୍ଷ୍ୟକୁ ପିଛା କରି କାଠକୁରା ଦଳ ପଡ଼ିଆର ଚତୁର୍ଦ୍ଦିଗରେ ଚୌକା ଓ ଛକାର ବର୍ଷା କରି ମାତ୍ର ୬ ଓଭରରେ ଏହି ବିଜୟ ଲକ୍ଷ୍ୟ ହାସଲ କରିନେଇଥିଲା।
କାଠକୁରା ଦଳର ଅଧିନାୟକ ପ୍ରଦୀପ କୁମାର ନାଏକ ଏକ ଅବିଶ୍ୱସନୀୟ ଓ ବିସ୍ଫୋରକ ବ୍ୟାଟିଂ ପ୍ରଦର୍ଶନ କରି ମାତ୍ର ୧୪ଟି ବଲ୍ରୁ ୫୧ ରନ୍ର ଏକ ଅପରାଜିତ ଅର୍ଦ୍ଧଶତକୀୟ ପାଳି ଖେଳି ଦଳକୁ ସହଜ ବିଜୟ ଆଣିଦେବା ସହ ‘ମ୍ୟାନ୍ ଅଫ୍ ଦି ମ୍ୟାଚ୍’ ବିବେଚିତ ହୋଇଥିଲେ। ସେହିପରି ସମଗ୍ର ଟୁର୍ଣ୍ଣାମେଣ୍ଟରେ ସ୍ମରଣୀୟ ପ୍ରଦର୍ଶନ କରିଥିବା କୃଷ୍ଣ ମାଝୀଙ୍କୁ ‘ମ୍ୟାନ୍ ଅଫ୍ ଦି ସିରିଜ୍’ ପୁରସ୍କାରରେ ସମ୍ମାନିତ କରାଯାଇଥିଲା। ଏହି ଉଦ୍ଯାପନୀ ଉତ୍ସବର ମେଗା ଫାଇନାଲ୍ ଦିବସରେ ଲାଞ୍ଜିଗଡ଼ ନିର୍ବାଚନ ମଣ୍ଡଳୀର ମାନ୍ୟବର ବିଧାୟକ ପ୍ରଦୀପ କୁମାର ଦିଶାରି ମୁଖ୍ୟ ଅତିଥି ଭାବେ ଯୋଗଦେଇ ଯୁବ କ୍ରୀଡ଼ାବିତ୍ମାନଙ୍କୁ ପ୍ରଶଂସା କରିବା ସହ ନିଜ ହସ୍ତରେ ବିଜେତା ଓ ରନର୍ସ-ଅପ୍ ଦଳକୁ ପୁରସ୍କାର ରାଶି ଏବଂ ଟ୍ରଫି ପ୍ରଦାନ କରିଥିଲେ। କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ବିଧାୟକ ପ୍ରତିନିଧି ମାଣିକ୍ୟ ଚନ୍ଦ୍ର ନାଏକ, ବିଜେଡି ବ୍ଲକ ସଭାପତି କପିଳାସ ନାଏକ, ବିଜେଡି ଯୁବ ସଭାପତି ପ୍ରଦୀପ କୁମାର ନାଏକ, କୃଷ୍ଣ ଚନ୍ଦ୍ର ନାଏକ, ଫଟୋଶିଂ ଭୋଇ ଓ ସୁରେନ୍ଦ୍ର ନାଏକ ପ୍ରମୁଖ ଉପସ୍ଥିତ ରହି ଖେଳାଳିମାନଙ୍କୁ ଉତ୍ସାହିତ କରିଥିଲେ। ଏଥିସହିତ ସ୍ଥାନୀୟ ସରପଞ୍ଚ ସୂର୍ଯ୍ୟ ମାଝୀ, ସମିତି ସଭ୍ୟ ଘାସିରାମ ମାଝି, ନାଏବ ସରପଞ୍ଚ ଲତା ମଞ୍ଜୁରୀ ପାଣିଗ୍ରାହୀ, ସମସ୍ତ ୱାର୍ଡ ମେମ୍ବର, ଗାଁ ସାଥୀ, ଏମବିକେ (MBK) ଏବଂ ଅଙ୍ଗନୱାଡି କର୍ମୀମାନେ ଉପସ୍ଥିତ ରହି ଉଦ୍ଯାପନୀ କାର୍ଯ୍ୟକ୍ରମର ଶୋଭା ବଢ଼ାଇଥିଲେ।
ଉକ୍ତ ମ୍ୟାଚ୍କୁ ଆମ୍ପିଆର ଭାବେ ଅଶ୍ୱିନ ମାଝୀ ଓ କପିଳାସ ରାଉତ ଅତି ସୂକ୍ଷ୍ମ ଭାବେ ପରିଚାଳନା କରିଥିବା ବେଳେ ରୀତିମନ୍ତ ଛତ୍ରିଆ ଏବଂ ମନୋଜ ଛତ୍ରିଆ ନିଜର ଚମତ୍କାର ଧାରାବିବରଣୀ (Anchoring) ମାଧ୍ୟମରେ ଦର୍ଶକମାନଙ୍କୁ ମନ୍ତ୍ରମୁଗ୍ଧ କରି ରଖିଥିଲେ। ଟୁର୍ଣ୍ଣାମେଣ୍ଟକୁ ସଫଳ କରିବାରେ ଆୟୋଜକ କମିଟିର ସଦସ୍ୟ ମନୋରଞ୍ଜନ ନାଗ, ଡମ୍ବରୁଧର ନାଗ, ଅକ୍ଷୟ କୁମାର ନାଏକ, ଚିତ୍ରକେତୁ ନାଏକ, ସୁରେନ୍ଦ୍ର ନାଏକ, ସୁଦାମ ମାଝୀ, ମହେଶ ନାଏକ, ରଞ୍ଜିତ୍ ନାଏକ, ମକରନ୍ତ ମାଝୀ, ସୁରେଶ ମାଝୀ, ଲବକାନ୍ତ ମାଝୀ, ରାଇସିଂ ମାଝୀ, ମନ ମାଝୀ, ସୁଧୀର ନାଏକ ଏବଂ ମହେନ୍ଦ୍ର ନାଏକ ପ୍ରମୁଖ ସମ୍ପୂର୍ଣ୍ଣ ସହଯୋଗ କରି ଶୃଙ୍ଖଳା ରକ୍ଷା କରିଥିଲେ।
