ଭଞ୍ଜନଗର,୧୬ା୫(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଠାକୁରାଣୀ ଯାତ୍ରା ଶନିବାର ୨୧ ଦିନରେ ପହଞ୍ଚିଛି। ଆଉ ୪ ଦିନ ପରେ ଯାତ୍ରା ଉଦ୍ଯାପିତ ହେବ। ଆଜି ଅର୍ଥାତ୍ ଶୁକ୍ରବାର ସାବିତ୍ରୀ ଅମାବାସ୍ୟା ଥିବାରୁ ଦେବୀଙ୍କ ଅସ୍ଥାୟୀ ମଣ୍ଡପ ସମ୍ମୁଖରେ ମହିଳାମାନେ ସାବିତ୍ରୀ ବ୍ରତ ପାଳନ କରିଥିଲେ। ତେଣୁ ମଣ୍ଡପ ସମ୍ମୁଖରେ ପ୍ରବଳ ଭିଡ଼ ହୋଇଥିଲା। ଅନ୍ୟପଟେ ମାନସିକ ବେଶଧାରୀ ଯାତ୍ରାର ଆକର୍ଷଣ ବଢ଼ାଉଛନ୍ତି । ଯାତ୍ରା ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ସମସ୍ତଙ୍କ ସହଯୋଗରେ ଶାନ୍ତିଶୃଙ୍ଖଳାର ସହ ଯାତ୍ରା ଚାଲିଛି। ଆଜି ସନ୍ଧ୍ୟାରେ କବି ସମ୍ରାଟ ଉପେନ୍ଦ୍ର ଭଞ୍ଜ ରଙ୍ଗମଞ୍ଚରେ ବିଶିଷ୍ଠ କଣ୍ଠଶିଳ୍ପୀ ସଞ୍ଜୁ ମହାନ୍ତି ଏବଂ ତାଙ୍କ ଟିମ୍ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିବେ। ଅନ୍ୟପଟେ ରବିବାର ଭଞ୍ଜନଗର ମ୍ୟୁନିସିପାଲିଟି ପକ୍ଷରୁ ଦେବୀଙ୍କୁ ନିମନ୍ତ୍ରଣ କରି ନିଆଯାଇଛି। ତେଣୁ ଆସନ୍ତାକାଲି ବିରାଟ ପଟୁଆର ବାହାରିବ। ଏଥିସହ ୧୮ ତାରିଖରେ ଭଞ୍ଜନଗର ଜଳସମ୍ପଦ ବିଭାଗ ପକ୍ଷରୁ ଦେବୀଙ୍କୁ ନିମନ୍ତ୍ରଣ କରାଯାଇଛି। ଉକ୍ତ ଦିନ ମଧ୍ୟ ବିରାଟ ପଟୁଆର ବାହାରିବ। ୧୯ ତାରିଖରେ ସିଂହବାହିନୀ ଯାତ୍ରା ନାଟକ ମଞ୍ଚସ୍ଥ କରିବ। ଦେବୀ ଅସ୍ଥାୟୀ ମଣ୍ଡପରୁ ବାହାରି ସିଂହ ବେଶ ଉପରେ ବସି ତହସିଲ କାର୍ଯ୍ୟାଳୟ ଛକ ପର୍ଯ୍ୟନ୍ତ ଆସିବେ। ସେଠାରୁ ଫେରି ପୁଣି ବିଶ୍ରାମ ନେବେ। ୨୦ରେ ଦେବୀ ଫେରିଯିବେ। ତେଣୁ ରବିବାର ଓ ସୋମବାର ଯାତ୍ରା ଦେଖିବାକୁ ସହରରେ ପ୍ରବଳ ଭିଡ଼ ହେବାର ସମ୍ଭାବନା ରହିଛି। ରବିବାର ମ୍ୟୁନିସିପାଲିଟି ପକ୍ଷରୁ ଦେବୀଙ୍କ ନିମନ୍ତ୍ରଣ ହୋଇଥିବାରୁ ଦେବୀ ଆସନ୍ତାକାଲି ଅସ୍ଥାୟୀ ମଣ୍ଡପରୁ ପୂର୍ବ ମୁଖା ହୋଇ ବାହାରି ଟାଉନ ହଲ ଛକ ପର୍ଯ୍ୟନ୍ତ ଯିବେ। ସେଠାରୁ ପଶ୍ଚିମ ମୁଖା ହୋଇ ମ୍ୟୁନିସିପାଲିଟି କାର୍ଯ୍ୟାଳୟ ପର୍ଯ୍ୟନ୍ତ ଆସିବେ। ସେଠାରେ ଦେବୀ ପୂଜା ପାଇବା ପରେ ସେଠାରୁ ରେଡକ୍ରସ୍ ରୋଡ୍, ଭେଜିପୁଟ ହୋଇ ହାର୍ଟ ନଗର ପର୍ଯ୍ୟନ୍ତ ଯିବେ। ସେଠାରୁ ଫେରି କୋର୍ଟ ରୋଡ୍ ବସ୍ଷ୍ଟାଣ୍ଡ ହୋଇ ଅସ୍ଥାୟୀ ମଣ୍ଡପରେ ପହଞ୍ଚି ବିଶ୍ରାମ ନେବାର କାର୍ଯ୍ୟକ୍ରମ ରହିଛି।
